Hvert á að fara í fríinu?

    

Ríkisstjórnin hélt fund í gær. Flestir hefðu nú haldið að hugsanlega myndu þeir nú kannski ræða þá stöðu sem nú er uppi í heilbrigðismálum þjóðarinnar.  Ef marka má frétt í Fréttablaðinu í dag. kemur fram að málið hafi ekki verið rætt. Menn kannski meira verið að tala um hvernig hafi verið í fríinu eða hvert fara á í fríinu.

Aðspurðir kasta bæði fjármálaráðherra og heilbrigðisráðherra þessum málum frá sér, ýmist á samningarnefnd ríkisins sem sjá á um þessi mál eða á félagsmálaráðherrann, sem redda á málinu í haust. En þá verða að minnsta kosti ljósmæðurnar allar hættar og farnar.

Gallinn er að hvorki fjármálaráðherra né heilbrigðisráðherra geta skautað svona auðveldlega framhjá málinu eins og þeir reyna þarna að gera. Formaður samningarnefndar ríkisins sagði í viðtali við Ríkisútvarpið í sex fréttum fyrir aðeins tveim dögum síðan að þetta vandamál lægi ekki hjá samninganefndinni , þar sem í þeirra verkferli væri nú þegar gert ráð fyrir því námi sem bæði ljósmæður og hjúkrunarfræðingar hefðu lagt á sig. Það væru forstöðumenn stofnanna sem umbuna ættu þeim frekar í stofnannasamningum á hverjum stað.

Maður veltir óneitanlega fyrir sér hvort hér séu allir að vinna vinnuna sína. Sé þetta rétt  hjá formanni samninganefndarinnar, þá liggur lausn vandamálsins úti í stofnunum sjálfum. Þá er það spurningin sem ég velti fyrir mér og er ekki með alveg á hreinu hvort  gert sé  ráð fyrir þessu þegar fjárlögin eru saminn?  Maður getur ekki betur séð ef fylgst er með fréttum að flestar sjúkrastofnanir eigi fullt í fangi með að halda rekstri sínum gangandi fyrir það fé sem þeir nú þegar hafa til ráðstöfunar.

Fjárlög hverrar stofnunar er á ábyrgð viðkomandi ráðherra  er stofnunin heyrir undir. Það er á hans ábyrgð að hverri stofnun sé tryggð nægileg upphæð til að sinna því hlutverki  sem henni er ætlað. Það  hefur ekki vafist fyrir einkavæðingarsinnanum heilbrigðisráðherra að tryggja framlög til þeirra verkefna sem hann hefur sett í einkarekstur að undanförnu, og nægir þar að nefna öldrunardeild á Landakoti, og framlög til hvíldarinnlagnadeildar heilsuverndarstöðvarinnar. En virðist eitthvað standa í honum að leggja fram sama fjármagn  til t.d  Droplaugastaða, þar sem eina lausnin virðist nú vera að einkvæða til að fá nægilegt fjármagn til rekstrarins. Átti ekki einkavæðingar/einkarekstrar stefnan að vera til að hagræða í rekstri og lækka kostnaðinn?Á nú að svelta allt heilbrigðiskerfið í einkavæðingu/einkarekstur, sem svo dæmin sanna að verður bara dýrara í rekstri á eftir?

Nei  rekstur heilbrigðiskerfis landsmanna er á ábyrgð heilbrigðisráðherra og fjármálaráðherra í sameiningu, en ekki samningarnefndar ríkisins eða forstöðumanna  stofnanna . Þeirra hlutverk er að reka þær stofnannir, og halda sig innan þess ramma  sem þeim er skammtaður. Það er ríkisins að tryggja að sá rammi sé raunhæfur.

 

Athugasemdir

[Guðbjörn Guðbjörnsson, 2.7.2008 kl. 20:44]

Sæll kæri vinur

Ég skil alveg hvað þú ert að fara og hef fulla samúð með ljósmæðrum og hafði það og hef með hjúkrunarfræðingum, grunnskólakennurum og öllum opinberum stéttum.

Ég veit að rök ljósmæðra eru líka rétt. Ég náði, sem betur fer, að leiðrétta stórt launamisrétti í síðustu samningum  hjá mínu stéttarfélagi. Ef þú myndir spyrja mig, hvort ég treysti mér í þann slag núna, yrði ég að svara því harðneitandi.

Ég spyr: hvað með sjúkraliðana, hvað með allar konurnar hjá SFR, hvað með grunnskólakennarana og hvað með konur almenn innan margra stéttarfélaga. Allt þetta fólk er að sætta sig við 20.000 kr. hækkun á meðan þau áttu auðvitað "rétt" á miklu meiri hækkun.

Það var búið að sýna fram á a.m.k. 20% launamun hjá fólki á almenna markaðnum og hjá hinu opinbera. Þessi launamunur verður ekki leiðréttur á meðan ástandið er svona og það gildir einnig fyrir ljósmæður - því miður!

Líkt og aðrar stéttir eig ljósmæður að semja til 8-9 mánaða og taka málin upp þá ef ástandið hefur skánað, sem ég hef fulla trú á að verði. Það verður allt vitlaust ef þær fá meira en aðrir, það get ég fullvissað þig um.

[Hannes Friðriksson , 2.7.2008 kl. 22:38]

Blessaður Guðbjörn

Skil hvað þú ert að fara, en ég tel ekki að allt verði vitlaust þótt við leiðréttum kjör svonefndra kvennastétta núna. Þar yrði tekið spor sem ég tel að flestir hefðu skilning á. Ekki varð allt vitlaust þótt flugumferðarstjórar fengju meria núna um daginn. Eins og ég sagði þá telur formaður samningarnefndar ríkisins að gert sé ráð fyrir í þeirra verkreglum að allir sitji við sama borð hvað varðar samningana, en vísaði þessu vandamáli áfram á forstöðumenn stofnanna í stofnanasamningum. þá er það ríkisvaldsins að sjá til þess að það fjármagn sem deilt er út nægi til að leiðrétta þetta. Það hefði t.d verið hægt að gera það við gerð síðustu fjárlaga. En eins og þú veist kannski manna best, þá er varla gert ráð fyrir að hægt sé að sinna daglegum þörfum stofnanna fyrir þau framlög, hvað þá að leiðrétta slíkt óréttlæti , sem vigengst gagnvart þessum séttum. Nú hafa ljósmæðurnar sagt upp og því er það tíminn nú sem gildir en ekki eftir 8-9 mánuði. þá verður þetta of seint.