Hókus Pókus ?

 

 

 

Það er náttúrulega alveg ferlegt að vera þeirri náttúru gæddur að í hvert skipti sem gullpening er veifað framan í andlitið á manni efist maður. Auðvitað er þetta slæmt, en maður telur sig þó vera að læra. Ég hef lært að ef það eru of margir byggingarkranar á einum stað, þá er líklegra en ekki að allt hrynji í hausinn á manni innann skamms. Þess vegna er ég byrjaður að hugsa mig aðeins um núna áður en ég rétti út lúkuna og þigg gullpeninginn.

Við höfum nú undanfarið fylgst með þeim framsóknarmönnum og undir það hefur tekið fyrrum útrásarvíkingur og aðstoðarmaður forsætisráðherra Tryggvi Herbertsson  sjálfstæðismaður að ekkert mál sé að fella niður skuldir okkar allra og fyrirtækjanna um heil tuttugu prósent. Hókus Pókus. Einhvern tima var sagt "Ef eitthvað hljómar of gott til að vera satt, er það líklega ekki satt" en þó fnnst mér nú vert að athuga hvort rétt sé til að missa ekki af neinu ef ég hef rangt fyrir mér hvað hugboð mitt varðar.

Er það virkilega svo að hægt sé að fella niður skuldir að upphæð ca 600 milljarða án þess að nokkur þurfi að greiða fyrir það? Og koma þessar niðurfellingar skulda til með að hjálpa öllum jafnt.. Er ekki verið að leika Hróa Hött með öfugum formerkjum, því þeir sem skulda mest eru yfirleitt stór fyrirtæki og þeir sem mestar hafa tekjurnar fá langmestar niðurfellingar óháð þeirri stöðu sem þeir eru í.  Er þetta ekki svolítið útrásarleg hugmynd? Að verið sé að fella niður skuldir hjá þeim er ekki þurfa á því að halda, en nýtist þeim ekki sem verst eru staddir, svo þar þarf að koma til sérstakra aðgerða af hálfu stjórnvalda eftir sem áður.

Nú er það svo ef ég hef skilið þetta rétt þá koma þeir 600 milljarðar sem Hróarnir hafa ánafnað okkur nú korteri fyrir kosningar til niðurfellinga skuldanna úr sjóðum bankanna, og af þeim fara 150 milljarðar til niðurfellingar skulda heimilanna og 450 til niðurfellingar skulda fyrirtækjanna.

Er það vitlaust skilið hjá mér að það sé ríkið sem þurfi að endurfjármagna bankanna og sú upphæð sem þarna fer út bætist þá ofan á endurfjármögnunina og þurfi að greiðast úr vösum landsmanna í formi hækkaðra skatta eða sparnaðar í til að mynda mennta og heilbrigðiskerfi? Og hverjir verða það sem verða að bera kostnaðinn af niðurfærslunni hjá þeim bönkum og fjármálastofnunum sem ekki eru í eigu ríkisins?

Eitt er það sem snýr beint að bönkum þeim sem hér eru starfandi innnanlands og annað hvað varðar þá er nú eiga til að mynda kröfur á íslensku bankanna. Myndu þeir án þess að það hefði nokkrar afleiðingar seinna meir vera tilbúnir í samþykkja slíkan gerning? Mundi slíkur gerningur ekki hafa varanleg áhrif  með alvarlegum afleiðingum á alþjóðaviðskipti og atvinnulíf. Yrðu einhverjir tilbúnir til að halda áfram að aðstoða okkur út úr þeim ólgusjó sem við nú erum í færum við þessa leið? Ég leyfi mér að efast.

Einhvern veginn finnst mér þessi hugmynd eftir því sem ég velti henni betur fyrir mér ekki vera að virka, frekar en þeir byggingarkaranar sem nú standa ónotaðir víðsvegar um landið.

Mér finnst of mörgum spurningum ósvarað og kaupi það ekki frekar en í aðdraganda fallsins að hægt sé að finna peninga sem ekki þarf að borga fyrir. Fæ einhvern veginn á tilfinninguna að hér sé meira um kosningahugmynd að ræða , og hreinan flótta frá vandamálinu frekar en raunsæja tillögu til lausnar.

 

 

 

Athugasemdir

[G. Valdimar Valdemarsson, 18.3.2009 kl. 11:31]

Ein athugasemd:  Framsóknarmenn tala ekki um að fella niður skuldir í gömlu bönkunum, þar liggja eftir skuldir útrásarvíkinga og sukk eyðslu skuldir fyrir einkaþotum og snekkjum.  Það er enginn að tala um niðurfellingu þeirra.

