Skyldi skipið passa inní ?

Undanfarna daga hefur Reykjanesbær verið mikið í fréttum, m.a. hefur verið fjallað um málefni löggæslu, álver í Helguvík og nú síðast í kvöld um málefni Þróunarfélagsins á Keflavíkurflugvelli, og úttekt ríkisendurskoðunar þar um.

Sitt sýnist hverjum um útkomu þess máls, og er það vel skiljanlegt er skýrslan er lesin. Gott er þó að fá það staðfest af ríkisendurskoðun að hagsmunum ríkisins hafi verið gætt við ráðstöfun eigna á svæðinu.  Það er gott.  Það er ljóst fyrir okkur íbúa svæðisins að mikið og gott uppbyggingarstarf hefur verið unnið og við getum verið bjartsýn á framhaldið.

Hitt er annað mál að óneitanlega er það ekki gott að ríkisendurskoðun skuli þurfa að verja svo stórum hluta skýrslunnar í umræður um vanhæfni og tengsl einstakra aðila. Þessa skýrslu ber að taka alvarlega og læra af henni. Gera þær breytingar sem ríkisendurskoðun krefst og vinna út frá henni. Eingöngu þannig næst að vinna það traust sem nauðsynlegt er til að verkefnið takist.

En eins og alltaf þá fær maður annað slagið fréttir sem koma manni  á óvart og maður veit ekki alveg hvort maður eigi að trúa.  Eina slíka fékk ég í dag og það finnst mér nú vera frétt dagsins ef sönn er.  Nú vinna menn hér við að byggja heljarmikið naust  fyrir víkingaskipið Íslending og húsið er byrjað að taka á sig mynd.  Ég lenti á spjalli við gamlan skipasmið og vorum við svona að ræða daginn og veginn þar til hann allt í einu víkur talinu að naustinu, og á hann kemur smá kímnisglampi vitandi það að ég er innahússarkitekt og að nú gæti hann sko strítt mér.  Þið "þarna arkitektarnir vitið aldrei hvað þið eruð að gera" segir hann.  Nú segi ég, hvað ertu að meina.  Sko ég fór þarna út eftir um daginn og ég gat ekki betur séð að ef þeir ætluðu að koma skipinu þarna inn með mastri, þá þarf að saga af mastrinu ca. tvo metra.  Mér brá náttúrulega svolítið en reyndi að bjarga kolleganum sem teiknað hafði húsið og sagði  "kannski þeir ætli að láta flaggið á mastrinu standa uppúr".  Hann horfði undarlega á mig og ákvað að ræða þetta mál ekki meira við mig. En hugsunin hefur ekki látið mig í friði í kvöld. Skyldi skipið passa inní?  Ég athuga það á morgun.

27/3 það kemst ekki inn með mastrinu!

þá hefur það verið staðfest að það sem maður hélt að væri sérhannaður skáli utan um vikingaskipið er fyrir eitthvað minna skip en 'Islending. Fór og mældi hve hátt skipið með mastri er og er það um það bil 19 metrar en gat ekki betur séð að húsið væri rétt um 14metra, smiðirnir á staðnum voru ekki vissir. Það þarf því að saga 4m af mastrinu í það minnsta.

 

Athugasemdir

[Brynjar Hólm Bjarnason, 27.3.2008 kl. 17:56]

Það er hægt að fella mastur á skipi og ekki nauðsynlegt að láta það standa uppi þegar skipið er í húsi. Spurðu bara hann Árna bróðir þinn, hann þekkir þetta vel. En það er nauðsynlegt að láta svona skip vera á sjó af og til. Til þess eru þau og þannig geymast þau best.

