Hvernig ætla menn að leysa úr þessu?

Maður er náttúrulega alveg hættur að kippa sér upp við fréttir af þessu tagi hvað varðar Hitaveitu Suðurnesja. Þetta bara sýnir og sannar að þeir sem þarna hafa komið að málum, og þá á ég við einkvæðingarnefndina sem ákvað að sala rikisins á 15% hlutnum færi fram, án þess að nokkrar reglur um eignarhald hvorki á auðlindum eða dreifikerfum lágu fyrir,og svo fjármálaráðherrann sem lét söluna fara fram, annað hvort gerðu þetta í ákveðnum tilgangi eða höfðu ekki minnstu hugmynd um hvað þeir voru að gera. Ég hallast að því síðarnefnda. Það verður fróðlegt að sjá hvernig þessi snillingar ætla að leysa þetta.

OR má eiga 3% hlut í Hitaveitu Suðurnesja

Umsögn Hollvina Hitaveitu Suðurnesja um breytingar á lögum á orkusviði.

Að undanförnu höfum við íbúar á Suðurnesjum lesið um umsagnir er sendar hafa verið inn til iðnaðarnefndar er varða breytingar á nokkrum lögum á auðlindasviði. Þær umsagnir hafa sennilega verið sendar inn að ósk nefndarinnar þar að lútandi.  Á síðastliðnu hausti efndi ég til undirskriftarsöfnunar um málefni Hitaveitu Suðurnesja þar sem þátt tóku rúmlega

helmingur kjósenda til bæjarstjórna í síðustu kosningum. Það er ljóst að sú staða sem Hitavita Suðurnesja er í dag, er ekki sú staða sem fyrrverandi eigendur hennar þ.e íbúar svæðisins hefðu viljað sjá hana í. Ég hef því dag sent inn til iðnaðarnefndar óumbeðið fyrir hönd okkar sem köllum okkur Hollvini Hitaveitu Suðurnesja meðfylgjandi umsögn sem skýrir sjónarmið okkar til lagafrumvarpsins gagnvart nefndinni. Athugið að hér er eingöngu um álit þeirra að ræða sem kalla sig Hollvini Hitaveitu Suðurnesja, en ekki endilega skoðun þeirra er skrifuðu sig á undirskriftarlistana í nóvember, til allra þeirra hefur ekki náðst.

Skrár tengdar þessari bloggfærslu:

• umsögn hollvinana

Er umræðan ekki komin svolítið á villigötur?

Undanfarnar vikur hafa verið umræður um rekstrarvanda Lögreglustjóraembættisins hér á Suðurnesjum. Umræðan hefur snúist um hugsanlega uppskiptingu embættisins og hverjar afleiðingar slíkrar uppskiptingar kynni að verða. Tillögur dómsmálaráðherra hvað varða uppskiptinguna hafa mælst illa fyrir hér á Suðurnesjum, í ljósi þess árangurs er náðst hefur. Og menn óttast að uppskipting sem þessi gæti komið niður á frekari árangri lögreglu og tollgæslu. Það er skiljanlegt.

Sá árangur sem náðst hefur byggir að miklu leyti á góðu samstarfi tollgæslu og lögreglustjóra-embættisins,  í samvinnu við greiningardeild ríkislögreglustjóra.

Nú virðist svo vera að umræðan sem í byrjun snérist um rekstarvanda embættisins og hugsanlegar leiðir til að mæta honum sé byrjuð að snúast um hver stjórni þessu embætti. Ég hef sjálfur hér í fyrri bloggum mínum lýst yfir ánægju með störf Jóhanns Benediktssonar, enda sá árangur sem hann og lið hans með samvinnu við greinigardeildina verið góður. Það verður aldrei af þeim tekið.

Það að umræðan hafi snúist frá hinu upprunalega vandamáli og að persónu Jóhanns finnst mér hins vegar skrýtið. Málið snýst náttúrulega fyrst og fremst um það fé sem veitt er til embættisins og hvernig því er varið. Það snýst líka um hvort uppskipting á þessu embætti sé heppileg. Ljóst er að skv fjárlagafrumvörpum undanfarinna ára hefur embættið  farið yfir á fjárlögunum. Vandi þess hefur hingað til verið leystur og er það vel. Þetta er fé sem við skattborgararnir leggjum til og það er er á ábyrgð forstöðumanns hvers embættis að nýta það á sem bestan hátt.  

