Er Reykjanesbær næstur?

 

Er Reykjanesbær næstur  hugsaði  ég eftir að hafa hlustað á fréttaflutning RÚV af fjárhagsvandræðum Álftanes nú í kvöld. Vandamálin virðast vera nokkurn veginn þau sömu, stjórnlaus vöxtur og byggingargleði án tillits til fjárhagsgetu. Og mun bætast í á næsta ári þegar tekinn verður í notkun stærsti reikningur Fasteignar hingað til. Hljómahöllin og Stapinn.

Það varð ljóst í dag að meirihlutinn er byrjaður að búa sig undir að borga þann reikning, því framundan virðist vera mesti niðurskurður hjá einu bæjarfélagi á Stór-Reykjavíkursvæðinu fyrir utan Álftanes.  ef marka má umræður á bæjarstjórnarfundi nú í dag, þar sem bæjarstjórinn blessaður hafði ekki einu sinni fyrir að mæta á , enda ekki þörf á í ljósi sterks meirihluta.

Framundan er 10% hækkun á á nánast flestumþeim gjöldum er bærinn innheimtir samfara gríðarlegum niðurskurði á öllum sviðum sem að bænum kemur, 14% til að mynda á málum er viðkoma félagsmálageiranum, í  bæjarfélagi þar sem atvinnuleysi er mest á landinu. Þeir kalla þetta hagræðingaraðgerðir, sem fara verði nú í þrátt fyrir nýlega kynntan viðsnúning í fjármálum bæjarins.

Annað hvort voru þær fréttir rangar, nú eða að á þeim tveimur vikum sem liðnar eru hafi orðið enn einn viðsnúningur á fjármálum bæjarins. Held að enginn hér í bænum yrði neitt sérlega hissa enda breytast staðreyndir og fjárhagsstaða bæjarins í augum meirihlutans svipað hratt og veðrið. sem þó hefur verið heldur stöðugra undanfarið. En fjármál bæjarins virðast vera eins eins og fellibylur í viðsnúningum sínum

Það vakti þó athygli flestra er fylgdust  með 1. umræðunni  að fjárhagsáætlun sú sem nú var lögð fram og var nokkuð fyrirséð eins og annað í fjármálum bæjarins kemur fyrst fram á síðasta fundi bæjarstjórnar á árinu , þrátt fyrir að gert sé ráð fyrir að afgreiðsla  fjárhagsáætlunar skuli lokið með tveimur umræðum fyrir áramót.

Það er ekki nóg með að meirihlutinn  nái að reka bæjarfélagið með methalla á árinu, heldur ná þeir líka að fara á svig við allar hefðir hvað varðar afgreiðslu þessarar. Að því er virðist í þeim eina tilgangi að koma í veg fyrir umræðu um hana. Enda vitum við hér nú að séu einhver tímabil á árinu þar sem vert er að fylgjast með meirihlutanum  þá er það í kringum jóla og sumarfrí , þegar flestir eru að hugsa um eitthvað allt annað og skemmtilegra en klúður meirihlutans. Þá koma fram málin sem varla þola dagsljósið og umræðuna.

Þeir ganga nú um bæinn glaðir og  áhyggjulitlir yfir stöðunni, enda viðhorf þeirra að enginn spyrji um fjármál bæjarins þegar að kosningum kemur, þá séu það verkin sem unnin hafa verið sem komi til með að tryggja þeim enn eitt tímabilið. En verkin sem á síðasta tiímabili voru unnin virðast því miður flest hafa fenginn að láni og við íbúarnir munum nú á næsta ári fá að finna rækilega fyrir að komið er skuldadögum, eins og við höfum ekki nóg annað að greiða þessa dagana í boði Sjálfstæðisflokksins og einkavinavæðingarinnar.

Athugasemdir

[Jón Á. (IP-tala skráð) 15.12.2009 kl. 22:34]

Þetta hlýtur að vera misskilningur hjá þér Hannes!  Hér er allt í bullandi plús, enda er Árni bæjó sérstaklega snjall í fjármálum, hehe! 

En að öllu gamni slepptu, er engin leið til að koma manninum burt úr bæjarfélaginu?  Hann er búinn að setja okkur á hausinn, selja Hitaveituna útlendingum, nokkuð sem enginn hafði látið sér detta í hug að myndi nokkurn tímann gerast, og svo hreykir hann sér bara hátt, eins og hani á haug, eða útrásarvíkingur í afneitun!