[Hannes Friðriksson , 27.3.2008 kl. 18:16]

Blessaður Brynjar

Ég þarf ekki að spyrja Árna um það hvernig maður tekur niður mastur og setur það upp aftur þegar farið er til sjós. Það hef ég sjálfur gert margoft.  Og þetta mál snýst ekki um það. Frá mínum bæjardyrum séð snýst málið um að ákveðið var að reisa safn í samvinnu ríkis og bæjar og einkaðila að einhverju leyti. Tilgangur safnsins er að segja sögu víkingana og gera þeirri menningu skil. Við eigum víkingaskip sem er höfuðsegulinn í þessu safni og mér finnst skrýtið þegar greinilegt er af lögun hússins að þar skuli standa víkingaskip með mastri og seglum, að ekki skuli valið að sýna skipið í fullri reisn, heldur sparaðir í burtu ca 4m af hæðinni. Ég er hræddur um að skipið verði eins og halaklipptur hundur þó ég viti vel að hundar hafi ekki hala heldur skott.

                 Bestu kveðjur

[Jóhann S Kristbergsson, 27.3.2008 kl. 18:41]

Gaman að þetta skuli vera komið í umræðuna en þannig vill til að ég var að vinna í newfoundland í vikunni og fór þarna niður eftir til að skoða naustið og ég spurði félaga minn bara að því hvort skipið ætti ekki að vera með rá og reiða þarna inni en ástæða spurningarinnar er að mér finnst þetta annsi lítið hús fyrir skip með mastri og seglum.  Það hlítur að vera nauðsynlegt að hafa skipið þannig innandyra ef það á að nýtast til kennslu og fræðslu um víkinga fyrri tíma. Svo er annað að það skuli eiga að setja upp víkinga heima þarna og skella síðan upp þessu húsi inn í miðja heimana.

[Brynjar Hólm Bjarnason, 28.3.2008 kl. 16:49]

Ég hef alltaf ímigust á húsum þar sem á að varðveita skip inni í. Það er svo erfitt að varðveita skip inni í húsi rakinn þarf að vera svo mikill hjá skipi sem verið hefur á sjó til að koma í veg fyrir að skipið rifni ekki. Og skip sem ekki eru á sjó hér á landi liggja alltaf undir skemmdum. T.d. er hægt að benda á kútter Sigurfara sem er uppi á görðum við Garða á Akranesi. Skrokkurinn á þeim bát er ónýtur. Síðast þegar ég skoðaði hann var það eina sem var nokkurnvegin heillegt var dekkið en það hafði líka verið endurnýjað eftir að báturinn var gerður upp. Að öðru leiti var hann orðinn einn fúahaugur, og var það aðallega vegna rangrar geymsluaðferðar.

Vasaskipið í Svíþjóð fékk sérstaka meðhöndlun svo að hægt væri að taka það upp úr sjó. Það var allt vaxborið eða bakað í vax.

Aðalbjörgin sem er í varðveislu Reykjavíkurborgar liggur líka undir skemmdum þar sem hún stendur uppi við Árbæjarsafn. Er það aðallega vegna þess að það varð gert samkomulag um að hún mætti ekki fara á sjó og sigla með farþega um sundin blá, til að hún væri ekki í samkeppni við skemmtibáta sem ekki eru til við Reykjavíkurhöf.

Því miður fara allir bátar sem á að varðveita, afsakaðu orðalagið, til fjandans vegna misskilnings.

[Hannes Friðriksson , 28.3.2008 kl. 21:57]

Blessaður Brynjar

nú er ég orðinn spenntur,hvað aðrar ráðstafanir en sjósetning geti komið til greina hvað varðar íslending. er þessi vaxaðferð eitthvað ?

[Brynjar Hólm Bjarnason, 31.3.2008 kl. 16:51]

Vasaskipið í Stokkhólmi var á einhvern hátt vaxborið. Nú er ég kominn til kort, þar sem ég veit ekki hvernig þetta var gert. En þetta var lausnin til að hægt væri að taka það upp úr vatninu sem það hafði legið í um 300 ár, svo það morknaði ekki niður á landi. Og síðan var því komið fyrir í húsi með tiltölulega háu rakastigi og nær alveg ljóslausu. Og svo er það hvernig okkur tekst að varðveita flota okkar sem við viljum endilega geima á þurru landi. og hvers vegna veit ég ekki, í staðin fyrir að vera með þessa báta í siglingu um sundin blá og leifa ferðamönnum að upplifa öldur Atlandshafsins á kropp og jafnvægisskyni