Nú er það ljóst að öryggisgæsla sú sem framkvæmd er í Leifsstöð, uppfyllir fullkomlega þær kröfur sem til hennar eru gerðar, og er í raun til fyrirmyndar þar sem hún auk þess stendur vel undir þeim kostnaði af henni hlýst. Sá kostnaður er greiddur af öryggisgjaldi sem innheimtur er af hverjum farmiða. Það er ljóst að ekki kemur umframkeyrsla stofnunarinnar þaðan. Enda ekki verið að oflauna þá starfsmenn.

Nú er það ljóst að lausn þessa vandamáls getur aldrei falist í því hvort það sé Jóhann Benediktsson eða einhver annar sem stjórni því, heldur hlýtur lausnin að felast í því hvort hægt sé að finna leið til að reka embættið fyrir það fé sem því er skammtað á fjárlögum. Ef ekki þá leiðrétta menn það.Menn verða að sýna framá svo óyggjandi sé að sú leið sem valinn verður, verði ekki dýrari en sú sem nú er, og sú leið tryggi bæði íbúum svæðisins og flugfarþegum það öryggi sem lögin kveða á um  Það finnst mér sanngjarnt gagnvart skattborgurnum. 

Er að kvikna á perunni?

Í morgun gerði ég það sem frúin á heimilinu hafði lagt fyrir mig að gera. Á meðan hún fór hamförum með húsið eins hvítur stormsveipur og þurrkaði rykið var mér gert að fara yfir blaðabunkann sem borist hafði í vikunni og koma honum út í ruslatunnu. Hún veit hvar mitt svið liggur. Það er náttúrulega ómannnúðlegt að ætlast til þess að maður sé kominn á fullt kl 8 á sunnudagsmorgni í  tiltektir. Svo ég ákvað að gera það á minn hátt pollrólegur og las blöðin yfir, fékk mér kaffibolla og naut stundarinnar.

Við lesturinn fann ég litla grein í Mbl. frá föstudeginum 11.apríl sem mér hafði einhvern veginn yfirsést og fjallaði um umsagnir sem sendar höfðu verið í sambandi við orkufrumvarp iðnaðarráðherra. Fjallað er um umsögn Hitaveitu Suðurnesja sem hlýtur að vera send inn í nafni stjórnar HS. Þar kemur margt á óvart.

Nú er ljóst að það sami maður sem situr sem stjórnarformaður Hitaveitunnar og kynnti fyrir okkur íbúum Reykjanesbæjar sem bæjarstjóri Reykjanesbæjar  5 samningsmarkmið er bærinn skyldi hafa að leiðarljósi. Eitt af þeim samningsmarkmiðum var að tryggt skyldi að opinberir aðilar færu með meirihluta í bæði dreifikerfum og sölu á heitu vatni og rafmagni.  Miklum meirihluta bæjarbúa leist ekki á þessi samningsmarkmið,enda væri þetta upphafið að frekari einkavæðingu hitaveitunnar en orðið var og töldum ekki rétt að út í einkavæðingu hitaveitunnar yrði farið þar sem það væri hvorki til hagsbóta fyrir bæjarfélögin né heldur HS, auk þess sem íbúarnir sem eigendur höfðu aldrei verið spurðir um hver þeirra vilji var. Skorað var á sveitarstjórnarmenn á svæðinu að bregðast við og reyna að hafa áhrif. Við þeirri áskorun var ekki orðið.

