Næðis skaltu njóta.

 

Áherslur á þau mál sem mikilvæg eru virðast breytast ört þessa dagana. Á meðan flestir héldu að málin snerust fyrst og fremst um skuldavanda heimilanna og fyrirtækjanna virðast blaðamenn á  Morgunblaðinu telja rétt að beina athyglinni meira að sjálfum sér og þeim ímyndaða vanda að Jóhanna sé ekki nóg í fjölmiðlum. Vonandi ekki merki þess sem koma skal.

 

Sérstaklegalega dekktir dálkar á annari síðu fara undir þetta vandamál Morgunblaðsins í dag, þar sem Jóhanna útskýrir það þrátt fyrir allt sé sýnileiki hennar jafnmikill og annarra forsætisráðherra sem á undan komu, og þótti þó mörgum stundum nóg um.

 

Hinn dekkti dálkurinn vakti þó meir athygli mína, en hann virtist eiga að fjalla um þá aðstöðu sem blaðamönnum er búinn, og þá undarlegu áherslu blaðamannsins að auðvitað ættu hlutirnir miklu meira að snúast um aðstöðu blaðamanna, en það sem rætt er.

 

Auðvitað á að búa blaðamönnum viðeigandi aðstöðu sé þess kostur og tækifæri til, en það verður þó einnig að gera þá kröfu í því síkvika umhverfi sem þeir starfa í, að bjargi sér nú svolítið sjálfir. Það virðist krafa þess blaðamanns sem fréttina skrifar að ekki skuli halda funda nema fyrst hafi verið gengið frá aðsöðu blaðamanna, nettengingum, og hverju öðru því sem þeir þurfa. Svona svipað og verkamaðurinn gerði kröfu um að skurðurinn sem hann mokar sé áður nógu breiður til að hann komist ofan í hann.

 

Hvort blaðamanni Morgunblaðsins hafi verið sköpuð aðstaða til að njóta næðis á meðan hann skrifar frétt um eigin vandamál finnst mér skrýtinn áhersla af fundi sem þessum, mér fannst miklu athyglisverðara að þarna hittust þingflokkarnir saman, og staðfestu að þessi meirihluti vinnur saman sem liðheild og skiptist á skoðunum og upplýsingum beint. En svona er nú sjálfhverfan mismunandi.  

 

Athugasemdir

[Sigurður Þorsteinsson, 23.9.2009 kl. 17:08]

Hannes ef mikilvægustu málin fjalla fyrst og fremst um skuldavanda heimilanna og fyrirtækjanna, hvað hefur þá verið gert frá því að þessir ríkisstjórnarflokkar tóku við? Ef þú gæfir þessari ríkisstjórn  einkunn fyrir frammistöðu sína í þessum málaflokki hver væri einkunnin á skalanum 1-10?

Geir Haarde var réttilega gagnrýndur fyrir að lítið heyrðist frá honum. Miðað við hans frammistöðu er Jóhanna týnd. Þetta er ekki bara spurning um hvað fjölmiðlamönnum finnst, þetta er spurning um hvað almenningi finnst. Af þessum sökum hafa vinsældir Jóhönnu hrunið.

Það er hárrétt hjá þér að Jóhanna hefði átt að njóta næðis, og fara að slaka á, enda var það stefnan. Menn gefa ekki kost á sér í atvinnumennsku í fótbolta til þess að njóta næðis, og heldur ekki til þess að taka að sér hlutverk forsætisráðherra.