Það er notalegt að vita

 

Mikið ósköp er nú notalegt að geta farið inn í páskahelgina vitandi það allt sem skiptir máli um ofurframlög  FL group og Landsbankans er nú komið fram, og gott að það var ekkert athugavert við þetta allt saman.  Það þurfti bara að skoða atburðarrásina og sjá hverjir höfðu tekið við peningunum og hverjir höfðu beðið um þá. Bjarni kláraði málið.

Auðvitað var það ekki eins og margir héldu að þetta hefði nokkurn hlut að gera með einkavæðingu Hitaveitu Suðurnesja, þótt allar dagsetningar segðu þó að svo gæti verið, enda sagði Illugi Gunnarsson fyrst að ekki væri hægt að bera brigður á vinnubrögð einkavæðingarnefndar , og Bjarni Benediktsson gat ekki séð neitt samhengi þarna á milli, enda stjórnarmaður  í  FL-group sem bara hafði tekið að sér að afla peninga fyrir Sjálfstæðisflokkinn, að vísu upphæð í  hærra lagi.

 En það  er hægt að segja að  þeir sjálfstæðismenn ganga hreint til verks og óhætt að treysta að þessir hlutir tengist ekkert til dæmis Geysi Green Energy sem stofnað var nokkrum dögum seinna. Nei maður getur alveg treyst Sjálfstæðismönnum þegar þeir segja að allt hafi nú komið fram sem vert er að vita. Og fásinna að ímynda sér að þörf sé á frekari rannsókn á þessu máli, þótt það svipi til ELF- mútumálsins í Þýskalandi og Frakklandi  sem Eva Joly afhjúpaði á sinn snilldarhátt.

Það er svo notalegt að vita til þess að nú getur FL-flokkurinn farið í kosningabaráttu eins og hinir flokkkarnir sem nýþvegið bleyjubarn og laust við þær syndir heimsins sem áður hrjáðu hann. Nú er tími til að klára málið „koma nú Bjarni"  eins og group-pían sagði á landsfundinum nýlega.

Athugasemdir

[Erla (IP-tala skráð) 12.4.2009 kl. 00:07]

Nákvæmlega! Úff, hvað manni léttir að þetta hafi verið svona einfalt og ofureðlilegt. Ég sem hélt kannski að þetta væri stærsta mútumál og stjórnmálahneyksli Íslandssögunnar. Gott að fá þetta allt á hreint fyrir páskadag. Páskaeggið hefði getað farið öfugt ofan í mann annars.

[Elías Bjarnason (IP-tala skráð) 12.4.2009 kl. 01:33]

Kemur ekki enn einn sleggjudómarinn fram á ritvöllinni! Þú ert einsog margir aðrir búnir að gleyma því að það voru Sjálfstæðismenn í borgarstjórn sem komu í veg fyrir að REY og Geysir yrðu eitt! Er eitthvað að ykkar skammtímaminni? Hvernig er þá langtímaminnið?

[Hannes Friðriksson , 12.4.2009 kl. 10:38]

Góðan daginn og gleðilega páska

Elías: Það er margt sem um mig sem má segja, en þegar kemur að því að ég hafi gleymt einhverju í málefnum REI og GGE, og hafi ekki skammtímaminni hvað það varðar finnst mér þú nú fara aðeins fram úr þér. Í því máli eru margar sögur sem hingað til hafa verið ósagðar fyrst og fremst til að hlífa þeim er að hafa komið. Eina slíka mun ég segja hér á bloggi mínu hér seinna í dag, sögu sem ég kann af því að ég var mitt í atburðarrásinni sem Sjálfstæðismaður hér í Reykjanesbæ, og stóð fyrir þeirri undirskriftasöfnun sem stöðvaði yfirtöku GGE á HS, og get alveg sagt þér strax að það voru ekki sjálfstæðismenn sem það gerðu heldur rúmleg 5000 íbúar svæðisins.

Með bestu kveðju

Hannes Friðriksson

íbúi í Reykjanesbæ

[Arnór (IP-tala skráð) 12.4.2009 kl. 11:50]

Það virstst sem svo að svör ansi margra Sjálsfstæðismanna við þessum mútuásökunum sé að það hafi verið þeir sem stöðvuðu REI og GG málið og því sé ekki rökrétt að halda því fram að einhver hafi verið að borga fyrir þetta. Þetta þykir mér frekar mikil einföldun á málinu. Það er ekki eins og xD sé ein óslitin heild, þó þeir reyni hvað þeir geti til að láta það líta svo út. Það var Vilhjálmur sem fór fyrir orkumálinu, hann og Guðlaugur eru miklir samherjar (hefur mér skilist). Það að hinir borgarfulltrúarnir hafi stigið fram og komið í veg fyrir þann glæp sem var í uppsiglingu segir nákvæmlega ekkert um að Gulli og Villi hafi ekki verið að bralla eitthvað, einungis það að það tókst ekki. Ekki heldur fólk að það hafi verið hægt að kaupa Sjálfstæðisflokkinn í heilu lagi !!!