Þetta er sami maðurinn og  og sagði í 24 stundum hinn 18. janúar að það væri ekkert í frumvarpsdrögum íðnaðaráðherra sem kæmi sér á óvart og benti á að ýmsir möguleikar væru í stöðunni. Nú hefur bæjarstjórinn  sem stjórnaformaður HS ásamt öðrum stjórnarmönnum sent athugasemdir við frumvarpið þar sem hann sér loksins að allur sá gjörningur sem á undan er genginn hefur ekki bætt hag HS. Og vill takmarka frumvarpið þannig að hægt sé að halda möguleikum opnum til að bjarga því sem bjargað verður með frekari einkavæðingu,skilji ég fréttina rétt. Bæjarstjórinn sem taldi fyrir rúmlega hálfu að það væri ásættanlegur hlutur fyrir íbúa Reykjanesbæjar að eiga meirihluta í dreifikerfinu virðist nú hafa séð það sama rúmlega og 5200 íbúar á svæðinu voru löngu búnir sjá fyrir að það væri dapur kostur ef ekkert annað fylgdi með. Kannski er að kvikna á perunni?

Maður verður að segja að sá hluti álitsins sem fjallar um að "verið sé að koma á opinberu eftirliti með fyrirtækjum sem geti vel verið í einkaeigu og innleiddar séu takmarkanir á eignarhald auðlinda á orkusviði" veldur manni óneitanlega áhyggjum og er alls ekki í nokkru samræmi við viðhorf þeirra íbúa á Suðurnesjum er byggðu HS upp. Þeir vilja ekki einkavæða þetta fyrirtæki. Maður vonar að brátt kvikni á perunni hvað það varðar.

Frúin er náttúrulega löngu búinn með sinn hluta og mér sýnist á látbragðinu að tími sé kominn til að ég klári minn. Blaðið í ruslið og skúra gólfin.

15. apríl

Var að fá það staðfest að umsögn þessi sem ég ræði hér um er send ínn í nafni forstjóra HS, en ég læt þó greinina standa þar sem ég geng út frá að hún sé þó send inn með samþykki stjórnar HS. Ef svo er ekki þá bara látið mig vita og ég mun fúslega draga þetta blogg til baka.

Á ég að biðjast afsökunar?

Það er eins og ég sagði í bloggi mínu í gær að hið pólitíska dægurþras tekur á sig hinar margvíslegustu myndir. Rétt í þessu er ég að kom úr bæjarferð þar sem tveir gallharðir sjálfstæðismenn tóku mig tali. Ástæða þess var að fyrir nokkrum dögum bloggaði ég um málefni EFF og afgreiðslu Bæjarráðs Reykjanesbæjar á því máli. Við þá afgreiðslu var ég ósáttur. Þeim fannst ég gefa til kynna í bloggi mínu að ég teldi að þeir bæjarráðsmenn væru að vinna fyrir aðra aðila og nánast kröfðust að ég bæðist afsökunar á orðum mínum.  Það sem ég taldi mig hinsvegar vera að segja er að mér fannst þeir ekki gæta hagsmuna Reykjanesbæjar nógu vel, og vitnaði til skýslu endurskoðanda bæjarins því máli til stuðnings, sem ályktaði ekki beint með þeirri ákvörðun sem tekinn var.

Eitt af því sem þeir félagarnir ræddu og það fannst mér sárt að heyra að miðað við hvernig ég tæki á málinu væri nánast útilokað að ég gæti talið mig Sjálfstæðismann. Í mínum huga tel ég mig vera það og sé ekkert í þeim skrifum sem ég hef látið frá mér fara gefa ástæðu til að álykta annað. Hitt er samt rétt að aldrei get ég talist til þeirra sem þar standa lengst til hægri, þ.e. frjálshyggjumaður. Og ég hef ekki hugsað mér að verða já maður skoðana sem ekki eru mínar. Svo aumur verð ég vonandi aldrei.

Hingað til hef ég litið á Sjálfstæðisflokkinn sem flokk margra skoðana, og þar væri hverjum frjálst að berjast fyrir sínum skoðunum, og þannig vil ég ég halda áfram að líta á hann. Ég benti þeim félögum á að það væri til dæmis haf og himinn á milli afstöðu sjálfstæðismanna í Reykjavík og í Reykjanesbæ hvað varðar afstöðuna um eignarhald á Orkuveitu Reykjavíkur og Hitaveitu Suðurnesja, og ekki hefði verið efast um sjálfstæðismennsku borgarfulltrúanna í Reykjavík á sínum tíma. 

