Á ég að biðjast afsökunar?

Það er eins og ég sagði í bloggi mínu í gær að hið pólitíska dægurþras tekur á sig hinar margvíslegustu myndir. Rétt í þessu er ég að kom úr bæjarferð þar sem tveir gallharðir sjálfstæðismenn tóku mig tali. Ástæða þess var að fyrir nokkrum dögum bloggaði ég um málefni EFF og afgreiðslu Bæjarráðs Reykjanesbæjar á því máli. Við þá afgreiðslu var ég ósáttur. Þeim fannst ég gefa til kynna í bloggi mínu að ég teldi að þeir bæjarráðsmenn væru að vinna fyrir aðra aðila og nánast kröfðust að ég bæðist afsökunar á orðum mínum.  Það sem ég taldi mig hinsvegar vera að segja er að mér fannst þeir ekki gæta hagsmuna Reykjanesbæjar nógu vel, og vitnaði til skýslu endurskoðanda bæjarins því máli til stuðnings, sem ályktaði ekki beint með þeirri ákvörðun sem tekinn var.

Eitt af því sem þeir félagarnir ræddu og það fannst mér sárt að heyra að miðað við hvernig ég tæki á málinu væri nánast útilokað að ég gæti talið mig Sjálfstæðismann. Í mínum huga tel ég mig vera það og sé ekkert í þeim skrifum sem ég hef látið frá mér fara gefa ástæðu til að álykta annað. Hitt er samt rétt að aldrei get ég talist til þeirra sem þar standa lengst til hægri, þ.e. frjálshyggjumaður. Og ég hef ekki hugsað mér að verða já maður skoðana sem ekki eru mínar. Svo aumur verð ég vonandi aldrei.

Hingað til hef ég litið á Sjálfstæðisflokkinn sem flokk margra skoðana, og þar væri hverjum frjálst að berjast fyrir sínum skoðunum, og þannig vil ég ég halda áfram að líta á hann. Ég benti þeim félögum á að það væri til dæmis haf og himinn á milli afstöðu sjálfstæðismanna í Reykjavík og í Reykjanesbæ hvað varðar afstöðuna um eignarhald á Orkuveitu Reykjavíkur og Hitaveitu Suðurnesja, og ekki hefði verið efast um sjálfstæðismennsku borgarfulltrúanna í Reykjavík á sínum tíma. 

Annar þeirra spurði mig hversvegna ég væri yfirleitt að skipta mér af þessu EFF máli og hversvegna í ósköpunum ég væri eiginlega að blogga um það. Því er til að svara fyrir það fyrsta að ég er íbúi í þessum bæ og hef því fullt leyfi til þess að hafa skoðanir á hverju því máli sem upp kemur og varðar bæinn og jafnframt að koma þeim skoðunum  á framfæri. Ég á ekki dagblað og ekki sjónvarpstöð og nenni í raun ekki að vera að trana mér fram í blöðin með greinarskrifum um hvaðeina sem mér kemur í hug. Bloggið er í raun góður miðill fyrir svona vangaveltur. 

Það sem mér finnst kannski mest dapurt í máli þessu öllu og þá á ég við bæði í málefnum HS og EFF að ekki skyldi hafa verið hægt að afgreiða þau á meðal okkar með þeirri samstöðu sem slík mál krefjast. Það hefði verið hægt með umræðu.

Athugasemdir

[Karl Ólafsson, 11.4.2008 kl. 21:37]

Ef það er frumskylda hvers sjálfstæðismanns að vera já-maður (hvers?; Davíðs?), þá held ég að titillinn sem slíkur sé ekki mjög eftirsóknarverður, hvað þá að hægt sé að bera hann með stolti.

Tek ofan fyrir því að þú tjáir þig samkvæmt samvisku þinni, en ekki flokkslínu. Þú skuldar þessum mönnum ekki afsökunarbeiðni, en öðru máli gegnir um þá. Í raun væri réttlætanlegt ef þú nafngreindir þá, svo aðrir megi vara sig á hræsni þeirra. Ég er ekki sjálfstæðismaður, en ég álít þig meiri og sannari sjálfstæðismann en þessir tveir strumpar geta talist samanlagðir.

[Haukur Nikulásson, 12.4.2008 kl. 00:05]

"Innrásin í Írak var rétt ákvörðun miðað við þær upplýsingar sem þá lágu fyrir!" var staðlað og lært svar frambjóðenda Sjálfstæðisflokksins sem ég kaus sjálfur í 30 ár. Það eru 5 flokkar á þingi. Það þýðir ekki að það séu 5 skoðanir um málin á hverjum tíma, en þér er ætlað að beygja þig undir vilja formannsins á hverjum tíma. Athugaðu að það er formaðurinn sem er einráður á hverjum tíma.

Fyrir þig er það þroskamerki að fara í gegnum það að vera talinn hálfgerður svikari fyrir að hafa aðra skoðun. Hjá mér brast traustið til forystunnar þegar hún misnotaði handhafavald forseta til að koma dæmdum þjófi aftur á þing og laug því blákalt í alþjóð að slík náðun væri alvanaleg. 

[Guðmundur Eyjólfur Jóelsson, 12.4.2008 kl. 08:35]

'Eg las nú yfir það sem þú skrifaðir um EFF ,gott væri ef þú settir þetta á mannamál svo allir skilji um hvað er verið að tala ,ekki er ég viss um að almenningur skilji hvað er verið að fara og hvaða hráskinnaleikur er hér á ferð ,en að biðjast afsökunar á því að hafa skoðun á hlutum og vera á móti því sem flokksforystan  er að gera þá í þessu tilfelli í Reykjanesbæ .Ég tek ofan fyrir mönnum sem þora að l+áta ljós sitt skína

[Óskar Arnórsson, 13.4.2008 kl. 17:24]

Hannes! Takk fyrir góðan pistil!

Það er ekki vinsælt að segja sannleikann um sum mál!. Og þetta með OR ertu með rétta skoðun. Er hrifin af kommentinu hans Hauks Nikulássonar..

Það væri undarlegt að biðjast afsökunar á að segja sannleikann Hannes! Bara mín skoðun og það eru nokkrir búnir að átta sig á þessu OR máli..

Karl og Ægir eru með flott og heiðarleg komment, bara mín skoðun. Og ég myndi taka haattinn ofan fyrir manni eins og Guðmundi, sérstaklega síðustu setningunni.

Ég á bara engan hatt, en undirstrika virðingu mína fyrir heibrigðri skynsemi og þekkingarleysi mínu á Íslenskum stjórmálum, sem eru á algjöru núlli miðað við alla hér að ofan! 

[Thelma Björk (IP-tala skráð) 13.4.2008 kl. 17:54]

..þegar menn eru farnir að heimta afsökunarbeiðni vegna skoðannamismunar þá eru nokkrar skrúfur lýðræðisins lausar....verum sammála um að vera ósammála....berum virðingu fyrir skoðunum náungans...og áttum okkur á því að líkurnar á því að allir séu alltaf á sömu skoðun eru stjarnfræðilega litlar.....mér finnst svonalagað hallærislegt og mér finnst þú svalur.....takk Hanneskí!

[Hannes Friðriksson , 13.4.2008 kl. 18:50]

Blessuð öllsömul

Ég þakka kærlega fyrir allar athugasemdirnar, þær eru mér mikils virði

                           Hannes