Ljós í myrkrinu.

Mitt í öllu krepputali og fári birtast inn á milli fréttir sem vekja mann upp og maður lýtur höfði í virðingu fyrir því sem vel er gert. Ein slík frétt birtist nú í morgun  á vef Víkurfrétta. Á tveimur árum hefur öðlingurinn Sigurður Wium fært Heilbrigðistofnun Suðurnesja gjafir til tækjakaupa sem er rúmlega þrisvar sinnum framlag ríkisins til tækjakaupa stofnunarinnar.

http://vf.is/Frettir/37797/default.aspx

Undanfarna mánuði hefur Heilbrigðistofnun Suðurnesja reynt að vekja máls á bágri fjárhagsstöðu sinni , og menn hafa fyllst bjartsýni á að úr yrði leyst. Ágætur maður kom hér á síðuna fyrir skömmu og vændi mig um neikvæðni og svartsýni , er ég  lét í té efasemdir um að þær baráttuaðferðir sem beitt hefði verið,  kæmu til með að skila árangri. Sú baráttuaðferð var þögnin. Látið engan heyra að stofnunin sé í vandræðum, við munum klára þetta innan flokksins.

Nú er ljóst að sú baráttuaðferð hefur skilað minna en engu. Áætluð framlög til stofnunarinnar fyrir næsta ár hækka um 100 milljónir, og ná ekki að halda í við launabreytingar og almennar hækkanir verðlags. Ljóst er að HSS mun þurfa að skera niður einhvern hluta starfseminnar næsta ár, verði ekkert að gert.

Það er ljóst nú í því árferði sem fer í hönd, að grunnstofnanir þjóðfélagsins þurfa í ríkara mæli að reiða sig á öðlinga eins og Sigurð Wium, mönnum  sem er ekki sama um umhverfi sitt og bjarga frekar málum sjálfir frekar en að bíða eftir úrlausnum stjórnmálamannanna. Sem  eins og í tilfelli HSS hafa verið engar.