Annar þeirra spurði mig hversvegna ég væri yfirleitt að skipta mér af þessu EFF máli og hversvegna í ósköpunum ég væri eiginlega að blogga um það. Því er til að svara fyrir það fyrsta að ég er íbúi í þessum bæ og hef því fullt leyfi til þess að hafa skoðanir á hverju því máli sem upp kemur og varðar bæinn og jafnframt að koma þeim skoðunum  á framfæri. Ég á ekki dagblað og ekki sjónvarpstöð og nenni í raun ekki að vera að trana mér fram í blöðin með greinarskrifum um hvaðeina sem mér kemur í hug. Bloggið er í raun góður miðill fyrir svona vangaveltur. 

Það sem mér finnst kannski mest dapurt í máli þessu öllu og þá á ég við bæði í málefnum HS og EFF að ekki skyldi hafa verið hægt að afgreiða þau á meðal okkar með þeirri samstöðu sem slík mál krefjast. Það hefði verið hægt með umræðu.

Nú held ég að vorið sé að koma.

Einhvern veginn hefur maður á tilfinningunni að nú sé vorið að koma, dagana tekið að lengja svo um munar og sólargeislarnir byrjaðir að ylja manni notalega. Skapið tekið að léttast og maður nennir varla að vera að hafa áhyggjur þessu hversdagslega pólitíska þrasi. Nú er það garðvinnan sem maður fer að hugsa um, enda virðist það svo að það sem maður reynir að berjast fyrir hverju sinni nær ekki eyrum þeirra sem ráða eða þeir láti sig það litlu skipta.

Ég hef hér í undanförnum bloggum verið svolítið argur út í meirihlutann hér í Reykjanesbæ, eg þá kannski mest út í málefni eignarhaldsfélagsins Fasteignar, ég hef fengið skýringu á þeirri afstöðu sem þar var tekinn, en afstaða mín til málsins hefur ekkert breyst. Ég tel enn að meirihlutinn sé á fullri ferð með greiðslukortið og safni inn á það raðgreiðslum fyrir komandi íbúa bæjarins. Ég hef ennþá áhyggjur af að það komi til með að hafa áhrif á aðrar framkvæmdir bæjarins, svo sem gatnagerð og annað viðhald sem bærinn þar að standa undir.

En það þýðir náttúrulega ekki að maður dvelji við það sem er búið að gera og ákveðið. því verður ekki breytt.

Margt hefur náttúrulega samt gerst jákvætt á síðustu viku að mér finnst. Nú er búið að eyða þeirri óvissu sem var í kringum Álverið í Helguvík og er það vel. Nú er það ljóst að sú framkvæmd verður ekki stöðvuð og það er gott fyrir bæjarfélagið, sem núna sér fram á veginn við lausn þeirra verkefna sem þar skapast. Þrátt fyrir mismunandi skoðanir manna um það mál verða menn nú að slíðra sverðin og horfa til framtíðar. Öll höfum við lært mikið af þessu máli og það hefur neytt okkur til að taka málefnalega umræðu um allar hliðar þess.

Það er ljóst að bæjarfélögin á svæðinu eru að vinna í að ná sáttum hvað varðar línulagnir og leiðir hér um Reykjanesskagann og líka ljóst að tekið verður tillit til allra þátta þegar sú leið er ákveðin.Það hefur líka verið lærdómsríkt fyrir okkur íbúana að átta okkur á hve nauðsynlegt er að fullt tillit sé tekið til allra sveitarfélaga á svæðinu og gömul hreppapólitík ekki látinn ráða þar för, því ljost er að enginn keðja er sterkari en veikasti hlekkurinn. Og því verða allir hlekkir í keðjunni hér á Suðurnesjum að vera úr gæðastáli. Því ber að stefna að.

Auðvitað eigum við íbúar á Suðurnesjum ekki að láta það sleifarlag sem viðhaft hefur verið af hendi vegagerðarinnar eftir stöðvun framkvæmda á Reykjanesbraut og það á ekki að vera valkostur í framtíðinni fyrir vegagerðina að bíða eftir slysunum þar til menn standa upp úr stólunum og gangi frá slíkum hlutum svo forsvaranlegt sé.

