Niðurskurður lög og tollgæslu á Suðurnesjum

Undanfarna daga hafa okkur borist fréttir af að nú skuli skera niður fjárveitingar til Lögreglustjóraembættisins á Suðurnesjum. Menn eru ekki sammála um hvort heldur hér sé um að ræða niðurskurð eða leiðréttingu.en í raun skiptir það ekki máli,því hvort heldur það er verður niðurstaðan sú sama. Lélegri þjónusta bæði hvað varðar lögregu og tollaeftirlit.

 Það er ljóst að Keflavíkurflugvöllur er hlið utanaðkomandi inn í landið og jafnframt hlið inn á Schengensvæðið. Þarna fer fram öflugt eftirlit með t.d  innflutningi fikniefna til landsins auk vegabréfaeftirlits og árangur af því starfi verið góður. Ef menn velja að láta þessar niðurskurðstillögur ganga í gegn er ljóst að þar með er miklu starfi og uppbyggingu kastað á glæ. Það viljum við ekki láta gerast.

 Það er ljóst að niðurskurður sem þessi kemur t.d til með að hafa áhrif á frekari uppbyggingu vallasvæðisins, þar sem aðilum í flugþjónustu verður ekki gert kleift að nýta þær byggingar sem þar losnuðu, vegna þess að ekki verður hægt að halda uppi eðlilegri toll og löggæslu vegna kostnaðar. Það er líka ljóst að á sama tíma og íbúum á Suðurnesjum hefur fækkað um ca. 15% undanfarin ár og stöðugt aukin umferð um Keflavíkurflugvöll að þá er það ekki rökrétt niðurstaða að draga úr lög og tollgæslu. Heldur ber að auka hana.

Það er ekki upplifun okkar íbúanna hér á Suðurnesjum að embætti Lögreglustjórans á Suðurnejsum hafi verið að bruðla með fé. heldur þvert á móti. Sýnileg löggæsla er hér í algeru lágmarki, enda sama þróun verið hér í gangi og víðast hvar um landið lögreglumönnum fækkað. Ekki er hægt að segja að bruðlað hafi verið í húsnæðismálum eins og best sést á að stór hluti starfsemi embættisins fer fram í gámum sem staðsettir eru rétt við Reykjanesbrautina, og óhætt er að segja að útlendingum begður í brún þegar maður segir þeim hvaða starfsemi fer þarna fram.

Það verður að segjast eins og er að eitthvað virðast áherslur þeirra er með völdin fara, ekki vera í takt við þarfir þeirra er greiða þeim launin. Þannig getur maður sagt að það er skrýtin áhersla að á sama tíma og við skerum niður löggæsluna, þá hika alþingismenn okkar ekki við að skammta sjálfum sé aðstoðarmenn sem koma til með að kosta skattborgarana fúlgur fjár . Hvað eiga þeir aðstoðarmenn að gera? Bursta fyrir þá skóna, á meðan þeir eru annað hvort í jóla, páska. eða sumarleyfi? Nei ég held að þeim peningum sé betur varið til þess að t.d efla löggæslu og tollgæslu því ljóst er að í báðum þessum málaflokkum eru fjárveitingarnar háðar því hvað menn vildu að hlutirnir kostuðu frekar en hvað þeir kosta. Það er miklu heillavænlegra að reyna að tryggja að lög og tollgæsla séu í lagi frekar en að eyða peningum skattborgarana upp á von og óvon um að komast t.d í öryggiráð Sameinuðu þjóðannna, 500 milljónir, þar sem fulltrúar okkar koma til með að rétta hendur upp í loft, í ullarvettlingum, allt eftir afstöðu valdhafa hverju sinni. það er mín skoðun

Athugasemdir

[HrJAK, 13.3.2008 kl. 19:39]

Samsærisraddirnar segja að þessi niðurskurðarákvörðun Björns Bjarna sé til kominn vegna stirðleika milli Jóhanns lögreglustjóra og Haralds ríkislögreglustjóra sem bíði aðeins þess að Jóhann gefist upp og segi stöðu sinni lausri svo hann geti komið sínum manni, eða konu, að en þá opnist budda dómsmála aftur og allt falli í ljúfa löð. Vongóði starfsmaðurinn hjá Haraldi er meira að segja sagður búsettur í Reykjanesbæ. Samkvæmt samsæriskenningamönnum þá hefur Haraldi fundist Jóhann allt of metnaðargjarn og með "eigin" hugmyndir í ofanálag í stað þess að bíða frumkvæðis Haraldar.

Þá finnst mér athyglisverð og aðdáunarvert hve þétt lögreglu- og tollgæzlumenn standa við bak yfirmanns síns en það er alls ekki algengt innan löggæslunnar í dag. Kannski er það vegna að þeir eru að sjá árangur af störfum sínum og svíður að hugsa til þess að "fjárhagsvandi dómsmálaráðuneytisins" færi þá aftur á steinöldina sem embættið á Keflavíkurflugvelli var á þegar Þorgeir "embættið það er ég!" Þorsteinsson hætti fyrir aldurs sakir fyrir nokkrum árum síðan.

Annars er aðalspurningin hvað Suðurnesjamönnum finnst um frammistöðu lögreglu og tolls síðan sameining embættanna "að ofan og neðan" átti sér stað? Telja Suðurnesjamenn að svigrúm sé til að fækka í þessum stéttum og minnka bæði eftirlits- og úrvinnslugetu löggæslunnar.

[Hannes Friðriksson , 14.3.2008 kl. 14:01]

þetta sýnir nú kannski hvað einfaldur ég er þegar kemur að svona samsæriskenningum. Þetta datt mér aldrei í hug. Ég hélt og vel að halda áfram að halda að mál þetta sé til komið vegna fjárhagserfiðleika embættisins og því að menn hafi áhyggjur af þvi hvert stefni. Ég ætla mér ekki þá dul að fara að setja mig inn í svona samsæriskenningar.

En úr því að þú dregur fram persónu í kenninguna sem búsett er hér í Reykjanesbæ og vel vitandi að hún er mér kunnug að góðu einu, þá tel ég rétt að menn skulu ekki dæma annað fólk, út frá störfum annara. Það er ekki reynsla mín af þessari persónu að líta svo á að hún sé sá nafli alheims sem allt skuli snúast um, heldur þvert á móti.

Hitt er svo annað mál með menn eins og mig sem ekki ná að sjá langt út fyrir vegginn og stunda meira svona það sem hægt er að kartöflugarðapólitík,og hugsa helst um hag heimabyggðar, að ef menn eru í einhverjum slíkum hugleiðingum að skipta um yfirmenn þá sé alls ekki galinn hugmynd að sá sem taki við sé búsettur hér á Suðurnesjum. það held ég sé bara kostur, að því leyti að þá er viðkomandi með púlsinn á nærsamfélaginu og tilbúnari kannski að berjast fyrir þörfum þess, sem ég þó tel að núverandi lögreglustjóri hafi reynt að bestu getu.