Að sjálfsögðu er Icesave samningurinn slæmur

 

Það lítur ekki vel út fyrir ríkistjórnarflokkanana núna miðað við skoðanakannanir. Svo virðist að  ekki sé nægilegt traust fyrir hendi í augnablikinu. Að stjórnarandstöðunni gangi vel í því sem þeir telja vera hlutverk sitt núna. Að hindra á hvern þann hátt sem mögulegt er að uppbygging þjóðfélagsins geti hafist á nýjan leik.

 

Það er ljóst að lánin frá Norðurlöndunum koma ekki fyrr en gengið hefur verið frá Icesave samningnum og að lán AGS er heldur ekki að koma fyrr en frá þessum málum hefur verið gengið. Á meðan ekki er frá þessum málum gengið bíða bæði fyrirtækin og heimilin.

 

Auðvitað er það ekki bara stjórnarandstæðingar sem vinna á móti í þessu máli, heldur einnig nokkur hluti þingmanna stjórnarinnar sjálfrar, sem segjast ekki láta stilla sér upp við vegg í máli sem þessu. Skiptir minna máli fyrir þá að nú er það það þjóðin sem er upp við vegginn.

 

Að sjálfsögðu er Icesave samningurinn slæmur, og meira að segja svo slæmur að engum dytti í hug að skrifa undir hann í eðlilegu ástandi. Það eðlilega ástand er ekki nú, og það er ekki Bretum né Hollendingum að kenna að svo er. Það getum við engum þakkað nema sjálfum okkur, sem létum þessa hluti gerast. Bretar og Hollendingar eru tilbúnir til að lána okkur hluta af því fé sem þarf til, svo hægt sé að greiða þær ábyrgðir sem á ríkið falla, og með lægri vöxtum en flestir aðrir eru tilbúnir til að lána okkur.Auk þess sem ákvæði er í samningnum um að hægt sé að endurskoða hann falli mál hér til verri vegar.

 

Sá samningur sem nú er verið að tala um gerir ráð fyrir að ekki sá byrjað að greiða af honum fyrr en að sjö árum liðnum, og að greiðslan þá geti numið um það bil tveimur til þremur prósentum miðað við landsframleiðslu á ári nú, en vonandi á hún nú eftir að aukast eitthvað . Það erfitt að átta sig á því hvernig sú prósenta á að leiða til þjóðargjaldþrots eins og forkólfar stjórnarandstöðunnar vilja meina. Ætli það sé nú ekki eitthvað annað sem þar vegur þyngra komi til slíks ástands, og spurning um hvort þeir ættu ekki  að líta sér nær hvað það varðar.

 

Maður veltir fyrir sér í ljósi skoðanakannanna hvernig málþóf og aðgerðarleysi virðist afla þeim fylgi er fyrir slíku standa. Að þeir sem þó horfa á vandann og viðurkenna hann og skuli verða skúrkarnir í dæminu. Dæmi sem setja þurfti upp sökum stefnu þeirra sem nú eru tilbúnir til að taka sjensinn einu sinni enn í von um að úr rætist.

 

Er nú ekki komin tími til að horfa á staðreyndirnar, og þann samning sem fyrir liggur og samþykkja hann. Menn geta svo látið fylgja með því samþykki áréttingu um skilning Alþingis á samþykktinni ásamt ósk um að taka upp þau atriði sem út af standa, komi til þeirrar stöðu að samningurinn verði okkur of þungur þegar fram líða stundir.

 

 

Það verður ekki bæði sleppt og haldið.

 

Maður spyr sig óneitanlega þessa dagana á hvað vegferð þessi þjóð eiginlega er. Staðan er ljós, og vitað er hvað þarf að gera til að hjólin fari að snúast á nýjan leik. En svo virðist sem menn eigi erfitt með að horfa og sætta sig við stöðuna eins og hún , og þvæla málið eins lengi og það er unnt vitandi þó  vel hver niðurstaðan verður. Það verður ekki komist undan því að samþykkja ICESAVE hvort sem mönnum líkar það betur eða verr.

 

Þeir berja sér á brjóst formenn þeirra tveggja flokka sem ferðalagið hófu með einkavæðingarstefnu sinni, og þykjast vissir um að hægt sé að ná betri samningum en nú eru komnir fram. Þrátt fyrir að öll skilaboð sem hingað berast segi hið andstæða. Menn eru ekki tilbúnir til að eiga frekari viðskipti við Ísland fyrr en málefnum ICESAVE er lokið. Ekki einu sinni Norðurlandaþjóðirnar.

 

Lykilinn að endurreisn þessa þjóðfélags er að ná samningum við helstu viðskiptalönd okkar, og að það verði gert á þann hátt að þau séu sannfærð um að Ísland hyggist standa við þær skuldbindingar sem landið hefur áður undirgengist. Hér verður ekki bæði sleppt og haldið. Ríkið eins og þegnarnir standa nú í þeirri stöðu að gera upp í eigin ranni. Breyta því sem unnt er að breyta, en eyða ekki orku í berjast við vindmillur sem kannski ekki einu sinni eru þar.

 

Þeir belgja sig út formenninnir tveir sem þykjast hvergi nærri hafa komið, og telja það líklega lausn að hægt sé fella þennan samning og jafnvel hægt að dæma í þessu máli fyrir Héraðsdómi Reykjavíkur. Og þá verði útkoman örugglega önnur. Er það furða að maður velti fyrir sér um hvað þessir menn séu eiginlega að hugsa ? Hvernig væri að þeir hættu nú að þvæla þetta mál út í hið óendanlega, svo hægt sé að snúa sér að því sem máli skiptir. Stöðu heimilanna og atvinnuveganna. Þau mál er ekki hægt að eiga við fyrr en gengið hefur verið frá erlendri lánafyrirgreiðslu til langs tíma. Og þar er samþykkt ICESAVE sá þröskuldur sem fara verður yfir til að árangur náist.