Við eigum heldur ekki að láta bjóða lög og tollgæslumönnum né okkur sjálfum. að sú lög og tollgæsla sem lögbundin er sé skert vegna þess að menn telji að ekki séu til peningar til að greiða fyrir hvað  hún kostar. Það er greinilegt af allri umræðu um það mál að þar er ekki rétt gefið. þá á að leiðrétta það í stað þess að koma með nýjar leiði sem greinilega eru bæði dýrari og eyðileggja það góða starf sem áður hefur verið unnið. Maður skal meta það sem vel er gert.

Hvers vegna vildi ég staldra við

Ég ætla bara að fara stutt yfir hversvegna  ég  er ósáttur við meðferð þessa máls hjá bæjarfulltrúum okkar. Fyrir það fyrsta þá finnst mér og fleirum að hér hafi verið vaðið af stað og málið alls ekki fengið þá umfjöllun sem það átti skilið. Hagsmuna bæjarins hafi ekki verið gætt á þann hátt sem viðunandi er. Álit endurskoðanda bæjarins er vart virt viðlits, þrátt fyrri að það hefði átt að vera mönnum umhugsunarefni. 

 Það hefur öllum bæjarfulltrúum flokksins verið það fullljóst að nú í ár er fyrsta sinn sem hægt hefði verið að beita endurskoðunarreglunni í samningnum um veru Reykjanesbæjar í Fasteign það hefði átt að leiða til opinnar umræðu um árangur þessa samtarfs sem að mörgu leyti er gottog  líka það sem miður er í því. Sú umræða var aldrei tekinn hvorki í flokknum né í bæjarstjórn heldur valið að vaða í að samþykkja yfirlýsingu senda inn af stjórn Fasteignar, sem er vægast sagt umhugsunarverð taki maður mark á orðum endurskoðandans.  

Það er einnig furðulegt að við skulum detta í þá gryfju með jafn sterkan meirihluta og við höfum að fresta afgreiðslu þessa máls fram á síðasta dag og koma þar með í veg fyrir að opinn umræða færi fram um málið. Rökleysið í málinu hefur verið algert eða þá algerlega náð að fara fram hjá mér. Það eru enginn rök gagnvart fólki að minnihlutinn hafi alltaf verið á móti.Það er u heldur ekki rök að málflutningur aðila byggist á misskilningi eða rangfærslum .  

 Ef menn ætla að vinna einhvern á sitt band þá er betra að vara málefnalegur og leggja spilin á borðið. Eingöngu þannig getur maður myndað sér skoðun. Sú skoðun sem ég hef myndað mér er til kominn af þeim gögnum sem lögð hafa verið fram og þeim er mér hefur tekist að nálgast. Ég hef t.d  ekki getað fengið að sjá sjálfa yfirlýsinguna sem allt þetta mál snýst um, en hinsvegar verið boðið að panta tíma hjá bæjarstjóra í næstu viku, þar sem við getum farið yfir þetta mál. 

Ég mun nú reyna  að fara yfir nokkur þau rök sem styðja mína skoðun og vona að þau útskýri afstöðu mína.  

1.Bærinn safnar að vísu ekki skuldum í eigin efnahagsreikning, en eigi að síður hefur hann skuldbundið sig til að greiða skuld annarra aðila í þessu tilfelli til Eignarhaldsfélagsins Fasteign 

2.Þeir samningar sem gerðir hafa verið við Fasteign t.d hvað varðar Hljómahöllina, Sundmiðstöð og nú síðast búningsklefa við íþróttavöllinn gera ráð fyrir leigutekjum fyrir Fasteign, sem svara til greiðslu  byggingarkostnaðar, fjármagnskostnaðar og viðhaldskostanaðar á 30 árum , án þess að bærinn eignist nokkuð nema réttinn til að kaupa eignirnar á markaðsverði hvers tíma , og skv. áliti endurskoðandans  á nú að bæta við þá þeirri upphæð sem nemur hækkun á virði hlutabréfa í EFF frá því að sveitarfélagið keypti þau, þangað til að þau voru seld á markaði. Það þýðir í raun að þrátt fyrir að hafa borgað leigu og verið þáttakandi í félaginu frá byrjun þyrfti að borga yfirverð fyrir eignirnar eftir samþykkt þessara yfirlýsingar. 