Nei, þessi afglöp hans eiga bara eftir að þýða það fyrir okkur bæjarbúa að hér hækkar allt, allt frá sorphirðu til hita, rafmagns og allrar annar þjónustu, svo að hér verður ekki hægt að búa með góðu móti.  Ef maður gæti selt kofann sinn, þá myndi maður flytja í eitthvert nágrannabæjarfélagið, þeim er þó stjórnað af gamaldags sjálfstæðismönnum, ekki svona skrípi eins og þessu fyrirbæri frá Vestmannaeyjum!!!

[Hannes Friðriksson , 16.12.2009 kl. 00:00]

Blessaður Jón

Ég held að allt þetta sé nú nokkuð nærri lagi hjá þér, og ljóst að staðan er slæm hjá hjá okkur. Meirihlutinn vill nú samt halda fram að hér sé allt í himnalagi og enginn ástæða fyrir okkur að hafa áhyggjur af fjármálunum. Bæði sé búið að tryggja hag sveitarfélgsins og í framtíðinni getum við átt von á að fá leigu fyrir auðlindina sem jafngildir miðað við núverandi nýtingu þokkalegu einbýlihúsi á ári, á sama tíma og HS Orka sýnir hagnað upp á að ég held um það bil 2 milljarða ef ég man það rétt. Og sá hagnaður á bara eftir að aukast ef eitthvað af þeim framkvæmdum sem fyrirhugaðar eru komast í gang.

Og svo hitt sem er bæjarfélaginu enn meira til hagsbóta, að með greiðslu leigutekna okkar í Fasteign séum við að eignast þau hús sem við leigjum á þrjátíu árum, en verðum samt að greiða fyrir þau ef við viljum út úr fyrirtækinu eftir þessi þrjátíu ár. Ég hef ekki ennþá náð þessu, en þeir segja að þarna liggi nú snilldin sem ekki öllum er ætlað að skilja.Og hafa meira segja gefið út litprentaðan bækling í anda 2007 til að útskyra þetta fyrir okkur forheimskum. Hvað skyldu menn á Álftanesi nú segja við honum þessa dagana? 

En ég held nú að það væri samt betra fyrir  umræðuna að vera ekki of kröftugir í orðavali þegar kemur að persónum og leikendum í þessu, því þrátt fyrir allt eiga þeir þó skilið að þeim sé sýnd  kurteisi þó við séum nú ekki sammála þeim.

[Úrsúla Jünemann, 16.12.2009 kl. 11:25]

Ætli þeir sem sitja núna í bæjarstjórn í Reykjanesbæ fá ekki spark í rassinn í næsta kosningu. Ég bara trúi því ekki að fólkið er það heilaþvegið af sjálfstæðisgenginu þarna að það hugsar sig ekki um næst hvað það kýs.

[joi (IP-tala skráð) 16.12.2009 kl. 13:51]

Ertu alveg viss um það Úrsúla? Hefur fólk einhvern áhuga á að kjósa það fólk í Reykjanesbæ sem þar situr? Hefur það fólk sem situr í minnihlutanum yfir höfuð einhvern áhuga að setjast undir stýri við þessar aðstæður?

Reykjanesbær átti góðar eignir til að fjármagna alla framkvæmdagleðina. m.a. gríðarlega arðbært orkufyrirtæki með mikla möguleika. Það var selt. Fasteignirnar sem var búið að nurla fyrir síðustu 100 árin eða svo voru líka seldar. Það eina sem eftir er að selja er skessan í hellinum. Hún verður líklega farin á dúndur prís fljótlega.

Það er fróðlegt að rifja það upp, að fyrir bara 12 árum voru sveitarfélögin keflavík, Njarðvík og Hafnir sameinuð í eitt sveitarfélag. Forsendurnar voru hagræðing og betri möguleikar á að fást við ýmis verkefni sem þau áttu ekki að geta sinnt sitt í hvoru lagi. Þá voru öll þessi sveitarfélög ágætlega stödd fjárhagslega.

Dæmi nú hver fyrir sig hver ábati þessarar sameiningar var. Möllerin sem er að sýsla með þessi mál í ríkisstjórninni telur mikið hagræði af svona sameiningum. Hann ætti að kafa aðeins ofan í þetta mál og skoða árangurinn. Það var jú Jóhanna Sigurðardóttir, núverandi forsætisráðherra sem kom þessu í kring á sínum tíma.

[Jóhann (IP-tala skráð) 16.12.2009 kl. 18:54]

Vill einhver minnihlutanum svo illt að komast í stjórn? Það geri ég a.m.k ekki. Best að leyfa snillingunum, sem gerðu svona eftirminnilega í buxurnar, að þrífa sig sjálfir.