 

Það er komin tími til að halda áfram og átta sig á raunveruleikanum. Raunveruleika sem bæði formönnum beggja Flokkanna ætti að vera ljós nú þegar. Það voru þeir sem voru við stjórnvölinn þegar ökuferðin hófst, sem varð til þess að þetta þjóðfélag fór fram af bjargbrúninni án þess að reynt væri að stíga á hemlanna. Þeir ættu að sjá sóma sinn í að vera ekki að þvælast fyrir á slysstaðnum rétt á meðan verið er að koma hinum slösuðu til hjálpar.

 

 

Sumarfrí

Tími til njóta

Við eigum val.

 

 

 

Konan mín segir að ég geti verið hreint ótrúlega þrjóskur, og ég veit oft ekki alveg hvort hún segir mér það til hnjóðs eða góðs. En viðurkenni innra með mér að sennilega sé þetta þó alveg rétt hjá henni. Hún þekkir sinn mann.

 

Nú virðist ég vera komin í eitthvað þrjóskukast gagnvart þeim sem ég kaupi raforkuna af. Ég ætla mér ekki að kaupa mitt rafmagn af erlendum gróðapungum og útrásarvíkingum  úr auðlindum á minni eigin fósturjörð. Fyrr nota ég kerti og hlóðir til að elda matinn á. Eða á ég eitthvað val í því.

 

Já, það á ég nefnilega og það ætla ég mér að nýta mér. Nú skipti ég um þann aðila sem selur mér rafmagnið. Því ég tel það þjóðhagslegra hagkvæmara að ég borgi innlendum og þar að auki opinberum aðilum fyrir það rafmagn sem ég nota. Þá verða þeir aurar allavega eftir í landinu, en fara ekki í áhættusjóði erlendis. Ég á valið. Og það val er fyrir hendi.

 

 

Þetta er ekki flókið, bara fara á heimasíðuna hjá Orkusölunni og fylla út eyðublað http://www.orkusalan.is/

 

Orkusalan er í 98% eigu gamla góða RARIK sem stofnaði Orkusöluna þar sem henni var skylt að aðskilja sölustarfsemina frá rekstrinum.

 

„Orkusalan selur raforku til fyrirtækja, stofnana og heimila á öllu landinu. Í kjölfar breyttra raforkulaga um áramótin 2005 var sala á raforku gefin frjáls. Frá áramótum 2006 gátu allir viðskiptavinir valið sér raforkusala, án tillits til búsetu. Samkeppni var innleidd í raforkuframleiðslu og raforkusölu en flutningur raforku frá virkjun til neytenda er eftir sem áður háður einkaleyfi." segir á vefsíðunni.

 

Þetta þýðir að maður fær einn reikning fyrir notkuninni og svo annan frá HS Veitum fyrir dreifingunni, þar sem hún er háð einkaleyfi

 

Þjónustufulltrúi sagði mér að eftir líðandi mánuð færi þetta í gegn þannig að skrái maður sig í viðskipti í dag fær maður fyrsta reikninginn frá þeim í sept,

 

Ég spurði ekkert um verð enda er mér alveg sama. Ef ég þarf að greiða eitthvað aðeins meira til að halda sjálfsvirðingunni, þá verður bara að hafa það.

17/7 Maður er stundum svolítið klókur án þess þó að það sé meðvitað, því skv frétt Morgunblaðsins virðist þessi tilflutningur minn einnig vera hagkvæmur fyrir mig. Set hér inn samanburðartöflu ú Mbl frá í morgun.

 

Nú er gott veður til að grilla

 

Guðbrandur Einarsson oddviti A- listans í Reykjanesbæ veltir fyrir sér hvernig tilviljanir geta átt það til að hanga saman í þessari grein á Víkurfréttum í dag.

http://www.vf.is/Adsent/41095/default.aspx

 

Hann veltir fyrir sér hvernig að tilviljun ein ráði því að menn hittast í grillveislum og lokuðum fundarherbergjum sem svo enda í samningum sem knúðir eru fram í andstöðu flestra nema þeim fenginn hafa verið völdin, án þess þó að hafa fengið til þess heimild frá kjósendum sínum til fara þannig með völdin.

 

Hann veltir fyrir sér ótrúlegum tilviljunum um hvernig sjálfstæðismaðurinn Árni Sigfússon fannst í grillveislu hjá Ásgeiri Margeirssyni, meðan augu og eyru fjölmiðlanna beindust að málefnum Hitaveitu Suðurnesja og sölu Reykjanesbæjar á part af hlut sínum í HS. Já þá var var nú frekar ástæða til að grilla í góðra vina hóp, heldur en að útskýra gjörninga sína. Fela sig í trjágarði þess er brauðmolunum úthlutar.

 

Hann talar líka um hringborðið þar sem bæjarstjórinn sat ásamt öðrum "mikilmennum", í REI málinu. Margir þeirra hétu að vísu nákvæmlega sama nafni, en sátu þar í umboði ólíkra aðila. Og allir stukku þeir upp úr stólum sínum um leið og  út um bakdyr Orkuveituhússins um leið og séð var hvert málið stefndi. Og þóttust hvergi nærri hafa komið, en þekktu þó greinilaga hvar áherslan hafði verið lögð í því máli eins og fram kom á borgarafundinum í Duus húsum þar sem einn af hringborðsriddurunum útskýrði mismuninn á málunum.

 

Hann veltir líka fyrir sér síðustu vendingu í algerlega tilviljanakenndu samspili þessara manna sem fyrst hittust að því er virðist á hjólbarðaverkstæði í Trékyllisvík, sé eitthvað slíkt þar. Og  nú hafa þeir án þess að hafa borið það undir þá er málið varða skipt á milli sín verðmætustu eigum nokkurra bæjarfélaga. Já tilviljanirnar geta verið skrýtnar.

 

Ég velti hinsvegar fyrir mér hvort þeir félagar komi nú ekki til með að grilla í kvöld, nú er veðrið til þess . Verði þeim að góðu.

 

Og í ljósi gítar og söngkunnáttu þeirra sendi ég þeim hér smávegis til að syngja með steikinni.