3. Bærinn virðist ekkert hafa um það að segja hver kostnaður einstakra verkefna er  og ekki virðist vera mikið um að útboðum sé beitt til að lækka byggingarkostnað , sem jafnframt lækkar líka leiguverð, þar sem það er reiknað sem prósenta af byggingarkostnaði  0.68% skv. heimasíðu Fasteignar.  

4. Samþykkt þessarar yfirlýsingar hefur skv. því sem ég hef kynnt mér , ekki styrkt á nokkurn hátt stöðu bæjarins gagnvart Fasteign, heldur þvert á móti veikt hana umtalsvert. Hvort heldur litið er til uppsagnar á samningum eða áframhaldandi veru í félaginu. Það verður kostnaðarsamara segja upp samningum velji menn það og allur sá ágóði sem bærinn hefur safnað sér hingað til í formi  hækkandi virðis félagsins er afsalað með þessari yfirlýsingu .  Velji menn að halda áfram í félaginu er öllum ákvæðum í áður gerðum leigusamningum vikið til hliðar þar sem ákvæði þessa Viðauka  verða  rétthærri .

Hvað þora menn ekki að ræða?

Ég skrifaði hér fyrir helgi blogg þar sem ég ræddi ákvörðun bæjarstjórnarfulltrúa Sjálfstæðisflokksins hér í Reykjanesbæ um málefni eingarhaldsfélagsins Fasteigna. Það var ekki að ástæðulausu.  Á skömmum tíma hafa hér verið teknar tvær ákvarðanir sem erfitt er fyrir hinn venjulega flokksmann að skilja, og hvað þá að eitthvað af þessum ákvörðunum hafi verið ræddar eða kynntar í stofnunum flokksins.  Hér er ég að tala um mjög umdeilda bókun bæjarstjórnarmeirihlutans í málefnum Hitaveitu Suðurnesja, þar sem þeir bókuðu að þeir hefðu hafið einkavæðingu Hitaveitu Suðurnesja,og tóku sér stöðu með Geysi Green Energy á móti þeim sveitarfélögum sem byggðu upp HS ásamt Reykjanesbæ. Allir sjá til hvers sú ákvörðun hefur leitt.

Nú síðast er það mál eignarhaldsfélagsins Fasteignar, sem er í raun dæmi um hvernig hægt er að taka ákvörðun án þess að umræða nái að fara fram. Mál þetta er búið að vera á borði bæjarstjórnar og bæjarráðs að ég held frá því í nóvember. Umræðu í bæjarstjórn og bæjarráði hefur verið frestað æ ofan í æ og ákvörðun tekin aðeins fimm dögum fyrir endanlega afgreiðslu á aðalfundi EFF.  Þetta gerir meirihlutinn þrátt fyrir óvenju sterkan meirihluta í bæði bæjarráði og bæjarstjórn. Hvað þora menn ekki að ræða ? Mál þetta er tillaga frá stjórn EFF um að skipta félaginu upp í A og B hluta. Endurskoðandi bæjarins skv. því sem fundargerð bæjarráðs segir, vill meina að með þessari gjörð sé bærinn að afsala sér réttindum og hagnaði án þess að nokkuð komi í staðinn.

Það sem er raunar það merkilegasta í þessu máli er að nú í ár hefði átt að fara fram umræða um hvort hagur Reykjanesbæjar væri vel borgið með áframhaldandi veru í þessu fasteignafélagi. Sú umræða hefur ekki farið fram og skrýtið að bæjarstjórnarfulltrúarnir velji að samþykkja þessa breytingu án þess að taka þá umræðu fyrst. Meirihlutinn vill greinilega meina að mikilvægara sé að samþykkja þetta erindi stjórnar EFF athugasemdarlaust, þrátt fyrir aðvaranir endurskoðandans, frekar en að athuga hvort áframhaldandi vera tryggi hag bæjarbúa til framtíðar.

