Þeir eru sammála vorir norrænu frændur.

 

Uffe Ellemann Jensen hinn danski framsóknarmaður fór vítt yfir sviðið í samtali sínu við Boga Ágústsson á RÚV í gærkvöldi.Hann eins og Göran Person hvatti Íslendinga til að gerast aðila að ESB, ekki vegna þess hvað við fengjum heldur vegna þess samstarfs sem um er að ræða. Að standa saman með öðrum þjóðum Evrópu um sameigilega hagsmuni.

Hann benti mönnum að tímarnir væru breyttir og sjálfstæði þjóða fælist ekki fyrst og fremst í hverju þau hefðu yfirráð yfir í orði , heldur á hvað þau gætu haft áhrif á í samstarfi. Sjálftæði í til að mynda peningamálum fælist ekki í hvort viðkomandi þjóð gæti ákveðið hverjir vextirnir skyldu vera á hverjum tíma , þeir ákvörðust af mörkuðum á hverjum tíma hvort sem mönnum líkaði betur eða verr.

Það virðist vera ljóst af þeirri Evrópuumræðu sem nú á sér stað að einn helsti ásteitingarsteinninn sé ekki hvað komi út úr aðildarviðræðunum, heldur hvort þær eigi að fara fram. Þeir sem "allt vita" segja okkur að ekki sé þörf á neinum aðildarviðræðum það það geti þeir sagt okkur og það sé ekki nein ástæða til þess að fá staðfest að það sem þeir segi sé nú rétt. Og vilji menn fá það staðfest skuli kosið um hvort spurt sé.

Umræðan virðist snúast meira um aukaatriði og alhæfingar þeirra sem á móti aðild eru, og byggjast á því sem þeir halda, frekar en að fá staðreyndirnar upp á borðið með aðildarviðræðum. Hvort verið geti að slík aðild geti bætt þau lífskjör sem almenningur á Íslandi býr við í nánustu framtíð. Hver er hagur þeirra sem á móti slíkum viðræðum eru  skil ég ekki.

Ljóst er það eru sjávarútvegsmálin og landbúnaðarstefnan sem þeir sem mest eru á móti umræðum setja fyrir sig. Menn telja sig vita að með aðild að ESB sé verið að afhenda til að mynda spönskum sjómönnum réttinn til að ryksuga hér upp fiskimiðin eins og gert var til að mynda hjá Bretum og fleirum hér á árum áður. Að kvótinn fari úr landi. Manni liggur við að segja "og hvað með það".

Flestir eru sammála um að sú fiskverndarstefna sem ESB hefur er ekki góð, en það þýðir þó ekki það sama og að hún veiti einhvern rétt til veiða á í islenskri lögsögu. ESB á í dag eingöngu rétt á að veiða þrjú þúsund tonn af karfa samkvæmt samningum Íslands og ESB. Frekari kvótaúthlutanir byggjast á sögulegri veiðireynslu , og ríki ESB hafa ekki veiðreynslu í íslenskri lögsögu undanfarin 35 ár svo erfitt er að sjá hversvegna samningsstaða okkar ætti að vera slæm hvað það varðar. Breyttri fiskverndunarstefnu þar innan dyra eru Íslendingar bestir til að berjast fyrir.

Auðvitað er það fáránlegt að setja málið upp eins og andstæðingar aðildar hafa valið að gera, að ætlast til að íbúar þessa lands taki þeim útleggingum á stöðunni sem hinum eina stóra sannleik, og vilji þeir fræðast nánar um hvað gæti verið í boði í því samtarfi sem innan ESB er fólgið þurfi að kjósa sérstaklega um hvort menn eigi að afla sér þeirrar vitneskju.Margir myndu nú kalla það skoðanakúgun af verstu sort.

Athugasemdir

[Gunnlaugur Ingvarsson (IP-tala skráð) 14.1.2009 kl. 23:12]

Sæll Hannes. 

Það er alveg hægt að afla sér mjög haldgóðra upplýsinga um hvað í boði væri með ESB aðild fyrir okkar þjóð svona a.m.k. 90% án þess að fara í formlegar aðildarviðræður. Það hefur marg komið fram hjá hinum háttsettu kómmizerum kerfisins. Til dæmis það að þeir gefa engar varanlegar heimildir frá sameiginlegri sjávarútvegsstefnu Sambandsins. 

Þannig er svo margt sem í grunnreglum kerfisins sem ekki er hægt að hagga, ja nema þá til skamms tíma eins og komið hefur í ljós með þær þjóðir sem hafa fengið inngöngu uppá síðkastið.

Það þarf því ekki að fara í neinar grafgötur með það að Sambandið mun ekki fara í einhverja góðgerðarstarfsemi gagnvart okkur, nema síður sé eins og sýndi sig best með fantaskapinn og ósanngirnina útaf ICESAVE deilunni.

Reyndar segir þú að við andstæðingar aðildar setjum helst fyrir okkur sjávarútvegsmál og landbúnaðarmál. Það er ekki alls kostar rétt.

Þið aðildar sinnar talið oft eins og ef það næðist að leysa sjávarútvegsmálin þá yrðu allir ánægðir og enginn andstaða, en það er alls ekki rétt ályktað hjá ykkur.