Sumarið er tíminn
 GCD
 

Intro> Em B

Em         Am

Sumarið er tíminn
B                    Em         

þegar Árni fer á stjá  
B           Em

að nauðga í gegn málum

B                    Em         

sem helst enginn má sjá   
Em

ójá



Em                   Am     B 

Honum  finnst það í góðu lagi
Honum  finnst það í góðu lagi
Em B

Ó jaaá   

 

þá er það búið.

Leiknum er lokið og meirihluti sjálfstæðismanna hefur nú samþykkt það sem þeim var gert að samþykkja. Það verður spennandi að sjá hvað þeir nýta peningana í núna, því ljóst er að nú hafa þeir ekki meira að selja. Vonandi staldra þeir þó við og hugsa sjálfir áður en þeir láta bæjarstjórann segja sér í hvað þessir peningar sem að vísu er erfitt að átta sig á hve mikið það er eða hvort þeir yfirleitt koma, eigi að fara.

Ljóst er að nokkrir hafa gefið sér tíma og hlustað á fundinn á vefnum og bendi ég sérstaklega á færslu Hjartar Guðbjartssonar sem dundaði sér undir blaðri meirihlutans að finna út hvernig bæjarfulltrúrar hefðu nú nýtt tíma sinn í bæjarstjórn. Þar hafa greinilega nokkrir þeirra bláu setið marga fundi og lítið sagt.

http://www.hjorturgud.com/

Læt hér fylgja með bókanir og tillögur minnihlutans sem reyndi það sem hann gat til að fá þetta mál inn í eðlilegt ferli, en var ofurliði borinn af illa innrættum meirihluta Árna Sigfússonar.

 

Tillögur  í bæjarstjórn  þriðjudaginn 14. júlí 2009 

Tillaga 1 

Bæjarstjórn Reykjanesbæjar samþykkir að fresta kaupum á landsvæðum í eigu HS Orku og hefja nú þegar þríhliða viðræður sveitarfélagsins við Grindavíkurbæ og HS Orku þar sem lausn verði fundin á ágreiningi um landakaup.

Tilaga 2

Bæjarstjórn Reykjanesbæjar hafnar fyrirliggjandi hagnýtingarsamningi við HS Orku á grundvelli þess að ljóst þykir að hann brýtur í bága við 8.grein laga á orku- og auðlindasviði  þar sem segir að “ Við ákvörðun um það hverjum skuli veittur afnotaréttur skuli gæta jafnræðis.” Bæjarstjórn Reykjanesbæjar telur rétt að eyða allri réttaróvissu áður en lengra er haldið.

Tillaga 3

Bæjarstjórn Reykjanesbæjar samþykkir að fresta öllum áformum um sölu á hlut sínum í HS Orku til Geysis Green Energy og kaupum sveitarfélagsins á hlut Geysis Green Energy  í HS Veitum. Bæjarstjórn telur rétt að láta fara fram sjálfstætt mat á virði félaganna hvors um sig til þess að ekki leiki á því nokkur vafi að rétt sé að málum staðið. Að loknu slíku mati verði það kynnt íbúum Reykjanesbæjar sem ákveði í kosningu hvort viðskipti með ofangreinda eignahluti eigi sér stað.

 

Bókun bæjarfulltrúa A-listans lögð fram í í bæjarstjórn 14. júlí 2009

Nú hefur meirihluti sjálfstæðismanna í bæjarstjórn Reykjanesbæjar samþykkt að selja hlut  sveitarfélagsins í HS Orku til Geysis Green Energy (GGE). Þá hefur meirhlutinn einnig  samþykkt að kaupa hlut GGE í HS Veitum.

Kjörnir fulltrúar A-listans lýsa sig mótfallna þessum viðskiptum og eru helstu ástæður þess eftirfarandi:

1. Ekkert sjálfstætt verðmat liggur fyrir þó svo að ráðgjafar bæjarstjóra hafi talið nauðsynlegt að endurskoðun á verðmati félaganna fari fram

Ekkert sjálfstætt verðmat á HS Orku né HS Veitum liggur fyrir við ákvörðun bæjarstjórnar og hefur verið á það bent af hálfu sérfróðra aðila sem voru fengnir að verkinu fyrir tilstuðlan sjálfstæðismanna  en bæjarstjóri lagði fram í bæjarráði minnisblað unnið af fyrirtækinu Deloitte. Í því minnisblaði kemur m.a. fram eftirfarandi:

“Ekki hefur verið farið ítarlega yfir alla þætti. Engin ábyrgð tekin á því sem gert er á grundvelli minnisblaðsins.” “Við viljum benda á það að til þess að leggja mat á það hvort tilboð á grundvelli hugmynda GGE sé viðunandi fyrir Reykjanesbæ teljum við nauðsynlegt að endurskoða verðmat bæði HS Orku og HS Veitu miðað við breyttar aðstæður.”Þá kemur einnig fram í þessu minnisblaði eftirfarandi: “Hins vegar er ljóst að raunvirði greiðslna skv. tilboði er talsvert lægra en tilboðsfjárhæðin gefur til kynna.”

Af þessu má vera ljóst að ekki hefur verið gert sjálfstætt verðmat á félögunum af hálfu sérfróðra aðila fyrir hönd Reykjanesbæjar, en stuðst er við gömul verðmöt sem unnin voru fyrir aðra aðila og eiga þessi verðmöt ekki við í dag, sérstaklega í ljósi bankahrunsins og gríðarlegs gengisfalls íslensku krónunnar.

2. Hugsanlegt að Reykjanesbær verði af 5 milljörðum með þessum viðskiptum

Á sama tíma og sjálfstæðismenn eru að keyra söluna í gegnum stjórnsýslu Reykjanesbæjar, frétta bæjarfulltrúar A-listans út í bæ af mikilvægum gögnum sem bæði formanni bæjarráðs og bæjarstjóra á að hafa verið fullkunnugt um að væru til.   Bæjarstjóri hefur staðfest að hann hafi vitað af tilvist verðmata sem unnin voru fyrir Hafnarfjarðarbæ og Orkuveitu Reykjavíkur.  Nýjasta  verðmatið skv. okkar bestu vitund sem unnið hefur verið af sérfróðum aðilum var kynnt á sérstökum eigendafundi í Svartsengi 12. desember sl. þar sem fram fór kynning á verðmati Arctica Finance á báðum félögunum, þ.e.  HS Orku og HS Veitum.  Bæjarstjóri segist ekki hafa verið viðstaddur þennan eigendafund hluthafanna í HS Veitum og HS Orku. 

