Er Ólafur Thors eini upplýsti sjálfstæðismaðurinn í Reykjanesbæ?

 

Félagarnir Jón Baldvin og Styrmir voru ekki sammála um margt í Silfri Egils, en þeir voru þó algerlega sammála um að lýðræði í landinu væri undir, þegar kemur að því að við ákveðum hvernig við viljum haga okkar málum til framtíðar. Að tími klíkuskapar og kuningjatengsla ætti að vera liðinn, hann hefði engu skilað okkur nema síður væri.

Við höfum á undanförnum árum og jafnvel vikum fengið að fylgjast með hvernig klíkurnar og kunningjarnir hafa varið sig og verk sín með röksemdum af ódýrara taginu, og ætlast til að sauðsvartur almúginn sem eingöngu hefur getað treyst á hyggjuvit sitt keypti rökin. Okkur er gert að trúa því sem valdhafarnir segja hversu vitlaust sem það hljómar.

Nýlegt dæmi þar um er  frétt um  afkomu Reykjanesbæjar, þar sem okkur er sagt að gríðarlegur viðsnúningur hafi orðið á  fjármálum bæjarins, þrátt fyrir að ljóst sé tap á rekstri bæjarsjóðs séu rúmlega 3.milljarðar fyrstu 10 mánuði  ársins, og því hvorki efni né ástæða til að taka þátt í þeim hugarórum bæjaryfirvaldanna um að án breytinga séu framundan betri tímar með blóm í haga. Því svo er ekki í nánustu framtíð. Fyrst þarf að verða algjör hugarfarsbreyting hjá þeim meirihluta sem nú ræður , bæði hvað varðar upplýsingagjöf og fjármálastefnu.

Nú fer að renna upp sá tími að óhætt fari að verða að ræða málin, án þess að á það verði litið sem tilræði og ofsóknir, eins sumir hafa viljað láta. Við höfum á undanförnum tveimur árum orðið áhorfendur að miklum breytingum, hvort heldur við horfum til landsmálanna eð bæjarmálanna.

Við höfum horft á hvernig kreppa var kölluð  yfir landið, af mönnum sem höfðu ofurtrú á hinu svonefnda frjálsa framtaki undir formerkjum einkavinavæðingar. Meginþorri allra landsmanna þykist  nú upplýstur um að það virkaði ekki.

Svo virðist þó vera að enn finnist óupplýstir menn inn á milli. Og við sem búum hér í Reykjanesbæ fáum óneitanlega á tilfinninguna, þrátt fyrir að vita betur að hér séu engir upplýstir Sjálfstæðismenn lengur, nema þá helst styttan af Ólafi Thors. Þeir  stilla sér upp við hlið foringja síns sem virðist hafa það markmið helst að koma bænum endanlega á hausinn, eins best  sést af þeim tölum og svörum sem gefin hafa verið af meirihlutanum um fjárhagsstöðu bæjarins.

Við greiðum nú vel yfir 100. milljónir króna í húsaleigu hvern einasta mánuð, eða um það bil 1300. milljónir á ári í húsaleigu á ári, og enn er ekki farið að rukka leigu fyrir Hljómahöllina . Það þýðir 92.000 kr rúmlega á hvern íbúa í bænum frá 0-100 ára. Bæjarsjóður hefur verið rekinn með 7000 milljón króna tapi á síðustu tveimur árum sem þýðir 500 þúsund krónur á hvern mann. Er ekki komið nóg af æfingum í hagfræði/ rekstrafræði  hjá þeim sem hér ráða og tími til að taka á vandanum í stað þess að vera að dunda sér við að búa til fréttir af veruleika sem sannanlega ekki er.

Athugasemdir

[Kristinn. (IP-tala skráð) 1.12.2009 kl. 19:30]

Það er mikið til í þessu hjá þér, því miður.  Það er sorglegt að sjá bæjarfélagið í þeirri stöðu sem það er í núna, en öll okkar vandamál eru heimatilbúin.  Hér hefur verið mikið kapp, en engin forsjá.

Bankarnir voru einkavæddir í kringum 2002, núverandi meirihluti tók við stjórnartaumunum hér í bæjarfélaginu árið 2002.  Það vita allir hvernig fór fyrir bönkunum, hvernig fer fyrir bæjarfélaginu?

Merkilegt að sjá að þar sem sjálfstæðismenn stjórna bæjarfélögum annarsstaðar á landinu, þar hafa þeir farið aðrar leiðir en við.  Af hverju hafa þeir ekki selt allar eignir bæjarfélaganna, leigt þær aftur, og skellt sér í bullandi framkvæmdir sem þeir hafa ekki efni á?  Ætli þeir séu svona vitlausir?

[Ólafur B. Jónsson (Gamall Keflvíkingur) (IP-tala skráð) 1.12.2009 kl. 21:48]

Ólafur Thors hefði ekki farið svona að, hann var réttsýnn maður sem vissi sannleikann einsog hann var í þá daga.  Það mun vera eðlileg þróun að eftir kommúnistmann og hans glapræði, yrði óeðlilegt álit á einkaframtakið því menn eru svolítið öfgafullir.  Við skulum vona að meðalhófið, semsagt ríkisfyrirtæki og einkafyrirtæki þróist í rétta átt, en ekki þannig að annaðhvort ráði algerlega. 

[Hannes Friðriksson , 1.12.2009 kl. 22:06]

Blessaður Ólafur

já ég held að þetta sé rétt hjá þér, honum hefði ekki líkað hvað verið er að gera undir merkjum Sjálfstæðisflokksins hér í Reykjanesbæ. Og myndi sennilega undrast að enginn af þeim sem kjörnir hafa verið til skuli ekki rísa upp og segja eitthvað. En svona virkar nú þessi flokkur í dag, lýðræði og skoðanafrelsi á ekki við, í sama mund og talað er um Sjálftæðisflokkinn hér í bæ. Sá tími er liðinn.