Þetta er mín skoðun

Þriðjudagur, 12. ágúst 2008

Nýju fötin keisarans?

Heilbrigðisráðherra Guðlaugur Þór Þórðarson er hreint ekki fjölmiðlafælinn maður þegar kemur að því að tíunda það sem vel hefur verið gert á því ári sem hann hefur setið í embætti heilbrigðisráðherra þjóðarinnar. Í morgun birtist heljarmikil grein í Morgunblaðinu þar sem hann fer yfir þann frábæra árangur sem hann hefur náð við stjórn heilbrigðismála, sá árangur virðist vera góður ef marka má innihald þessarar greinar, og hreint ekki ástæða til að gera lítið úr því. Árangur sá virðist þó eingöngu bundinn við Reykjavík og Landspítalann, kjördæmi þingmannsins.

Einhvern veginn birtist þessi grein mér sauðsvörtum Suðurnesjamanninum þó svipað og sagan um nýju fötin keisarans, þar sem ráðherrann spásserar um götur Reykjavíkur og kjördæmis síns, í þeim flottustu jakkafötum sem fundist hafa, en renni hann suður með sjó er hann því miður allsnakinn. Það er erfitt fyrir okkur hér á Suðurnesjum að bæði sjá og finna þann árangur sem ráðherrann talar um í grein sinni.

Ekki er nema tæpur mánuður frá því að boðuð var lokun síðdegisvaktar heilsugæslu svæðisins, var frestað, á meðan leitað væri leiða til að koma fjármálum Heilbrigðisstofnunar Suðurnesja í viðunandi horf. Hvort einhver sú leið hefur verið fundinn eða sé í sjónmáli hefur ekkert frést af , enda ráðherrann eins og margir aðrir verið heldur fjölmiðlafælnari hvað þetta mál varðar, sennilega vegna þess að ekki sé hægt með neinum rökum að halda því fram að árangurinn hér sé jafn góður og í kjördæmi ráðherrans.

Ekki ætla ég mér að fara út í það að útskýra hversvegna vandamál HSS eru þau sem þau eru, þar finnst mér tilkynning forstjóra HSS, þar sem hún tilkynnti fyrirhugaða lokun á sínum tíma segja allt sem segja þarf. Fjárveitingar til HSS eru allægstu sem þekkjast á landinu, hvort sem miðað er við fólksfjölda, landsvæðis,eða jafnvel veiddra sela úr sjó, enda erfitt að sjá út frá fjárveitingunni við hvað er miðað.

Styrktarfélag Heilbrigðisstofnunarinnar , og Bæjarráð Voga eru einu aðilarnir sem hingað til hafa ályktað hvað varðar þau vandamál er HSS á við að etja, og hafa séð að í heilbrigðismálum á Suðurnesjum , er ráðherrann nánast óklæddur. Aðrir hafa valið að líta blinda auganu til og samþykkja að fötin sú bara flott.

Skv. ályktun styrktarfélagsins kemur meðal annars fram að sá listi yfir fjöldi aldraðra sem í brýnni þörf eru fyrir þjónustu hefur lengst á svæðinu en ekki styst eða verið útrýmt eins og ráðherrann vill meina að gert hafi verið í Reykjavík.

Einnig er ljóst að íbúar Sandgerðis, Garðs og Voga þurfa enn í dag að sækja alla sína heilbrigðisþjónustu til Reykjanesbæjar eða Grindavíkur, þrátt fyrir að gert sé ráð fyrir að sú þjónusta sé veitt í bæjarfélögunum sjálfum, enda svipað hér og víðast hvar annar staðar á landinu að engar almenningssamgöngur eru á milli bæjarfélaganna.

Það er líka ljóst að enn hefur ekki verið opnuð sólarhringsvakt á skurðstofum sjúkrahússins, og ekki á hreinu hvort svo verði á þessu ári. Það er mikið öryggisatriði fyrir íbúa svæðisins.

Á meðan ráðherrann gerir ekkert eða lítið í þeim málum er viðkoma heilbrigðismálum á Suðurnesjum, hvorki málar húsnæði stofnunarinnar eða sér til þess að nægt fjármagn fáist til að veita þá lögbundnu þjónustu er honum er ætlað, er harla erfitt að trúa á slíka grein sem þarna birtist.

Flokkur: Stjórnmál og samfélag | Facebook

Athugasemdir

Auðvitað er staðan ekki skemmtileg hjá HSS, en ég hef fulla trú á því að Guðlaugur og hans fólk í heilbrigðisráðuneytinu er að fara yfir málin og vona ég til að með aukafjárlögum í haust verði glaðningur handa HSS. En ég bara skil ekki alveg reksturinn hjá stofnuninni og velti fyrir mér hvort ekki þurfi að leggjast yfir reksturinn og skipuleggja upp á nýtt. Við vitum það báðir Hannes að skuldir stofnunarinnar voru nýlega þurrkaðar út ! Samt er stofnunin í vanda ! Það þarf að skoða málið heilstætt frá öllum hliðum málsins.

Árni Árnason, 14.8.2008 kl. 00:54

Það vona allir að mál þetta verði leiðrétt og og við íbúar á Suðurnesjum komum til með að njóta þess sama og aðrir landsmenn hvað varðar fjárveitingar til heilbrigðismála. Í augnablikinu erum við því miður annars flokks borgarar hvað þennan hlut varðar. Reikna með að þú hafi kynnt þér þær tölur sem voru kynntar af forstjóra HSS, fyrir um það bil 2. mánuðum síðan. En ef ekki set ég hér nokkrar af þeim á blað sem þú gætir velt fyrir þér.

Árið 2007-2008 er íbúafjöldi á svæði HSS 20.446 og skv fjárlögum þess árs er veitt 78.734 kr á íbúa á svæðinu til heilbrigðismála. Lítirðu svo til Vestmannaeyja er sama tala 159.002, á Suðurlandi er þessi tala 101.013, á Akranesi 147.789, á Blönduósi 191.261 og á Sauðárkróki 200.976 krónur . Ég held Árni minn að þessar tölur ættu að segja þér talsvert og í raun eðlilegt að þetta sé leiðrétt.

Auðvitað er alltaf sjálfsagt að endurskoða rekstur hverrar stofnunar og það tel ég bara af hinu góða. Fari maður til dæmis eftir þessum tölum og ýmindaði sér að HSS fengi svipaðar fjárveitingar og bara þeir er næstir koma sem Heilbrigðistofnun Suðurlands vantar uúmlega 400milljónir þar uppá upp á og svo eykst bara munurinn og miði maður við þá er mest hafa er þessi munur orðinn um það bil 2, 5 milljarðar. Ég held Árni minn að kannski ættirðu að velta fyrir þér hvort ekki rétt í beinu framhaldi af þessum tölum hvort ekk sé hér bara um nokkuð góðan rekstur að ræða, og raunar með ólíkindum að hægt sé að reka þetta fyrir þennan pening.

Hitt er annað fyrir mann sem skoðar mál jafn heilstætt og þú nú velur að gera, hvernig standi á því að það eru einmitt stofnanir í okkar kjördæmi sem minnst fá. Getur það verið að þeir þingmenn sem með okkar mál fara séu bara handónýtir í að vinna fyrir okkur íbúa svæðisins, og höfum við þó fjármálráðherran í okkar kjördæmi.