Verðmatið var unnið fyrir Orkuveitu Reykjavíkur og Hafnarfjarðarbæ en í stuttu máli kemur þar fram að áætlað verðmat HS Orku sé 41,3 milljarðar og  HS Veitna  4,9 milljarðar. Miðað við minnisblað frá Deloitte sem bæjarstjóri lagði fram er Reykjanesbær að selja sinn hlut í HS Orku á 11 milljarða sem þýðir að heildarvirði HS Orku er ca. 32,3 milljarðar eða 9 milljörðum lægra en verðmat sem kynnt var fyrir  í desember sl.

Í sömu kynningu er verðmat HS Veitna áætlað 4,9 milljarðar en Reykjanesbær er að kaupa 32% hlut í því fyrirtæki á 4,3 milljarða sem þýðir að miðað er við að verðmæti félagsins sé ca. 13 milljarðar eða 8 milljörðum hærra en verðmat sérfróðra aðila í desember sl. Miðað við þetta er Reykjanesbær að sætta sig við 8 milljarða hærra verðmat á HS Veitum og 9 milljarða lægra verðmat á HS Orku eða 17 milljarða verðmat Reykjanesbæ í óhag. Þetta þýðir að Reykjanesbær er að verða af tæpum 5 milljörðum í þessum viðskiptum,  ef stuðst er við verðmatið sem kynnt var 12. desember sl. á fundi sem bæjarstjóri sat ekki fyrir hönd  Reykjanesbæjar. Ástæður þess að verðmatið á HS Orku heldur sér þrátt fyrir hrun, er fyrst og fremst þróun á gengi USD/ISK og lækkun á langtímavöxtum í USD svo og þróun álverðs. En við verðmat á félögunum er fyrst og fremst verið að meta virði væntanlegs sjóðstreymis félaganna beggja.

Að okkar mati er þetta eitt nægjanleg ástæða til þess að fresta afgreiðslu málsins og fara betur yfir þessi viðskipti.  Í raun er það skylda allra kjörinna bæjarfulltrúa í Reykjanesbæ að fá svör og viðhlítandi skýringar á þessum mismun áður en þeir  geta samþykkt samningana við GGE.

3. Hugsanleg virðisrýrnun á eignarhlut bæjarins í HS Veitum hf

Í umsögn sérfróðs aðila sbr. 65. gr. sveitastjórnalaga dags. 10.07.09 sem gerð er af endurskoðanda sveitarfélagins er sérstaklega á það bent að huga þurfi sérstaklega að virðisrýrnun á eignarhlut bæjarins í HS Veitum hf, en þar segir orðrétt m.a.

“fram hafa komið vísbendingar um lægra virði þess félags (HS Veitur)”.

Ennfremur bendir endurskoðandi Reykjanesbæjar á í umsögn sinni sem sérfróður aðili sbr. 65. gr. sveitastjórnalaga:

“Ef gert er ráð fyrir að heildarmat þess félags (HS Veitur) sé um 5.000 milljónir króna er hugsanlegt að bókfæra þurfi virðisrýrnun á hlut bæjarins sem nemi allt að 3.200 milljónum króna.“

Þetta ásamt verðmati Arctica Finance á HS Veitum ætti að vera næg ástæða fyrir bæjarfulltrúa til að samþykkja frestun á afgreiðslu málsins.

Ennfremur kom fram í kynningu formanns bæjarráðs á íbúafundi sem haldinn var í Bíósal Duus húsa 13. júlí 2009 að áætlaður hagnaður af starfsemi HS Veitna væri 200-300 milljónir króna á ári og sé þetta borið saman við verðmat það sem meirihluti sjálfstæðismanna ætlar að kaupa félagið á, er ljóst að sjálfstæðismenn sætta sig við ávöxtun á sjóðum bæjarsjóðs á bilinu 1,5% til 2,3% sem  þýðir að í raun er sveitarfélagið að liggja með yfir níu milljarða í neikvæðri raunávöxtun,  þ.e. ef verðbólga á Íslandi er yfir 2,3% sem hún hefur verið nánast án undantekninga frá lýðveldisstofnun. 

4. Viðskiptin og aðdragandi þeirra hefur átt sér stað í skjóli lokaðra funda með forsvarsmönnum GGE og ekki hefur verið farið með viðskiptin í opinbert söluferli

Bæjarstjóri hefur unnið að þessum viðskiptum Reykjanesbæjar við GGE á bakvið luktar dyr og á lokuðum einkafundum, en að þessu ferli hafa einungis komið tveir bæjarfulltrúar Sjálfstæðisflokksins og forsvarsmenn GGE. Sé vilji til þess meðal íbúa sveitarfélagsins að lokinni ítarlegri kynningu og umræðu að selja eignir sveitarfélagsins skal gera það með gagnsæjum og opinberum hætti og gefa fleiri aðilum tækifæri á að taka þátt og e.t.v. bjóða í hlut Reykjanesbæjar í  fyrirtækinu. Í svona stóru máli hlýtur að teljast eðlilegt að gagnsæi ríki og að fleiri aðilum sé  gefinn kostur á að bjóða í hlut sveitarfélagsins , enda er um ráðandi hlut að ræða í fyrirtækinu og vel hugsanlegt að fleiri hefðu áhuga á að koma að því heldur en GGE. Í raun er um að ræða einkasölu sem hvergi hefur fengið opinbera umræðu né heldur  verið auglýst eftir áhugasömum aðilum. Einungis hafa átt sér stað umræður á lokuðum fundum milli sjálfstæðismanna og forsvarsmanna GGE.  Sjálfstæðismenn hafna óhludrægu verðmati  á fyrirtækjunum og það gefur tilefni til að efast um að hagsmunir sveitarfélagsins séu hafðir að leiðarljósi í þessum viðskiptum.  Það mun þarfnast frekari skoðunar.

