Er jafn bjart framundan og skýrsla Capacent segir?

 

Fyrir okkur íbúa í Reykjanesbæ verður uppbygging atvinnutækifæra aðalmál  kosningarbaráttunnar til bæjarstjórnar nú í vor. Meirihluti þeirra Sjálfstæðismanna mun án efa halda frammi niðurstöðu aðkeyptrar skýrslu sinnar frá Capacent að allt sé bjart framundan. Hér muni að lokum allt fara eins og þeir höfðu fyrir spáð. Sama var uppi á teningnum þegar herinn fór, og forsvarsmenn meirihlutans fullvissuðu okkur um skömmu fyrir þingkosningar að engin hætta væri á ferðum. Þeir væru með símanúmer einkavinanna í Washington.

Þeir halda nú að okkur að öll þau atvinnutækifæri sem á næstu þremur árum eiga að skapa hér 6500 ársverk sé að finna á bak við næsta horn og ekkert geti stöðvað þau nema þá helst núverandi ríkistjórn, sem þó virðist gera allt sem hennar valdi stendur til að þoka málum áfram er viðkoma þessu svæði.

Sú fregn að nú hafi verið  gengið frá rammasamningi um kísilmálmverksmiðju í Þorlákshöfn ætti að hringja einhverjum viðvörunarbjöllum. Er allt jafn bjart framundan og skýrsla Capacent segir. Getur það verið eins og með herinn forðum að menn vita að kísilverksmiðjan er ekki að koma, en menn bíða bara með að segja frá því fram yfir kosningar. Mér finnst staðreyndir málsins segja mér að svo sé.

Ljóst er að því rafmagni sem HS Orka hafði lofað í verkefnið hefur nú verið ráðstafað til álvers í Helguvík. Og beðiðer eftir virkjanaleyfi til þess að geta stækkað Reykjanesvirkjun svo unnt sé að uppfylla samninginn gagnvart álverinu, til að  nýta þá túrbínu sem  var keypt áður en séð var hvort virkjanaleyfið yfirleitt fengist. Það er líka ljóst að Orkuveita Reykjavíkur er ekki aflögufær næstu árin verði samningurinn í Þorlakshöfn að veruleika. Og enginn veit  hverjar kröfur Grindvíkinga verða í samningum sínum við HS Orku. Gera þeir kröfu um að einhver hluti orku úr þeirra landi verði nýttur til atvinnuuppbyggingar þar? Og þar fyrir utan hefur ekki verið tryggð fjármögnun fyrir verkmiðjunni sem enga orkusamninga hefur. Þetta virkar ekki alveg í mínum huga.

 

 

Athugasemdir

[Sigurður Þorsteinsson, 16.2.2010 kl. 08:02]

Hannes það er alveg óþarfi að efla atvinnu á Suðurnesjum, þar er nóga atvinnu að fá! Fyrir nokkrum mánuðum síðan var fundur með ríkisstjórninni þar sem fram kom að þau ætluðu að skapa 4400 störf og láta verkin tala. Síðan þá gerir Vinnumálastofnun  ekkert nema að rífa þessa vinnu niður, og senda út tölur sem sýna að í stað þess að fjölga störfum um 4400 hefur sennilega tekist að fækka störfum um 4400. Að vísu hefur orðið fjölgun t.d. hjá fyrirtæki sem sér um að pakka búslóðum þeirra sem eru að flýja land, en við skulum ekkert vera að ræða neitt um það.

Nú tekur þú þetta loforð bara upp og lofar 4400 störfum á Suðurnesjum, þú þarft ekkert að hafa áhyggjur af efndunum, því Samfylkingin getur alltaf hlaupist á brott og kennt samstarfsflokkunum um þegar í óefni er komið.

Þeim sem kvarta undan heilbrigðisþjónustunni á Suðurnesjum, getur þú bent á að VG sér um hana, en sú þjónusta um örugglega batna þegar þjóðin er komin í ESB, eða vð næsta sólmyrkva eða bara eittthvað annað.

