Hvað þora menn ekki að ræða?

Ég skrifaði hér fyrir helgi blogg þar sem ég ræddi ákvörðun bæjarstjórnarfulltrúa Sjálfstæðisflokksins hér í Reykjanesbæ um málefni eingarhaldsfélagsins Fasteigna. Það var ekki að ástæðulausu.  Á skömmum tíma hafa hér verið teknar tvær ákvarðanir sem erfitt er fyrir hinn venjulega flokksmann að skilja, og hvað þá að eitthvað af þessum ákvörðunum hafi verið ræddar eða kynntar í stofnunum flokksins.  Hér er ég að tala um mjög umdeilda bókun bæjarstjórnarmeirihlutans í málefnum Hitaveitu Suðurnesja, þar sem þeir bókuðu að þeir hefðu hafið einkavæðingu Hitaveitu Suðurnesja,og tóku sér stöðu með Geysi Green Energy á móti þeim sveitarfélögum sem byggðu upp HS ásamt Reykjanesbæ. Allir sjá til hvers sú ákvörðun hefur leitt.

Nú síðast er það mál eignarhaldsfélagsins Fasteignar, sem er í raun dæmi um hvernig hægt er að taka ákvörðun án þess að umræða nái að fara fram. Mál þetta er búið að vera á borði bæjarstjórnar og bæjarráðs að ég held frá því í nóvember. Umræðu í bæjarstjórn og bæjarráði hefur verið frestað æ ofan í æ og ákvörðun tekin aðeins fimm dögum fyrir endanlega afgreiðslu á aðalfundi EFF.  Þetta gerir meirihlutinn þrátt fyrir óvenju sterkan meirihluta í bæði bæjarráði og bæjarstjórn. Hvað þora menn ekki að ræða ? Mál þetta er tillaga frá stjórn EFF um að skipta félaginu upp í A og B hluta. Endurskoðandi bæjarins skv. því sem fundargerð bæjarráðs segir, vill meina að með þessari gjörð sé bærinn að afsala sér réttindum og hagnaði án þess að nokkuð komi í staðinn.

Það sem er raunar það merkilegasta í þessu máli er að nú í ár hefði átt að fara fram umræða um hvort hagur Reykjanesbæjar væri vel borgið með áframhaldandi veru í þessu fasteignafélagi. Sú umræða hefur ekki farið fram og skrýtið að bæjarstjórnarfulltrúarnir velji að samþykkja þessa breytingu án þess að taka þá umræðu fyrst. Meirihlutinn vill greinilega meina að mikilvægara sé að samþykkja þetta erindi stjórnar EFF athugasemdarlaust, þrátt fyrir aðvaranir endurskoðandans, frekar en að athuga hvort áframhaldandi vera tryggi hag bæjarbúa til framtíðar.

Nú hef ég rætt við nokkra aðila sem unnu mikið og óeigingjarnt starf fyrir flokkinn við síðustu bæjarstjórnarkosningar, og margir eru sárir út í bæjarfulltrúanna vegna þessara ákvarðana.  Það er ljóst og viðurkennt í okkar augum að bæjarfulltrúarnir eru kjörnir til þess að taka ýmsar erfiðar ákvarðanir. Enginn hafði þá reiknað með að fá eða enginn mál væru lögð undir stofnanir flokksins. Nú er svo komið fyrir mörg okkar, að erfitt er orðið að halda uppi vörnum hvað varðar þessi mál. Ekki koma neinar upplýsingar eða rökstuðningur fyrir þessum gjörðum. Það er lágmarks kurteisi sem bæjarstjórnarmenn gætu sýnt þeim er unnið hafa að kjöri þeirra, að minnsta kosti ræða málin innan flokksins áður en endanlegar ákvarðanir eru teknar þótt þeir ákveði að hlusta ekki. Það heitir lýðræði.

Athugasemdir

[Thelma Björk (IP-tala skráð) 31.3.2008 kl. 21:23]

...ég kann vel að meta lýðræði en einhvernveginn hefur mér ekki alltaf hafa haft þá virkni sem þetta frábæra fyrirbæri getur haft. Allt of fáir (stundum fáar en sjaldnar þó þar sem við búum í karlsniðnu samfélagi jafnvel þó konur búi við jafnan rétt) ráða of miklu og hlusta of sjaldan á íbúanna. 

[Hannes Friðriksson , 31.3.2008 kl. 22:24]

Sæl Thelma

Þett er því miður alveg rétt hjá þér, auðvitað eigum við að vera fyrir löngu búinn að læra hve lýðræðið getur virkað vel,ef vel er á haldið. Við hljótum einhvern tíma í framtíðinni að ná þeim þroska að geta hlustað hvert á annað án tillits hvort menn eru í minni eða meirihluta, karlar eða konur. Ég held að það sé engu lýðræði gott að upp komi sterkir  leiðtogar sem telji sig ekki þurfa að hlusta á  eða spyrja hver vilji fólksins er.

                                                 Kærar kveðjur

                                                     Hannes