5. Fjárhagslegt heilbrigði GGE og eigenda þess

Fréttir hafa verið í fjölmiðlum að undanförnu um fjárhagslegt heilbrigði Geysir Green Energy og liggur ekkert nýtt fyrir um það. Þeir sem að GGE standa voru bankar sem eru orðnir gjaldþrota og komnir í hendur ríkisins eða þá félög sem komin eru í greiðslustöðvun svo sem  fyrirtækið Atorka sem er meðal stærstu eigenda. Það má því reikna með erlendir aðilar standi að baki tilboði GGE. Sú spurning hlýtur að vakna hvers vegna gengið er beint til samninga við GGE án þess að skoða aðra kosti og hljóta spurningar að vakna ekki ósvipaðar þeim sem tengdust REI málinu á sínum tíma en þar átti m.a. að bjarga fjárhag GGE og eigendum þess með því að selja REI til einkaaðila á undirvirði. 

6. Tryggingum fyrir skuldabréfi að upphæð 6.290 milljónum ábótavant

Í áliti Guðmundar Kjartanssonar endurskoðanda hjá Deloitte dags. 10.júlí .09 sem lagt er fram sem umsögn sérfróðs aðila sbr. 65. gr. sveitastjórnalaga er sérstakklega á það bent að veðsetning hlutabréfanna í HS Orku fyrir andvirði skuldabréfsins sé ábótavant og dugi einungis fyrir höfuðstól skuldabréfsins og leyfi ekki nein vanskil vaxta, þá er sérstaklega á þetta bent í ljósi þess að frestunarákvæði á gjalddögum vaxta er í skuldabréfinu og er það niðurstaða umsagnar Guðmundar að semja hefði átt um annað og hærra hlutfall veðsetningar en gert er. 

Þetta eitt og sér, er næg ástæða fyrir alla bæjarfulltrúa til að samþykkja frestun á málinu í þeim tilgangi að fara betur yfir málið og tryggja fjárhagslega hagsmuni sveitarfélagsins í þessum viðskiptum. Í raun er hér um skyldu bæjarfulltrúa að ræða enda ber þeim skylda til að gæta eigna sveitarsjóðs.

7. Félögin eru í ábyrgð fyrir skuldum hvors annars

Á það skal sérstaklega bent að enn eru fjárhagsleg tengsl milli HS Orku og HS Veitna með þeim hætti að bæði félög eru í ábyrgð fyrir skuldum hvors annars eða það má segja að HS Veitur séu í ábyrgð fyrir skuldum HS Orku. Ekki er hægt að samþykkja þessi viðskipti fyrr en samþykki lánadrottna liggur fyrir um að þeir aflétti þessari ábyrgð.  Slíkt samþykki fékkst ekki þegar uppskipti fyrirtækjanna átti sér stað og engar líkur á að að slíkt samþykki fáist nú.

 

Við viljum ítreka  að það er álit bæjarfulltrúa A-listans að til að uppfylla 65. gr. sveitastjórnarlaga þurfi að liggja fyrir álit sérfróðs aðila á hagkvæmni þeirra viðskipta sem fram eiga að fara og að sérstakt verðmat á HS Veitum og HS Orku þurfi að liggja fyrir,  unnið af sérfróðum aðilum sérstaklega fyrir Reykjanesbæ.  Slíkt er í raun algjör forsenda þess að viðskipti geti átt sér stað.

Kjörnir bæjarfulltrúar hljóta alltaf að leggja áherslu á að störf þeirra séu hafin yfir allan vafa.  Þrátt fyrir sjálfstæðismenn séu ekki tilbúnir í umræðu um grundvallarspurningar við kjósendur sína um nýtingarrétt á náttúruauðlindum, gerum við þá kröfu til þeirra að viðskipti sem þeir ráðast í fyrir hönd sveitarfélagsins þoli að minnsta kosti dagsins ljós.

 

 

Ég þarf að fara á reiðistjórnunarnámskeið.

 

Ég þarf á reiðistjórnunarnámskeið.

 

Ég komst að því nú í kvöld að ég þarf að fara á reiðistjórnunarnámskeið. Ég hef nú hingað til gert lítið af því að sleppa mér og sumir segja að ég hafi meir að segja þolinmæði til að horfa á grasið gróa, en í kvöld sleppti ég mér..

 

Ástæða þess að ég sleppti mér var eitt af svörum bæjarstjórans í Reykjanesbæ þar sem gaf í skyn, að það væri ábyrgð Samfylkingarinnar og með hennar samþykki að sú staða sem bærinn er nú í gagnvart Fasteign

 

Þetta gerði hann í umræðum um málefni Hitaveitu Suðurnesja, og var áður búinn að útskýra á hátt útrásarvíkinganna hve góður og sanngjarn gagnvart bænum sá samningur er allur saman. Og með glærusjov í anda útrásarvíkinganna.

 

Hinn helmingurinn forstjóri GGE sýndi líka fram á hvernig hér réðu eingöngu góðar hvatir ferð, svo góðar að nokkrir sanntrúaðir vöknuðu um augum yfir örlætinu. Og þá fann ég hvernig blóðið fossaði um æðarnar og ég sprakk. Bað bæjarstjórann um að hætta þessu helvítis bulli, og fann um leið að tími var komin til að renna sér út fyrir til að kæla sig ögn. Og gerði það, og hafði svo ekki lyst til að fara inn á fundinn á ný.

 

Annars er það svo að eftir því sem aldurinn færist yfir mann og maður kynnist nýjum hliðum á sjálfum sér  kynnist maður einnig nýjum hliðum á umhverfi sínu, Og það fékk ég að gera líka í kvöld. Hvernig þeir sem ráða setja upp fundi þar sem einungis þeirra sjónarmið fær að koma fram.

