Eins og að skvetta vatni á gæs

 

Undanfarna mánuði hafa dunið yfir okkur fréttir um margt sem miður hefur farið í stefnu og uppbyggingu atvinnutækifæra  meirihluta sjálfstæðismanna  í Reykjanesbæ.  Við höfum séð hvernig mörg þau verkefni sem í gangi hafa verið hafa ekki verið hafin yfir vafann um pólitíska spillingu eða hagsmunatengsl.

Nægir þar að nefna svonefnt Motorparkverkefni , og  kaup bæjarins á svonefndu Rammahúsi. Fleiri verkefni mætti telja; Nikkelvæðið, málefni Fasteignar ,fasteignakaup á Keflavíkurflugvelli og að ekki sé sé talað um sölu bæjarins á hlut sínum í Hitaveitu Suðurnesja, þar sem forystumenn meirihlutans hafa leikið lykilhlutverk.

Bókun minnihluta Samfylkingar í bæjarstjórn Reykjanesbæjar um að fram fari könnun á spillingu í stjórnkerfi bæjarins hefur vakið viðbrögð meirihlutans sem fæstir áttu von á. Forystumenn meirihlutans velja að koma af fjöllum og virðast ekki skilja i neitt í neinu um hvað þetta mál fjallar. En að taka  undir slíka bókun sem hreinsa myndi loftið er þeim fjarri lagi.

Það er ljóst að embættismenn  bæjarins vinna undir oki sterks meirihluta. Og það er nauðsynlegt að skapa  þeim þau starfskilyrði að þeir séu hafnir yfir allan vafa  og geti unnið sín verk óháð hverjir fara með hin pólitísku völd.  Slík nefnd sem þarna er lagt til að verði skipuð gæti eytt þeim vafa. Það væri af hinu góða.

Það hlýtur einnig að vera af hinu góða og í anda góðrar stjórnsýslu að enginn njóti sérréttinda sökum kunningjatengsla, stjórnmálaskoðana, eða fjárstyrks þegar kemur að samskiptum sínum við bæjaryfirvöld. Þar eiga allir að standa jafnir.  Hafi eitthvað slíkt átt sér stað, myndi slík nefnd einnig gefa tilefni til endurskoðunar á  þeim starfsreglum  sem hugsanlega umbuna sumum á kostnað annarra. Þar þarf að eyða öllum vafa.

Það verður ekki séð af bókun þessari að hún sé sett fram til að efast um heiðarleika eins eða neins, eins og bæjarstjóri Reykjanesbæjar velur að líta á málið.  Hún virðist eingöngu sett fram til að hreinsa loftið og gera meirihlutanum kleift að hreinsa sig af þeim orðrómi sem í gangi hefur verið.

Bæjarfulltrúar Samfylkingar sýna með þessari bókun að þeir eru tilbúnir til að takast á við erfitt viðfangsefni. Viðfangsefni sem til er komið sökum viðvarandi rekstravanda bæjarins í boði meirihluta sjálfstæðisflokksins . En til þess að leysa viðfangsefnið með hag bæjarbúa að leiðarljósi þarf stefnubreytingu og  samstarfsvilja. Viðbrögð forystumanna meirihlutans við bókun þessari sýna að þess er ekki að vænta.

Það virðist því miður vera eins og skvetta vatni á gæs að reyna að koma meirihluta sjálfstæðismanna til hjálpar við að vinna traust sitt á ný.  Framundan er tími þar sem samstarf flokkanna í bæjarstjórn verður  mikilvægara en nokkru sinni fyrr.  En til þess að samstarf náist sem byggist á trausti, verður allur sannleikurinn að vera upp á borðinu. Þessari tillögu er eingöngu ætlað að fá allan sannleikann á borðið. Því ætti meirihluti sjálfstæðismanna að fagna í stað þess að teygja lopann, sem kominn er að því að slitna.

Athugasemdir

[Aðalsteinn Agnarsson, 9.9.2010 kl. 22:20]

Hannes, samfylkingin lofaði frjálsum handfæraveiðum. Árni ætti nú að koma með þrýsting ,

að þeir efni þetta loforð. Þetta mundi ekki kosta krónu, en skapa  fólki vel launaða vinnu líf og fjör,

getur þetta verið einfaldara.