Eru flokkarnir verkfæri sumra?

 

Eg hef verið að velta fyrir mér síðustu daga þeirri umræðu sem fram hefur farið um dugleysi stjórnmálamanna, og hvernig við almenningur virðumst hafa misst tiltrú  til þeirra. Við viljum að hið Nýja Ísland verði til hér og nú.

 

Það er fullt af hlutum sem við sættum okkur ekki við, og böðlumst á þeim er við kusum í síðustu kosningum fyrir að standa sig ekki  í stykkinu og bætum við á eftir að við hyggjumst ekki kjósa í næstu kosningum, hvenær sem þær nú verða.

Okkur finnst margt skrýtið vera á ferðinni sem við eigum í ljósi reynslunnar erfitt með að sætta okkur við og finnst eins og lítið hafi breyst. Sömu menn og áður stjórna því sem þeir vilja stjórna og sitja á upplýsingum sem hugsanlega gætu varpað einhverju ljósi á málin.

Fjármáleftirlitið sem hafa átti eftirlit með bönkunum situr á skýrslu endurskoðandana og forstjóri þess kemur fram í fréttum eins og hver annar annar útrásarvíkingur og tilkynnir að þær verði ekki gerðar opinberar. Hvað þar er að finna sem við þau er borgum fyrir sukkið megum ekki vita get ég ekki ímyndað mér.

Heilbrigðisráðherra virðist vera á leið með að gerbylta  heilbrigðiskerfinu á mettíma, að því er virðist án þess að ráðfæra  sig við nokkurn mann, og ljóst að mikil leynd hefur hvílt yfir ráðstöfunum þeim er hann tilkynnti í fjölmiðlum í dag. Svo mikil að heilbrigðisnefnd þingsins hefur virðist ekki einu sinni hafa verið höfð með í ráðum. Þar virðist hafa verið vélað í skjóli myrkurs.

Svona gæti maður náttúrulega haldið áfram að tuða um ýmis mál er manni hugnast ekki, og bætt við í lokin að þetta væri barbaralýðveldi og hér sé engu hægt að breyta, hið Nýja Ísland eigi aldrei eftir að líta dagsins ljós. Sama hvað við mótmælum  Auðvitað eigum við að mótmæla og láta í okkur heyra þannig að þeir sem heyra eigi fái að lokum hlustaverk.

Það er eitt að mótmæla og þannig láta í ljós álit sitt, og annað að ná fram þeim breytingum sem við óskum eftir. Nú virðist flokkaflóra okkar íslendinga spanna stórt svið og flestir geta fundið sér hljómgrunn í einhverjum þeirra. Svar okkar almennings felst í að taka  þátt í því starfi sem fram fer þar og berjast fyrir þann málstað er við getum samsvarað okkur við. Til þess að ná fram þeim breytingum sem við viljum verðum við að taka þátt í því starfi sem þar fer fram.

Flokkarnir eru ekki verkfæri sumra til að ná sínum markmiðum á kostnað annara nema við leyfum að svo sé. Það leyfum við með afskiptaleysi af því starfi sem fram fer innan flokkana á milli kosninga. Það er hið daglega starf flokkana og þær hugmyndir sem þá eru ræddar sem skipta máli. Það er á ábyrgð borgaranna að veita þeim það aðhald sem nauðsynlegt er. Það er ekki nóg á fjögurra ár fresti, það þarf að vera stöðugt. Annars er hætta á að einhverjir líti á flokkana sem sitt eigið verkfæri. Og hið Nýja Ísland sem okkur dreymir um verður eingöngu nafnið með sömu gildum og áður réðu.

 

Athugasemdir

[Ævar Rafn Kjartansson, 7.1.2009 kl. 23:45]

Þetta er mesta hættan, að nýja Ísland verði nk. kennitöluskipti með sömu flokkseigendum. En við látum það ekki viðgangast. Það eiga bara sumir eftir að skilja það.

[Jóhann S Kristbergsson, 8.1.2009 kl. 17:34]

Sæll.

Ég ætla að taka undir flest ef ekki allt í þessari grein en núna er ég hvað mest hugsi yfir þessu spendýri sem stjórnar heilbrigðisráðneyti, á maður virkilega að trúa því að hann sé í einhvers konar sóló leik með þetta mál því það er með ólíkindum hvernig þetta fer fram bæði með eldflaugarhraða og þvílíkri leynd að maður dettur helst í hug að með þessu gæti hann einkavætt þetta og hrósað sér síðan fyrir.  Þetta spendýr er ekki í fyrirmyndahóp mínum frekar en fleirri eikavæðingasinnar. Er kannski komin tími til að bylta þessum  stjórnmálum?  En þá vaknar bara spurninginn eru hinir eitthvað skárri?