 

Ég í einfaldleika mínum hélt að svona íbúafundir snérust um að menn fengju að segja skoðanir sínar á þeim hlutum sem til umræðu væru og jafnvel hafa smá formála að þeim spurningum sem þeir vildu spyrja. Fékk þó að vita hjá fyrrum næstum því formanni Framsóknarflokksins Hjálmari Árnasyni sem var fundarstjóri að svona yrði það ekki á þessum fundi. Þetta væri upplýsingafundur í lýðræðislegum anda, þar sem upplýst yrði hvað hefði verið gert og fólk gæti spurt spurninga um þá gjörninga, en alls ekki mætti láta í ljós skoðun sína á þeim. Þannig virkaði lýðræðið.

 

Ég ætla hér á eftir fylgja þær skoðanir og spurningar sem ég hafði ætlað að spyrja, en spurningar án  rökstuðnings fyrir þeim er náttúrulega gagnslaus hefði ég haldið. En svona virkar nú lýðræðið í Reykjanesbæ, og lítið við því annað að gera en að drífa sig á reiðistjórnunarnámskeið ætli maður að búa hér áfram. Veit einhver um eitthvað gott námskeið sem hægt  sem hægt er að taka?

http://kvistur.blog.is/blog/kvistur/entry/432985/

 

 

 

Hér á eftir er það sem ekki mátti segja að áliti fundarstjórans:

 

Fundarstjóri, ágætu fundarmenn.

 

Nú virðist vera  fátt sem þessi meirihluti  eftir á að selja nema þá helst Eldey og myndavélin, sem að vísu aldrei hefur virkað.

 

Nú höfum við í nærri tvo tíma fengið að njóta glærusýninga þeirra þremenninga sem fyrir einu hálfu ári sögðu að aðkoma GGE væri það sem til þyrfti til að tryggja rekstur HS til framtíðar. Reksturs sem þá var reyndar í miklu meira en í  góðu lagi. En er nú eftir aðkomu þeirra félaga á brauðfótum.

 

Og íbúafundur sá sem hér fer nú fram sýnir  að enn einu sinni byrja þessir herramenn á vitlausum enda og gera sem þá langar án þess að hugað sé að hagsmunum samfélagsins, sem þó hefur sent sín skilaboð í formi undirskrifta um að þeir telji ekki rétt að einkavæða HS.Þessi einkavæðing var til að mynda hreint ekki á dagskrá við síðustu kosningar.  Þá varðar lítið um það.Og spila fyrir okkur glærusýningu í anda stofnanda GGE , Hannesar Smárasonar þar sem reynt er að segja okkur að svart sé hvítt, og nú verði að nýta það tækifæri sem þeir hafa fundið.

 

Skiptir engu máli þó þegar hafi verið sagt við þá að þetta væri ekki það sem við vildum. Þeir segja að þetta eigi að vera leiðbeinandi íbúafundur, en leggja hér fyrir niðurstöður sem GGE hefur náð, og sá aumi meirihluti sem situr hér við völd samþykkt, þó ljóst sé að Reykjanesbær muni úm ókomin ár þurfa að lúta skilmálum GGE við að tryggja ýmsa hagsmuni þeirrra eins og glöggt kemur fram í samningsdrögunum.

 

Mig langar í framhaldi af þeirri skrautsýningu þeirra félaga og bara til að fyrirbyggja allan miskilning að vitna í orð þeirra  Árna Sigfússonar og Ásgeirs Margeirsonar í áliti sínu til iðnaðarnefndar Alþingis að spyrja nefndarmanninn og forseta bæjarstjórnar Reykjanesbæjar með leyfi fundarstjóra  um eitt atriði sökum þess að þessi viðskipti snúast að miklu leyti um að Reykjanesbær eignist nú 2/3 hluta í HS Veitum .

 

Þeir sega í áliti sínu" Forsenda þessa er þó að sérleyfisreksturinn verður að skila eigendum sínum arði. Tekjur af raforkudreifingu eru alfarið ákveðnar með tekjuramma sem settur er af Orkustofnun og samkvæmt lögum sem skylda dreifiveitunar til raunverulegs tapreksturs af þeirri starfsemi sinni. Að óbreyttu er því um taprekstur að ræða.

 

Af þessu tilefni og í ljósi þess að forseti bæjarstjórnar Björk Guðjónsdóttir  átti sæti í þeirri nefnd sem samdi lögin og er því sennilega manna fróðust um þau , var á einhvern hátt tekið á þessu máli, eða erum við hér í þessum samningum að taka á okkur rekstur dreifiveitna sem við núverandi skilyrði mun enn auka á þann skuldabagga sem meirihluti sjálfstæðismanna hefur steypt bæjarfélaginu í og er hin raunverulega átæða þess að nú þarf að selja hlut okkar í HS orku ?

 

Í ljósi þeirra upplýsinga sem nú eru komnar fram um að halda skuli bæjarstjórnarfund í Reykjanesbæ á morgun til að klára málið langar mig  einnig til að spyrja Ásgeir Margeirsson sem fimlega kom sér undan því fyrir helgi að halda fund með Grindvíkingum fyrr en á miðvikudag,og í ljósi þess að hann hafi allan tímann haft fulla vitneskju um þá atburðarrás sem nú er í gangi. . 

 

Í  hverra umboði ætlaði hann að fara á þann fund, því miðað við að bæjarstjórnin geri eins og Geysir Green ætlast til þá verður kominn á samningur milli Reykjanesbæjar og HS Orku um þessi landakaup. Er hann nú tekinn við bæjarstjórastarfinu líka? Eða ætlaði hann í anda sannra útrásarvíkinga á mæta á svæðið og segja  Sorry dönn díl.

 

Og svo kannski einni stuttri í lokin til Árna bjæjarstjóra í ljósi glæsileika þeirrar glærusýningar sem við sáum hér áðan. Hvaða glæruforrit er það sem þið Hannes Smárason notið?

 

 

 

 

 

 

 

 

Lýðræðinu nauðgað!!!!!

 

Hann lætur ekki að sér hæða bæjarstjórinn í Reykjanesbæ. Og nú liggur mikið á og boðar til íbúafundar í Duushúsum í Reykjanesbæ annað kvöld klukkan 20. Og maður yrði ekki hissa þó hann boðaði svo til bæjarstjórnarfundar daginn eftir til að klára málið. Sjáum hvað setur.

