Að dreifa drullu en gleyma því sem næst sér stendur.

 

Víða liggja leiðir og tengingarnar eru í allar áttir hjá Sjálfstæðisflokknum sem nú eru í sinni vortiltekt, efir að hafa gleymt jólatiltektinni. Það er mikið ryk undir mottunum sem nú þarf að taka upp og dusta. Þorgerður Katrín gerir að umtalsefni hvernig hinir flokkarnir virðast líta út eins og  „Nýþvegin bleyjubörn" í samanburði við Sjálfstæðismenn.  Þar þarf ekki mikið hreinlæti til þessa dagana til að svo megi líta út. En eftir upplýsingar dagsins virðast þó flestir flokkarnir hafa sinnt hreinlætinu vel, ef undan er skilin Framsóknarflokkurinn sem ekki vill sýna á sér hendurnar ,af ótta við að menn sjái skítinn.

Helgi Ólafsson formaður kjördæmissamtaka ungra Sjálfstæðismanna í  Suðurkjördæmi fer mikinn og í stíl mykjudreifara þeirra íhaldsmanna dreifir hann drullunni í allar áttir  í Eyjafréttum nú í vikunni, en velur þó að líta framhjá því sem næst honum er og jafnvel í eigin flokki.. Virðist hafa verið í einhverjum öðrum heimi eða jafnvel á annarri stjörnu þegar hann velur að ráðast að Björgvin G Sigurðssyni sem hann segir að hafi hrökklast frá völdum, og telur að aðrir flokkar en hans eigin hafi ekki farið í gegnum þá endurnýjun sem þörf er á til að áfram verði haldið. Árangur þess sést vel þessa dagana.

Grein Helga: http://www.sudurlandid.is/Eyjafrettir/?p=101&id=28218

Svo maður vitni enn og aftur í varaformann Sjálfstæðisflokksins sem nú er upptekinn í Valhöll að "klára málin" eins og þeir segja þessa dagana telur hún að fylgi síns flokks muni aukast þegar kemur að því að ræða málefnin, sem Helgi Ólafsson velur að gera ekki heldur velur þann stíl sem í grein hans má sjá. Nú ætla ég að gera það sama, þó óljúft sé, enda þeirrar skoðurnar að stjórnmál eigi að snúast um málefni en ekki þær aðferðir sem mykjudreifaradeild íhaldsins hefur valið sér, og Helgi Ólafsson þar í fararbroddi á Suðurlandi.

Ljóst er að margir eru grunaðir en fáir sekir hvað varðar aðkomu og vitneskju um þau ofurlán sem Geir H Haarde segist hafa tekið á móti. Flestir sverja það af sér að vita nokkurn skapaðan hlut, og flestir virðast hafa snúið höfðinu í hina áttina. Menn virðast þó hafa sammælst innan Sjálfstæðisflokksins að rétt sé og heiðarlegt að framkvæmdastjórinn sem hvergi segist nærri hafa komið skyldi víkja , og að Guðlaugur Þór sé líklegur syndari í þessu máli.

Ljóst virðist vera að þeir sem nálægt Geir hafa staðið munu ekki vera viðriðnir málið hvorki síðasti aðstoðarmaður eða súperaðstoðarmaðurinn og hægri hönd  hans á þessum tíma, Ragnheiður   Elín Árnadóttir sem nú skyndilega er orðinn oddviti flokksins á Suðurlandi  með dyggum stuðningi þeirra er best unnu fyrir FL-group á þessum tíma.  Veit hún eitthvað? Eða var henni ekki treyst fyrir því er skipti máli í eigin flokki.

 

 

 

               

 

 

Athugasemdir

[Guðbjörn Guðbjörnsson, 11.4.2009 kl. 13:00]

Ég skil engan veginn hvernig aðstoðarkona fyrrverandi forsætisráðherra, Geirs H. Haarde, kemur þetta mál við, þegar aðrir en Geir í flokksforustunni á þessum tíma virðast ekki hafa vitað af þessum fjárframlögum.

Mér finnst ekki við hæfi að bendla nöfn fólks við þetta, sem enginn grunur hefur beinst að og enginn hefur nefnt í þessu sambandi.

Hannes, svona aðdróttanir eiga hreint út sagt ekki rétt á sér og eru lúaleg!

[Hannes Friðriksson , 11.4.2009 kl. 13:18]

Blessaður Guðbjörn

Það er nákvæmlega það sem ég er að segja. Haldið ykkur við pólitík og hættið þessu drullukasti eins og félagi þinn í Eyjum er að gera gagnvart Björgvin, en þið virðist bara ekki skilja fyrr en sömu aðferðum er beitt gagnvart ykkur. Um það snýst málið.

[Adda Þorbjörg Sigurjónsdóttir, 11.4.2009 kl. 14:28]

Hannes þetta ætti að vera fyrir neðan þína virðingu.

Bjarni mun gera hreint fyrir dyrum. Hann er varkár og skoðar málin áður en hann fer að draga ályktanir sem er eitthvað sem þú ættir að taka þér til fyrirmyndar.

Þetta mál er bara drullukast frá öðrum flokkum til þess að dreifa yfir málefnaþurrð sína og úrræðaleysi. Þeir vilja ekki að Sjálfstæðisflokkurinn með nýja vendi nái upp vopnum sínum og nái til almennings með lausnir sínar.

Þetta mál er vissulega skelfilegt. Þarna hefur einhverjum Sjálfstæðismönnum hlaupið of mikið kapp í kinn og ekki hlustað á innri rödd um að þetta væri full hár styrkur til þess að eðlilegt væri að taka við honum. Þetta á sér stað á þeim tíma sem engar reglur voru um þetta. Það sem skiptir máli núna er að nú er málum öðruvísi farið.

Eingöngu Sjálfstæðisflokkurinn getur haldið vörð um Helguvík. Hann er ekki líkt og Samfylkingin og VG að undirbúa þjóðina til þess að læra að búa við ástandið. Nei hann vill leiða þjóðina út úr vandanum á skömmum tíma með opnum huga, einstaklingsframtakinu og afneyta höftum og skattpíningu.

[Hannes Friðriksson , 11.4.2009 kl. 14:58]

Blessuð Adda Bára

Já það er rétt að þetta er fyrir neðan virðingu mína, en svo virðist vera að þeir sjálfstæðismenn líti svo á að allt sé leyfirlegt í pólitík, og grein Helga Ólafssonar í Eyjafréttum um gott dæmi um það. Það er nefnilega gallinn í þessu að þeir sjálfstæðismenn virðast ekki skilja hvað er að fyrr en þeir verða fyrir slíkum árásum sjálfir, og vona að þessi grein sem er langt fyrir neðan virðingu mína verði til þess að þeir Sjálfstæðismenn færu nú að ræða pólitík og hætta að dreifa ómálefnalegri mykju yfir allt og alla, og fari að ræða pólitík þegar þeir hafa unnið úr sínum vandamálum.

                           Með bestu kveðju og Gleðilega páska