Jú rétt er það við setjum þau mál fyrir okkur af því að við teljum að ESB aðild muni reynast þessum atvinnugreinum mjög mótdræg og fjandsamleg.

En það er margt, margt fleira í starfsemi og skipulagi þessa Sambands sem er svo djöfullegt að það gerir mig og marga fleiri enn andsnúnari þessu fyrirbæri en bara á þessum beinu og augljósu hagsmunum okkar gömlu höfuðatvinnuvega.

Það er uppbygging kerfisins sjálfs og augljós lýðræðishalli, sem hefur verið að versna og á bara eftir að versna, því tillögur kómmizarana þar að lútandi eru þegar komnar fram um slíkt. Fólk verður alltaf lengra og lengra frá ákvörðunum og allar ákvarðanir um framtíð og skipulag samfélagana eru teknar af meiru og meiru leyti af andlitslausum skriffinnum kerfisins sjálfs, án tilfinninga og úr öllu sambandi við fólkið sjálft. 

Svona miðstýringa apparöt og allt um vefjandi skriffinna-kerfi munu aldrei til lengri tíma þjóna fólkinu og almenningi. Þvert á móti verða þau í eðli sínu alltaf mannfjandsamleg til lengri tíma litið og munu engu þjóna nema sjálfu sér og þeim sem nærast á því að stjórna nefndunum og ráðunum, þetta gera þau nú þegar og munu gera það áfram í vaxandi mæli, með spilltri og ógagnsærrri samtryggingu kerfisins sjálfs. 

Þess vegna mun ég og reyndar fjölmargir aðrir aldrei samþykkja inngöngu þjóðar okkar í svona sjálfspillt skítakerfi !

Það verður því aldrei nein sátt eða eining um ESB aðild hér á landi.

Þvert á móti myndi ákvörðun um aðildarviðræður nú algerlega sundra þjóðini í tvær hatrammar fylkingar.

Það er ekki það sem þjóð okkar þarf nú á að halda og reyndar eitt það versta sem fyrir þjóð okkar gæti komið nú.

Að lokum vil ég vil í fullri vinsemd Hannes benda þér á að lesa bókina "Váfugl" eftir Hall Hallsson blaðamann sem kom út núna fyrir jólin.

En einnig vil ég benda þér á að kynna þér vel rökstuddar skoðanir Sovéska andófsmannsins og vísindamannsins Vladímírs Sakorskys á gömlu Sovétríkjunum og samsvörun hans á því apparati við ESB valdið og hvert það sé að þróast.

Einng er alltaf mjög hollt og gott að horfa á sígildu teiknimyndina "Animal Farm", helst á hverju ári. Þar eru feitu spilltu svínin í leikgerfi ESB Kommízarana komin ljóslifandi.  Alltaf feitari, spilltari, gráðugri og svo broslega hégómlegri líka.

Í fullri vinsemd og með von um góðar stundir.         

[Hannes Friðriksson , 15.1.2009 kl. 11:33]

Blessaður Gunnlaugur

Þið hamrið og hamrið á að einasti tilgangur ESB sé að fara illa með það fólk, sem kosið hefur að bindast samtökum um sameiginlega hagsmuni. Þeim vinkli næ ég bara ekki að fylgja.Það er kosið til Evrópuþingsins og skipt um formennsku þar reglulega. Ætli þeir sem til ESB kjósa sína fulltrúa væru ekki búnir að sjá í gegnum það ef þetta væru svo andlýðræðisleg öfl sem þú gefur í skyn. hvort heldur í þjóðþingskosningum eða ESB.  Eða gengur þú bara út frá því að fólk sé fífl.

Hversvegna aðildarviðræður sem eingöngu er ætlað skýra mál og sjá hvað býðst, hvort allt sé þarna svo voðalegt sem þið segið ættu að fara að sundra þjóðinni skil ég heldur ekki. það er ferli sem tekur langan tíma og jafngott að setja það í gang núna heldur en seinna. Senda út skilaboð um að við séum að athuga hvort ESB geti verið einn kosturinn . 

Ég lít á þessar aðildarviðræður svipað og maður sé að fara að kaupa sér nyja skó, vegna þess að allir sjá að þeir gömlu eru ónýtir. Maður mátar þar til maður finnur þá sem passa, og enginn kaupir skó sem eru númeri of litlir, vegna þess að menn vita að þeir meiða. Og engum dettur í hug að standa fyrir utan skóbúðina og varna mönnum að fara þar inn til að máta, og krefjast þess um leið að hér eftir verði allir að ganga í sauðskinnskóm vegna þess að viðkomandi fann ekki skó sem pössuðu á sjálfan sig.

Það skyldi þó aldrei vera að feitu og spilltu svínin í Animal Farm, séu kannski einmitt þeir sem hvað harðast berjast fyrir því að hin dýrin fái aldrei að vita hvað gæti boðist við að taka upp aðildarviðræður, þar sem hugsanlega kæmi fram að allt var þetta nú ekki svona klippt og skorið eins og svínin höfðu sagt.

Með vinsemd og virðingu