 

Kreppan er móðir allra tækifæra, sagði forsvarsmaður atvinnulífsisns skömmu eftir að kreppan hófst, og bæjarstjórinn hlýðir heldur betur því  kalli , jafnvel þó ljóst sé að vegferð sú sem hann hefur lagt í komi til með að kalla á stríð á Reykjanesskaganum með ófyrirsjánlegum afleiðingum fyrir bæði HS Orku, og Reykjanesbæ.

 

Það er með ólíkindum hve mikið liggur á í þessu máli, og miðað við þær fréttir og umfjöllun sem um málið  hefur fengið  skyldi hver meðalgreindur maður staldra við og athuga hvort sú vegferð sem bæjarstjórinn hefur valið til að klóra yfir klúður sitt í rekstri bæjarins sé sú rétta. En meirihlutinn í Reykjanesbæ hlýðir kalli GGE eins og viljalausir hundar , eins fram hefur komið í þeim samstarfssamningi milli GGE og Reykjanesbæjar sem til umfjöllunar hefur verið í fjölmiðlum undanfarið.

 

Það er öllum ljóst sem fylgst hafa með ferli bæjarstjórans að þar er ekki mikill rekstrarmaður á ferð, heldur þvert á móti. Eitt stærsta tölvufyrirtæki landsins var lagt í rúst á meðan hann var við stjórnvölinn, og var hann í framhaldi  fenginn  til að fara fyrir lista Sjálfstæðismanna í Reykjanesbæ, sem honum er að takast að koma á hausinn líka. En meirihlutinn þegir og finnst sá björgunarleiðangur sem nú er lagt í, í anda góðrar stjórnsýslu, þó ljóst sé að hér sé um hreina og klára nauðgun á lýðræðinu að ræða.

 

Fasteign,  hugarfóstur bæjarstjórans hefur ekki reynst sú snilld sem boðað var,  heldur þvert á móti er sú ráðstöfun orðin að snöru um háls bæjarfélagsins. Bæjarstjórinn getur því miður  ekki kennt kreppunni um þann hlut, því þar hafa maður undir mann reynt að aðvara hann og þar á meðal eigin flokksfélagar á frægum fundi  í Sjálfstæðishúsinu í Njarðvík löngu áður en sú kreppa sem nú er skall á.

 

Geysir Green Energy, fyrirtæki útrásarvíkinganna Jóns Ásgeirs, og Hannesar Smárasonar átti að vera bæði bjargvættur Reykjanesbæjar og Hitaveitu Suðurnesja, og óhætt að segja að slefan hafi lekið af andliti bæjarstjórans blessaða þegar hann fór hér um héruð með þeim manni. Reykjanesbær á hausnum og Hitaveita Suðurnesja er varla rekstrahæf eftir þá snilld og því verður nú að selja erlendum auðjöfrum hlut til að bjarga báðum. En það skal gert á skilmálum auðjöfranna og GGE en ekki bæjarins eins og samkomulag bæjarins og GGE hljóðar uppá. Hvað í þeim samning liggur fyrir meðlimi meirihlutans hefur ekki komið fram en gaman væri að vita.

 

Það má vel vera að í þessum pistli sé ég svolítið harðorður gagnvart brosmilda bæjarstjóranum sem hingað til hefur helst talað um hundaskít og hljóðmanir á þeim íbúafundum sem hann hefur haldið. Og þá boðað til þeirra með þeim fyrirvara að mögulegt sé að sækja þá. En sú aðferðafræði sem hann hefur nú lagt upp með og kallar á ónauðsynlegt stríð milli góðra granna krefst þess að málfarið sé örlítið misnotað og honum ekki í hag. Ég hvet alla þá sem eitthvað finnst athugavert við þá stefnu sem þetta mál er að taka að fjölmenna á íbúafund þann sem bæjarstjórinn boðar í minnsta mögulega sal sem hann gat fundið á svæðinu.

Og bendi einu sinni enn á blogg Láru Hönnu sem gert hefur þessari atburðarrás og tengingum ótrúlega góð skil.  http://larahanna.blog.is/blog/larahanna/

Bæjarstjórinn sem ekki má fá hausverk

 

Eftir höfðinu dansa limirnir stendur einhversstaðar, og undanfarnar vikur höfum við séð eða ekki séð hvernig meðlimir meirihluta sjálfstæðismanna dansa nákvæmlega eins og höfuðið ætlast til. Þar fer ekki mikið fyrir gagnrýnum spurningum um til að mynda hvernig það má vera að komin sé á sérstakur samtarfssamningur á milli GGE og Reykjanesbæjar um hvernig unnið skuli að því að GGE nái algerum yfirráðum í HS Orku? Enda kannski ekki verið tækifæri til að spyrja þessara spurningar þar sem bæjarstjórn er í sumarfríi, eins og fjölmargir aðrir þegnar þessa lands.

 

Bæjarstjórinn sem leggur mikið upp úr lýðræðislegum og vönduðum vinnubrögðum að eigin sögn tilkynnti að   haldinn skyldi borgarafundur um þetta mál, og að tíminn fyrir þann borgarafund yrði auglýstur um miðja síðustu viku. Ekki bólar  á því fundarboði enn, sem veitir manni þó þá von að verið sé að vinna að málinu, og bæjarstjórnarfundi þeim er er boðaður hafi verið á þriðjudag og ákveða átti málið hafi verið frestað. Nema náttúrulega bæjarstjórinn ætli sé að halda borgarfundinn samdægurs svo hann geti sagst hafa uppfyllt skilyrðin hvað varðar þann hluta mála. Það væri svo sem ekki ólíkt skilningi hans, og meirihlutans á lýðræðislegri hugsun

 

Öllum virðist okkur ljóst að senn kemur að ögurstund hvað varðar málefni HS Orku, og það góða fyrirtæki verði senn komið í hendur útrásarvíkinga og erlendra aðila. Og við íbúar Reykjanesbæjar sitjum uppi með dreifikerfi sem útilokað er að nokkurn tíma verði unnt að reka með  hagnaði. Nema leyfð verði hækkun á dreifikostnaðinum. Og þá erum það við sem verðum að borga. Hafa limirnir eitthvað velt því fyrir sér, eða spurt hvort það sé nú nákvæmlega það sem þörf er á nú þegar kreppir að.

