Þeir fara þangað sem nuddið verður notalegast.

 

Maður áttar sig ekki alveg af hverju maður er að svekkja sig á þeim Framsóknarmönnum þessa dagana. Hvort það sé vegna þess að maður hafði bundið einhverjar þær vonir vonir við þá, sem maður innst inni vissi að þeir gætu ekki uppfyllt, eða hvort það er bara vegna þess að þar á bæ hefur ekkert breyst.

Maður hafði haldið miðað við þær yfirlýsingar framsóknarmannna eftir flokksþing sitt að nú hygðust þeir fara vandlega yfir sín mál. Að þeir myndu ekki framar setjast í sæti þar sem þeir gætu kúgað þjóðina með eins manns meirihluta eða hlutleysi eins og þeir nú hafa gert í viðskiptanefnd þar sem þeir tefja mál sem mikið liggur á að afgreiða, undir því yfirskini að væntanleg sé skýrsla frá ESB, sem að vísu fjallar um allt annað mál en fyrir liggur að afgreiða.

Þingmaðurinn sem svo varlega vill stíga til jarðar, segir það gert vegna þess að hans skylda sé að fylgja sannfæringu sinni. Sannfæringu sem hann virðist þó ekki hafa fengið fyrr en hann hafði rætt við formann flokks síns sem deilir með honum samviskunni. Já strengjabrúðurnar fara víða.

Það verður spennandi að sjá hvernig þeir stíga til jarðar þegar skýrslan birtist, og hvort þeim finnist þá ekki ástæða til að kanna málið nánar til að mynda með því að kalla eftir svipaðri skýrslu frá til dæmis Seðlabanka Zimbabve þar sem stjórnunaraðferðir í anda framsóknarflokksisns eru viðhafðar. Og spurning hvort þeir sendi ekki fyrirspurnina með reykmerkjum til að tefja málin enn frekar.

Nei undanfarnir dagar hafa því miður sýnt okkur jafnaðar og félagshyggjumönnum að þar hefur ekkert breyst innan dyra og ekki ástæða til að reikna með öðru að loknum kosningum en að þeir halli sér að þeim sem blíðast nudda þeim um bakið og það er vitað hverjir núna hanga og klippa á sér neglurnar tilbúnir í nuddið. Á þá verður ekki að treysta ætli menn sér að breyta þessu þjóðfélagi það hafa þeir sýnt okkur sjálfir