Yes mister Minister!

 

 

Nú liggur fyrir að Heilbrigðisstofnun Suðurnesja (HSS) verður að draga saman seglin. Forstjóri heilbrigðisstofnunarinnar sendi út tilkynningu til íbúa svæðisins þar að lútandi síðastliðinn föstudag. Hún sendi einnig góðan rökstuðning fyrir hversvegna þessar sparnaðaraðgerðir og niðurskurður á þjónustu er nauðsynlegur.Sá rökstuðningur kom okkur íbúum svæðisins á óvart.

 

Í þeim rökstuðningi kom fram að framlög til heilbrigðismála á Suðurnesjum eru hinn allra lægstu miðað við íbúafjölda á landinu öllu og ennþá hefur hvorki heilbrigðisráðuneytið eða aðrir sem að málinu koma borið á móti að þar sé rétt með farið. Bæjarstjóri okkar hér í Reykjanesbæ tekur nú í kvöld í Morgunblaðinu undir með stjórnendum HSS að þessi mismunun sé óásættanleg, undrast hægagang kerfisins við að leiðrétta þennan mismun.Það geta allir íbúar Suðurnesja tekið undir.

 

Það sem veldur mér þó mestum áhyggjum er hin hrokafulla yfirlýsing blaðafulltrúa Heilbrigðisráðuneytisins, sem á sama tíma og blöð og  fréttastofur landsins ná ekki í hæstvirtan heibrigðisráðherra sökum þess að hann  virðist staddur utan þjónustusvæðis símans, þá sendir blaðafulltrúinn  út fréttatilkynningu í nafni ráðuneytisins um þetta mál. Þar leggur embættismaðurinn áherslu sína (ekki ráðherrans) á að þetta mál verði ekki leyst  í fjölmiðlunum.

 

Auðvitað minnir þetta mann skemmtilega á gamanþætti sem hér voru í sjónvarpinu fyri nokkrum árum, og fjölluðu um hvernig embættismennirnir fóru sínu fram hver svo sem afstaða ráðherrans var eða er

 

Nú er það svo (blaðafulltrúanum til upplýsingar) að sennilega hefur enginn gert ráð fyrir að mál þetta yrði leyst í fjölmiðlum, og hversvegna hann dregur þennan punkt fram er með öllu óskiljanlegt. Nema hann sé að senda einhver skilaboð um að þetta sé ekki mál sem komi íbúum á Suðurnesjum við heldur sé þetta eingöngu úrlausnarefni ráðuneytisins.

Það er það ekki.

 

Nú er það svo og það verða menn að átta sig á að það var skylda stjórnenda HSS að tilkynna okkur íbúum með fyrirvara að frá og með 16. júlí verðum  við ef við verðum veik utan dagvinnutíma  að sækja okkar þjónustu til Reykjavíkur. HSS getur, því miður ekki lengur sökum fjárskorts, veitt okkur sömu lögbundnu þjónustu og öðrum þegnum þessa lands.

 

Blaðafulltrúanum þarf alls ekki að koma á óvart að íbúar svæðisins skuli láta í ljós vandlætingu sína á þeirri óásættanlegu mismunun sem þarna kemur fram. Hinsvegar er sennilega öllum íbúum á Suðurnesjum nokkuð sama um hvor lausnin finnist á öldum fjölmiðlanna eða landsmóti hestmanna á Hellu, eða þessvegna í reykfylltu bakherbergi einhverstaðar í Reykjavík . Það eina sem við gerum kröfu um er að lausnin finnist.

 

Og við munum ekki sætta okkur við annað en að sitja við sama borð og aðrir landsmenn.

 

Athugasemdir

[Eyjólfur Eysteinsson (IP-tala skráð) 6.7.2008 kl. 11:10]

Gott hjá þér Hannes að beina athyglinni að stöðu sjíkrahússins en það er ekki nýtt að okkur á Suðurnesjum hefur í gegnum árin verið mismunað og ekki fengið það fjármagn sem aðrir hafa fengið til heilbrigðismála og má líka nefna öldrunarmála, til þess að halda uppi lágmarks þjónustu við sjúka og aldraða . Það er tími til kominn að grípa til aðgerða og er vel að stjórnendur HSS veki athygli á stöðunni með því að segja hingað en ekki lengra og draga úr þjónustunni á áberandi hátt enda nauðugur einn kosturinn.

Það sem er nýtt í málinu er að meirihluti Bæjarstjórnar með Árna Sigfússon bæjarstjóra í forustu virðist hafa vaknað af værum blundi og ætlar núna að bjarga málunum.

Betra er seint en aldrei.

En það eru ráðherrar og alþingismann sem ráða fjárveitingum til okkar og þess vegna verðum við að sækja málið til alþingismanna Suðurkjördæmis og það vill nú svo vel til að fyrsti þingmaður kjördæmisins er fjármálaráðherra og ættu því að vera hæg heimatökin.

Tek að lokum undir að við munum ekki sætta okkur við annað en að sitja við sama borð og aðrir landsmenn.

Með bestu kveðjum Eyjólfur Eysteinsson