En ég bendi þér á frétt á RUV þar sem fram kemur að erlendir kröfuhafar telja ríkisstjórnina vera að stela vegna þess að afskriftirnar sem þeir eru að taka á sig eiga ekki að fara til þeirra sem skulda heldur mynda eigið fé og afskriftarsjóði í nýjum bönkum.   Það er rán... ekkert annað.  Menn afskrifa ekki skuldir sér til gamans heldur til að tryggja betur að eftirstöðvarnar séu greiddar.   Þær verða ekki greiddar ef afskriftunum er stolið.

[Hannes Friðriksson , 18.3.2009 kl. 11:56]

Blessaður Valdimar.

Það sem ég er að reyna að segja er að með flatri niðurfellingu skulda um 20% munu þeir sem mest skulda í þessu tilfelli tekjuháir og fyrirtæki fá mestu niðurfellinguna. Svo ég setji þetta nú í samhengi fyrir þig sem þú skilur og hefur veriðí umræðunni undanfarna daga. Væri til að mynda alveg sjálfsagt að færa niður skuldir HB Granda um 20% á sama tíma og þeir greiða sér arð upp á 8% og neita að hækka laun verkafólksins. Er ekki nauðsynlegt að nýta það svigrúm sem er á þá staði þar sem er þörf?

[G. Valdimar Valdemarsson, 18.3.2009 kl. 12:05]

Hver á að setjast í dómarasæti og meta hvar aðstoðarinnar er þörf og hvar ekki?   Hvað á samfélagið að bíða lengi eftir þeim niðurstöðum?   Hvað má brjóta niður marga einstaklinga og sundra mörgum fjölskyldum á meðan matið fer fram? Hversu mörg lítil fyrirtæki eiga að fara í gjaldþrot á meðan?  Hversu mikil verðmæti mega tapast á meðan?  Skýrsla Seðlabankans um stöðu heimilanna í landinu segir að 14.000 heimili eigi ekki lengur eignir á móti skuldum og 30.000 til viðbótar séu í bráðri hættu á að lenda í sömu stöðu.  Hvað á að bíða lengi eftir Samfylkingunni? 

[Gísli Baldvinsson (IP-tala skráð) 18.3.2009 kl. 12:16]

Bara að kynna sér frumvörp G. Valdimar. Fyrir Alþingi liggur frumvarp til laga um greiðsluaðlögun. Hvað tefur? SJÁLFSTÆÐISFLOKKURINN

[Hannes Friðriksson , 18.3.2009 kl. 12:20]

Ekki ætla ég að setjast í dómarasætið, en rt þú bara ekki að segja nákvæmlega það sama og ég að það eru þessi heimili og fyrirtæki sem eru í bráðum vanda sem á að hjálpa en ekki dreifa kröftunum út um allt ,jafnvel þar sem þeirra er ekki þörf?

[G. Valdimar Valdemarsson, 18.3.2009 kl. 13:11]

Gísli ég sat í nefnd skipaðri af viðskiptaráðherra til að skrifa frumvarpið um greiðsluaðlögun.  Ég veit hvað þar stendur og hvaða ferli fer í gang þegar einstaklingur óskar eftir greiðsluaðlögun.  Ég veit líka hvert fyrirmyndin að frumvarpinu er sótt og hvaða þjóðfélagshópi því var ætlað að hjálpa.   Að ætla sér að nota greiðsluaðlögun núna sem lausn fyrir allt að 50.000 fjölskyldur í landinu og setja þær í 5 ára skuldafangelsi í boði Samfylkingarinnar og ASÍ er að mínu mati óðs manns æði.

Hannes það sem ég er að segja er að það getur verið jafn erfitt fyrir þann sem er með milljón á mánuði og skuldar 50 milljónir að standa í skilum eins og þann sem er með 200 þúsund og skuldar 10 milljónir.   Hrunið kemur við alla skuldara og forsendur þeirra alla eru brostnar vegna þess að stjórnvöld sváfu á verðinum og bankarnir tóku sér stöðu gegn viðskiptavinunum.   Greiðsluvilji þeirra sem berjast í dag hverfur eins og dögg fyrir sólu ef þeir þurfa að komast í ákveðin vanskil til að fá hjálp.   Það verður að bæta öllum skuldurum fyrir vanrækslu stjórnvalda og svik bankanna.