Bæjarstjórinn sem ekki má fá hausverk

 

Eftir höfðinu dansa limirnir stendur einhversstaðar, og undanfarnar vikur höfum við séð eða ekki séð hvernig meðlimir meirihluta sjálfstæðismanna dansa nákvæmlega eins og höfuðið ætlast til. Þar fer ekki mikið fyrir gagnrýnum spurningum um til að mynda hvernig það má vera að komin sé á sérstakur samtarfssamningur á milli GGE og Reykjanesbæjar um hvernig unnið skuli að því að GGE nái algerum yfirráðum í HS Orku? Enda kannski ekki verið tækifæri til að spyrja þessara spurningar þar sem bæjarstjórn er í sumarfríi, eins og fjölmargir aðrir þegnar þessa lands.

 

Bæjarstjórinn sem leggur mikið upp úr lýðræðislegum og vönduðum vinnubrögðum að eigin sögn tilkynnti að   haldinn skyldi borgarafundur um þetta mál, og að tíminn fyrir þann borgarafund yrði auglýstur um miðja síðustu viku. Ekki bólar  á því fundarboði enn, sem veitir manni þó þá von að verið sé að vinna að málinu, og bæjarstjórnarfundi þeim er er boðaður hafi verið á þriðjudag og ákveða átti málið hafi verið frestað. Nema náttúrulega bæjarstjórinn ætli sé að halda borgarfundinn samdægurs svo hann geti sagst hafa uppfyllt skilyrðin hvað varðar þann hluta mála. Það væri svo sem ekki ólíkt skilningi hans, og meirihlutans á lýðræðislegri hugsun

 

Öllum virðist okkur ljóst að senn kemur að ögurstund hvað varðar málefni HS Orku, og það góða fyrirtæki verði senn komið í hendur útrásarvíkinga og erlendra aðila. Og við íbúar Reykjanesbæjar sitjum uppi með dreifikerfi sem útilokað er að nokkurn tíma verði unnt að reka með  hagnaði. Nema leyfð verði hækkun á dreifikostnaðinum. Og þá erum það við sem verðum að borga. Hafa limirnir eitthvað velt því fyrir sér, eða spurt hvort það sé nú nákvæmlega það sem þörf er á nú þegar kreppir að.

 

Það virðist því miður vera ljóst að eyðslufyllerí meirihlutans á undanförnum 7 árum sé nú að koma í ljós, og selja verði síðustu kúna til að unnt verði að borga fyrir túnsláttinn í bænum, sem vel að merkja var ekki unnt að láta innanbæjarfyrirtæki, og skólabörn sjá um þetta sumarið.

 

Sá meirihluti sem núna situr hefur á mettíma tekist það sem fáum hafði dottið í hug að væri unnt.

 

Þeir hafa selt það sem eldri kynslóðir höfðu byggt upp og erft núlifandi kynslóðir að.  Og eytt öllu andvirðinu

Þeir hafa sóað því sem við öfluðum

Og það sem verst er þeir hafa skuldsett börnin okkar til langrar framtíðar

 

og allt þetta hefur gerst sökum þess að enginn útlimana  hafði hvorki dug né þor til að koma þeim skilaboðum upp í höfuðið að ekki væri allt með felldu. Þau þorðu ekki að segja bæjarstjóranum skoðun sína. Því þá gæti hann fengið hausverk og skapvonskukast samhliða því.

Athugasemdir

[Sigurður Þorsteinsson, 11.7.2009 kl. 21:27]

Sæll Hannes ég vil ekki að erlendir aðilar eignist auðlindir landsins hvort sem það er á Suðurnesjum eða annars staðar á landinu.

Við stöndum hins vegar frammi fyrir því að semja okkur þannig út af borðinu að börnin okkar munu ekki komast hér af, og það af ástæðulausu. Þú gangrýnir bæjarstjórann þinn réttilega fyrir yfirgengilega skuldasöfnun, sem að sjálfsögðu mun bitna á komandi kynslóðum. Þegar kemur að Icesave munt þú þá láta flokksauðshlýðnina ráða,  eða munt þú taka undir með þeim sem gagnrýna þennan fáránlega samning?

[Úrsúla Jünemann, 11.7.2009 kl. 23:19]

Það hefur alltaf þótt heimskulegt að selja besta mjólkurkú eða éta útsæðið. Vesalings suðurnesjamenn að sitja uppi með slíkum bæjarstjóri.