Eru bæjarráðsmenn Reykjanesbæjar leikarar í revíu?

Ég verð að segja að ég varð fyrir miklum vonbrigðum þegar ég opnaði tölvuna mína í kvöld og fór inn á heimasíðu Reykjanesbæjar og sá meirihluti bæjarráðs hafði samþykkt fyrir hönd okkar bæjarbúa afar umdeilda tillögu um heimild til fasteignafélagsins Fasteign að skipta því félagi upp í A og B hluta.  

Breytingin gengur út á að skipta hlutafé félagsins í tvo flokka og skrá félagið í opinberri skráningu á markað. Sveitarfélögunum í EFF er ætlað að vera með svokölluð A-hlutabréf sem eru ekki markaðsvara og því ætlað að undirrita yfirlýsingu um afsal á þeim óinnleysta hagnaði sem orðið hefur með aðild Reykjanesbæjar að fyrirtækinu.  Hins vegar er augljóst að breytingin kemur þeim aðilum mjög til góða sem hyggjast skrá hlutabréf sín í EFF sem B-hlutabréf og setja þau á markað

Ljóst er að endurskoðandi bæjarins telur meirihlutann ekki vera á réttri leið hvað varðar þetta mál eins og kemur augljóslega fram í bókun minnihlutans þar sem þeir vitna til álits endurskoðandans Guðmundar Kjartanssonar dags. 10.12.2007, en þar segir m.a.:

“Upphaflega var það einn af kostum þess að ganga í EFF að sveitarfélagið hagnaðist af hækkun hlutabréfanna í EFF en ákvæði í fyrirhugaðri yfirlýsingu skerða þann hagnað.”

og hann heldur áfram  “Undirritaður bendir á að ef vilji er til að afsala hagnaði til EFF sé rétt að skilgreina þann útreikning betur”

Í bókun meirihlutans segir á móti  "Farið hefur verið yfir álit endurskoðanda frá 10.12.´07 og fullt tillit er tekið til þeirra sjónarmiða sem þar koma fram.  Þetta segja þeir þó án þess að vísa í að einhverjar breytingar hafi orðið á heimildinni.  Þetta finnst mér vera svipað og að segja við endurskoðandann já já, en við ætlum nú samt að hafa þetta svona og það erum við sem ráðum.

Það verður að segjast að maður getur hreint ekki verið viss um hvaða hagsmuni háttvirtir bæjarráðsmenn eru að gæta í þessu tilfelli.  Enda kemur fram seinna í bókun þeirra að þeir virðast hafa mestar áhyggjur hvort Glitnir fái einhverja umbun fyrir undirbúningsvinnu sína en þeir munu fá 200 milljónir fyrir vinnu sína ef breytingin nær fram að ganga.  Þar segir  "Glitnir fær ekkert fyrir undirbúningsvinnu sína ef engin breyting verður á umfangi félagsins." Hverslags vælukjóagangur er þetta?

Maður verður að segja eftir þau mistök sem bæjarstjórnarmeirihlutinn gerði í málefnum Hitaveitu Suðurnesja hefðu menn lært eitthvað.  Og tekið svona mál og litið á þau gagnrýnum augum og spurt sig hvort þetta væri nú örugglega réttur gjörningur.  Sérstaklega í ljósi þess að endurskoðandi bæjarins var búinn að kveikja á gulu ljósi, þannig að menn gætu að minnsta kosti athugað stöðuna.

Það sem er kannski mest dapurt í þessu máli að bæjarráðið hefur í dag misst mikið af því trausti sem til þess er borið og óhætt að segja að það sé orðið að einhverskonar afgreiðslustofnun fyrir utanaðkomandi aðila sem koma sínum málum þar í gegn athugasemdalaust.  Hvað veldur væri gaman að vita?

Nei, nú verða bæjarstjórnarmenn meirihlutans að hrista af revíuhlutverkið sem þeir hafa verið fastir í undanfarin ár og byrja að hafa skoðanir og vinna með hag bæjarbúa að leiðarljósi, því annars kann illa að fara.  Ég skora á þá bæjaráðsmenn meirihlutans að koma með vel rökstudda greinargerð fyrir þessum gjörningi þar sem fram kemur í tölum hvernig þetta þjónar hagsmunum bæjarbúa.  Takist þeim að sannfæra mig mun ég fúslega draga allt það til baka sem sagt er í þessari grein.  Því ég hef ekkert á móti Fasteign, en tel þó að við verðum að gæta hagsmuna bæjarbúa í því sambandi. Því það eru þeir sem borga brúsann.