 

Það virðist því miður vera ljóst að eyðslufyllerí meirihlutans á undanförnum 7 árum sé nú að koma í ljós, og selja verði síðustu kúna til að unnt verði að borga fyrir túnsláttinn í bænum, sem vel að merkja var ekki unnt að láta innanbæjarfyrirtæki, og skólabörn sjá um þetta sumarið.

 

Sá meirihluti sem núna situr hefur á mettíma tekist það sem fáum hafði dottið í hug að væri unnt.

 

Þeir hafa selt það sem eldri kynslóðir höfðu byggt upp og erft núlifandi kynslóðir að.  Og eytt öllu andvirðinu

Þeir hafa sóað því sem við öfluðum

Og það sem verst er þeir hafa skuldsett börnin okkar til langrar framtíðar

 

og allt þetta hefur gerst sökum þess að enginn útlimana  hafði hvorki dug né þor til að koma þeim skilaboðum upp í höfuðið að ekki væri allt með felldu. Þau þorðu ekki að segja bæjarstjóranum skoðun sína. Því þá gæti hann fengið hausverk og skapvonskukast samhliða því.

Þeir sem þráðinn spunnu stjórna enn.

 

Það hefur verið virkilega fróðlegt að fylgjast með hvernig umræða og athafnir hafa undanfarna viku hvað varðar kaup Geysis Green Energy á hlut Reykjanesbæjar í HS Orku. Mál sem í raun er nákvæmlega sama málið og REI málið forðum. Prinsippmál um nýtingu og afnotarétt auðlindanna og hvernig  útrásarguttarnir í samvinnu við meirihluta sjálfstæðismanna hafa reynt að telja okkur trú um  að  nauðsynlegt sé GGE verði það fyrirtæki sem fara skuli með nýtingarréttinn næstu 130 ár, ellegar verði ekki hér um neinar erlendar fjárfestingar í orkuiðnaði.

 

GGE sem er nánast gjaldþrota fyrirtæki að manni skilst hefur þó ekki enn sýnt frá á nein rök því til stuðnings að þetta sé svo sem þeir segja frá, og hvað þá heldur sýnt fram á fjárhagslega getu sína til að standa undir þeim skuldbindingum sem þeir segjast ráða við. Svo slæmt virðist ástandið á þeim bæ að framkvæmdastjóri fyrirtækisins hafði ekki hugmynd um hver staðan væri í sjónvarpsviðtali  en talaði digurbarkalega fyrst um nokkra milljarðar og bætti svo í til að fegra stöðuna að sennilega væru þetta bara nokkrir tuga milljarða, en jánkaði í að verið gæti að þetta væri kannski bara rúmlega hálfur milljarður. Enda útráarvíkingur af bestu sort, og finnst fjárhagsleg staða ekki skipta neinu meginmáli, bara að hann og félagar hans ráði meirihluta í fyrirtæki, þar enginn utan nokkurra jámanna hafa boðið þá velkomna.

 

Ljóst virðist vera af samtali sem blaðamaður Morgunblaðsins átti við forsvarsmann Magma Energy, sem nú vill kaupa 10, 8% hlut í HS Orku, að þeir virðast ekki vera neitt sérstaklega að sækjast eftir því að það verði GGE sem fari með nýtingarréttin, heldur fyrst og fremst vilja þeir kaupa lítinn hluta í HS Orku, og leggja því fyrirtæki til nýtt hlutafé, til þróunar og uppbyggingar. En þau voru svo sem svipuð rökin hjá GGE á sinum tíma þegar þeir vildu bara lítinn hlut til að sýna erlendum viðskiptaaðilum.

 

Það er því enn óskiljanlegra eftir því sem meira kemur fram í þessu máli hvernig menn fá það út að framtíðarrekstur HS Orku sé best tryggður með því að fátækt sveitarfélag, sem ekki einu sinni á fyrir túnslætti skuli vera best til þess fallið að taka að sér rekstur veitukerfis, sem hingað til hefur nú ekki verið að skapa þann arð sem þarf til að slík starfsemi standi undir sér. Og enn síður að sama sveitarfélag skuli þegar það er í ágætri stöðu til að skapa sátt um framtíðarnotkun og nýtingu orkunnar velja að fara í stríð við þá er helst gætu hjálpað til við lausn vandamálsins. Það gera þeir til að tryggja yfirráð GGE um aldur og ævi innan HS Orku. Sem að því er virðist sé ekki neitt kappsmál fyrir þá erlendu aðila er vilja þar kaupa lítinn hlut.

 

Það hefur skynið í gegnum allt þetta mál og málsmeðferð að illa eða ekki hafi verið haldið á hagsmunum almennings, heldur eingöngu hugsað um að bjarga GGE frá gjaldþroti. Það er nú út frá fjárhagshagsmunum GGE orðið að verkefni skilanefnda bankanna að taka stórar pólitískar ákvarðanir hvað varðar framtíðar nýtingu auðlindanna. Og það er gert að undirlagi þeirra sem þráðinn spunnu og sitja enn inni í bönkunum og stjórna atburðarrásinni, ásamt pólitíkusum sem ekki þora að standa á þeirri stefnu sem þeir þó sögðust hafa er lögin voru samin.

 

Kannski sýnir sú atburðarás sem hér hefur farið fram að ekkert hefur breyst, þeir sem vilja vaða uppi og ráðskast með hagsmuni þjóðarinnar út frá eiginhagsmunum geta það enn. Pólitíkusarnir eru komnir til baka í 2007, og hlusta ekki á hver vilji almennings er í málum sem þessum. Á sama tíma verðum við að blæða fyrir tryggingarfélög og Björgólfa sem ekki varðar baun um hver framtíð þessarar þjóðar er, bara að þeir komist undan þeim ábyrgðum sem þeir eiga með réttu.