[Hannes Friðriksson , 16.2.2010 kl. 10:25]

Blessaður Sigurður: Því miður er það nú ekki svo að hér sé næga atvinnu að hafa eins og þú segir heldur þveröfugt. Þú virðist ef marka má svar þitt vera einn þeirra sem trúir á að hægt sé að kjafta atvinnutækifæri upp eða niður ef marka má tilvitnun þína í Vinnumálastofnun. Sú stofnunn hefur ekki rifið eitt eða neitt niður heldur eingöngu sagt frá stöðunni eins og hún er.

Nú er það náttúrulega ekki ríkistjórnarinnar að skapa störfin, heldur að liðka fyrir þannig að þau geti orðið til, það hefur hún reynt eins og mögulegt hefur verið, m.a með staðfestingu fjárfestingarsamnings við bæði Gagnaver og Álver en vandamálið hjá báðum aðilum  hefur verið fjármögnun framkvæmda til bæði raforkuframleiðslunnar og framkvæmdanna sjálfra. Þar hefu til að mynda Icesave spilað inn í.

En ég held nú samt að mikilvægast fyrir okkur nú sé að horfa á raunveruleikann eins og hann er.Þú segir 4400 störf, Capacent 6500 störf,og ljóst að enginn er að tala um sömu töluna, þessi tala hefur nú frá því að byrjað var að tala um álver hækkað mikið án þess að magn framkvæmda hafi eitthvað aukist, ef litið er til að mynda til þessar skýrslu samtaka atvinnulífsins frá árinu 2007, þar sem einungis er reiknað með 1800 ársverkum á framkvæmdatímanu, eða um 300 á ári þau 6 ár sem áætlað var að framkvæmdin tæki.Eitthvað segir mér að þessi skýrsla sé nær raunveruleikanum, en margt  það sem á eftir hefur komið.

Reiknað var svo með að eftir að álverið hæfi rekstur hefði tekist að skapa hér 400 störf í álverinu og 800 í afleiddum störfum. Það eru 1200 störf alls sem skapast eiga á 6 ára byggingartíma álversisns . Af þessum 1200 störfum er reiknað með að ca 180 þeirra verði á höfuðborgarsvæðinu. Eftir standa þá 1000 störf. Hér á svæðinu eru um það bil 1700 manns atvinnulausir. Reiknað er með að tæplega 200 störf skapist í Gagnaveri. Þannig að þrátt fyrir allt er nú ljós framundan, en ekki sú ofbirta sem skýrsla Capacent gerir ráð fyrir. Þessar tölur miðuðu við að allt gengi smurt, en svo er nú ekki. Er ekki betra að halda sig bara við hlutina eins og þeir eru, í stað þess að kjafta hlutina upp, svipað og með bankanna áður. Við vitum báðir hvernig það fór.

 

[Sigurður Þorsteinsson, 16.2.2010 kl. 12:24]

Hannes minn, þessi 4400 störf var það sem ríkisstjórnin lofaði á fréttamannafundi í sérstöku átaki og því eru þau störf væntanlega komin fram. Þar sem þau eru ekki komin fram hér á höfuðborgarsvæðinu, hljóta þau að vera komin fram á Suðurnesjunum.

Stuttu eftir fréttamannafundinn kom hins vegar sendinefndin frá Bretlandi með glæsilega niðurstöðu, og síðan hefur ríkisstjórnin eytt kröftum sínum í Icesave og ESB, sem þjóðin vill ekkert með hafa.

Störf verða ekki til með því að kjafta þau fram, en það er hægt að fara í ýmiss konar aðgerðir til þess að örva atvinnulífið t.d.  með skattalækkunum, en eins og þú veist var brugðist við með skattahækkunum.

Ef þú spyrð fagmenn að því hvort hægt sé að stuðla að útrýma atvinnuleysi, færð þú að sjálfsögðu jákvætt svar. Þá er að leita þeirra leiða. Við þurfum ekki spunameistara við þurfum fólk sem kann til verka.

[Hannes Friðriksson , 16.2.2010 kl. 13:31]

Blessaður Sigurður, og ég er ekki þinn.

Ætli menn að fjalla um mál, og jafnframt láta taka sig alvarlega er ágætisregla að kynna sér hlutina, ekki halda. Ég held að þú vitir fullvel að þessi störf eru ekki komin fram hér á Suðurnesjum, þó veljir að láta eins og "ljóska" hvað það varðar.

