Þetta er mín skoðun

Fimmtudagur, 22. janúar 2009

Það var mikið!!!!!

"Það var mikið" hugsaði ég nú í morgun þegar ég gaf mér tíma augnablik frá því mikilvæga verkefni að raða þeim rykkornum sem enn eru eftir á stofugólfinu og ákvað að hlýða á umræður um efnahagsmál frá Alþingi.

Flestir ræðumanna voru því marki brenndir að nú skyldi sagt eitthvað vitlegt um efnahagsmálin, og höfðu því með sér niðurskrifaðar ræður um efnahagsmálin sem þeir svo flestir lásu upp eins og páfagaukar í öruggri vissu að erfitt mundi verða að höggva í rök þeirra. Þarna voru á ferð að því er virtist tilfinningarlausir pólitíkusar sem óðu fram með frasa sem við öll höfum fengið að heyra mörgum sinnum áður.

Fór að velta því fyrir mér þegar ég hlustaði á þingmennina hvern á eftir öðrum þylja upp tölulegar staðreyndir út á hvað eiginlega þetta starf þingmanna gengi. Hvar voru hugsjónirnar og eldmóðurinn sem stundum sést til þessara sömu manna þegar þeir óska eftir brautargengi til að sinna sínu starfi.

"Það var mikið" hugsaði ég þegar iðnaðaráðherra sté fram og flutti ræðu sína af þvílíkum krafti hugsjónamannsins sem upptekinn var af þeim verkefnum sem hann var að sinna. Fyrir honum voru þau mál er hann reifaði ekki einhverjar tölur á blaði eða hugsanlegar lausnir, heldur hinn eini stóri sannleiki sem að skyldi stefnt. Ég keypti hugmyndirnar með það sama.

Hann fór yfir hvernig margar af þeim hugmyndum sem hann reyfaði voru kannski ekki endilega þær bestu í ófullkomnum heimi og ekki fallnar til vinsælda kosninga innan Samfylkingarinnar, en þær hljómuðu skynsamlega miðað við aðstæður og því berðist hann fyrir þeim. Þannig á það líka að vera.

Maður fær ekki allt sem maður vill og vill ekki allt sem maður fær, en það er þó skylda manns að reyna að gera það besta úr stöðunni hverju sinni, jafnvel þó að maður þyrfti að kyngja einhverju tímabundið þar að lútandi.

Eygló Harðardóttir hinn nýi þingmaður Framsóknarmanna náði þessu líka, þó í annari mynd væri og hún væri með skrifaða ræðu. Hún dró nefnilega vel fram um hvað málið snerist um um hversvegna fólki væri órótt. Hún talaði af innlifun um þá stöðu skuldara á Suðurlandi sem nýleg var hótað að vera dreginn inn á sýslumannskrifstofuna á Selfossi í handjárnum , á sama tíma og höfuðpaurar efnahagshrunsins svifu þar yfir í þyrlum og einkaþotum. Fólk skilur ekki það réttlæti sem er í gangi.

Árni Páll Árnasson var líka einn þeirra sem talaði um það sem máli skiptir. Um mikilvægi þess að hafa trú á þeim verkum sem unninn eru og framtíðarsýn hvað varðar þau verk er vinna skal. Setja stefnuna á framtíðina en ekki vera að velta henni á undan sér þar til menn teldu tímabært að taka hana til umræðu. Nú er tíminn til að taka ákvarðanir til framtíðar, og þær verða ekki teknar nema þau stjórnvöld sem slíkar ákvarðanir taka njóti trausts. Því verður að kjósa til að sjá hvar það traust liggur.

Flokkur: Stjórnmál og samfélag | Breytt s.d. kl. 14:02 | Facebook