Þetta er alveg rétt hjá þér að mikill tími hefur farið í Icesave, tíma sem kannski hefði verið betur eytt í annað. Af því eigum við vonandi eftir að læra.

Það gat sem hrun bankanna hafði í för með sér skildi eftir stórt gat, sem þarf að brúa, og það er einungis hægt að gera með annarsvegar niðurskurði, og hinsvegar skattahækkunum. Spurning hvort þú hefðir viljað að það yrði einungis gert með niðurskurði, og hvernig heldur þú að þjóðfélag okkar liti út í dag. þá væru sennilega hvorki skólar, né heilbrigðiskerfi til staðar.

Auðvitað er hægt að útryma atvinnuleysi, en til þess að það sé unnt þarf bæði samstöðu til og vott af skynsemi. Ég held þú ættir að reyna að tileinka þér örlítið af hvorutveggja.

kv Hannes

[Sigurður Þorsteinsson, 16.2.2010 kl. 16:06]

Heill og sæll Hannes. Nú verð ég að viðurkenna að hvað nákvæmlega hefur verið gert í atvinnumálum á Suðurnesjum veit ég ekki. Hins vegar veit ég að ríkisstjórnin hélt blaðamannafund í haust og lofaði störfum fyrir 4400 manns. Ekki hafa þessi störf komið hingað á höfuðborgarsvæðið, þannig að ef eitthvað var að marka þetta lið hefði verið líklegast að mesta áherslu yrði á uppbyggingu þar sem ástandið væri verst. Nú tjáir þú mér að blaðamannafundurinn hafi varið bara verið haldinn til þess að blekkja þjóðina. Þetta voru þá bara lygalaupar. Nei Hannes þú ert ekki í mínu liði, þú ert í þeira liði, og hverju að lofa Suðurnesjamönnum fyrir kosningarnar í vor?

Einhverjir úr Samfylkingunni vilja álver í Helguvík, en VG er algjörlega á móti. Allir úr Samfylkingunni vilja í ESB, en engir aðrir. Allir í Samfylkingunni auk kommúnistanna úr VG, sem er nú nánast orðið sama liðið vildi samþykkja Icesave, en engir aðrir. Nú viðurkennir Jóhanna að það hefði verið betra að senda hæfa samningsmenn til Bretlands, og lesa samninginn áður en hún og fylgilið hennar samþykktu hann. VG segir Samfylkinguna vera óhæfa og Samfylkingin segir VG vera óhæfa. Báðir hafa talsvert til síns máls.

Hvað þú ætlar að fara fram með á Suðurnesjum er mér hulin ráðgáta. Hafi það verið eitthvað vitrænt hefur þú farið afar sparlega með það hér á netinu. Auðvitað gætir þú staðið á öðrum fæti og klipið í nefið á þér á sama tíma. Það væru þá hámarkskröfur sem til þín væru gerðar.  

[Hannes Friðriksson , 16.2.2010 kl. 17:01]

Blessaður Sigurður

Nú er það eitt sem ég skil ekki alveg? Það er hvers vegna þú velur að commenta á skrif um atvinnumál á Suðurnesjum, þegar þú svo segir sjálfur að þú vitir lítið um þau!!

Hitt sem þú heldur svo áfram með finnst mér nú vera frekar erfitt að tengja saman, en fæ það helst út að þú sért í raun bara á móti þeirri ríkistjórn sem nú situr. Þar get ég nú því miður lítið hjálpað þér, og tel einhvern veginn eðlilegra að þú eigir það við sjálfan þig,

Hvað varðar þau mál sem ég hyggst beita mér fyrir hér í Reykjanesbæ eru það fyrst og fremst breytitngar í þeirri stjórnsýlslu sem stundur hefur verið hér undanfarin 8. ár og svo auðvitað atvinnumálin. Ég tel það hinsvegar ekki vera hlutverk þeirra sem óska eftir þáttöku í sveitarstjórnarmálum að sanna það að maður geti „staðið á öðrum fæti og klipið í nefið á sér“þó þér og skoðanabræðrum þinum þyki það mikil kostur. Þar greinir okkur á. Ég held nú Sigurður í ljósi hvert þessi umræða er að þróast  ( ef umræðu skyldi kalla ) að best væri nú að láta staðar numið hér.

Með kveðju Hannes