Nú hef ég rætt við nokkra aðila sem unnu mikið og óeigingjarnt starf fyrir flokkinn við síðustu bæjarstjórnarkosningar, og margir eru sárir út í bæjarfulltrúanna vegna þessara ákvarðana.  Það er ljóst og viðurkennt í okkar augum að bæjarfulltrúarnir eru kjörnir til þess að taka ýmsar erfiðar ákvarðanir. Enginn hafði þá reiknað með að fá eða enginn mál væru lögð undir stofnanir flokksins. Nú er svo komið fyrir mörg okkar, að erfitt er orðið að halda uppi vörnum hvað varðar þessi mál. Ekki koma neinar upplýsingar eða rökstuðningur fyrir þessum gjörðum. Það er lágmarks kurteisi sem bæjarstjórnarmenn gætu sýnt þeim er unnið hafa að kjöri þeirra, að minnsta kosti ræða málin innan flokksins áður en endanlegar ákvarðanir eru teknar þótt þeir ákveði að hlusta ekki. Það heitir lýðræði.

Eru bæjarráðsmenn Reykjanesbæjar leikarar í revíu?

Ég verð að segja að ég varð fyrir miklum vonbrigðum þegar ég opnaði tölvuna mína í kvöld og fór inn á heimasíðu Reykjanesbæjar og sá meirihluti bæjarráðs hafði samþykkt fyrir hönd okkar bæjarbúa afar umdeilda tillögu um heimild til fasteignafélagsins Fasteign að skipta því félagi upp í A og B hluta.  

Breytingin gengur út á að skipta hlutafé félagsins í tvo flokka og skrá félagið í opinberri skráningu á markað. Sveitarfélögunum í EFF er ætlað að vera með svokölluð A-hlutabréf sem eru ekki markaðsvara og því ætlað að undirrita yfirlýsingu um afsal á þeim óinnleysta hagnaði sem orðið hefur með aðild Reykjanesbæjar að fyrirtækinu.  Hins vegar er augljóst að breytingin kemur þeim aðilum mjög til góða sem hyggjast skrá hlutabréf sín í EFF sem B-hlutabréf og setja þau á markað

Ljóst er að endurskoðandi bæjarins telur meirihlutann ekki vera á réttri leið hvað varðar þetta mál eins og kemur augljóslega fram í bókun minnihlutans þar sem þeir vitna til álits endurskoðandans Guðmundar Kjartanssonar dags. 10.12.2007, en þar segir m.a.:

“Upphaflega var það einn af kostum þess að ganga í EFF að sveitarfélagið hagnaðist af hækkun hlutabréfanna í EFF en ákvæði í fyrirhugaðri yfirlýsingu skerða þann hagnað.”

og hann heldur áfram  “Undirritaður bendir á að ef vilji er til að afsala hagnaði til EFF sé rétt að skilgreina þann útreikning betur”

Í bókun meirihlutans segir á móti  "Farið hefur verið yfir álit endurskoðanda frá 10.12.´07 og fullt tillit er tekið til þeirra sjónarmiða sem þar koma fram.  Þetta segja þeir þó án þess að vísa í að einhverjar breytingar hafi orðið á heimildinni.  Þetta finnst mér vera svipað og að segja við endurskoðandann já já, en við ætlum nú samt að hafa þetta svona og það erum við sem ráðum.

Það verður að segjast að maður getur hreint ekki verið viss um hvaða hagsmuni háttvirtir bæjarráðsmenn eru að gæta í þessu tilfelli.  Enda kemur fram seinna í bókun þeirra að þeir virðast hafa mestar áhyggjur hvort Glitnir fái einhverja umbun fyrir undirbúningsvinnu sína en þeir munu fá 200 milljónir fyrir vinnu sína ef breytingin nær fram að ganga.  Þar segir  "Glitnir fær ekkert fyrir undirbúningsvinnu sína ef engin breyting verður á umfangi félagsins." Hverslags vælukjóagangur er þetta?

Maður verður að segja eftir þau mistök sem bæjarstjórnarmeirihlutinn gerði í málefnum Hitaveitu Suðurnesja hefðu menn lært eitthvað.  Og tekið svona mál og litið á þau gagnrýnum augum og spurt sig hvort þetta væri nú örugglega réttur gjörningur.  Sérstaklega í ljósi þess að endurskoðandi bæjarins var búinn að kveikja á gulu ljósi, þannig að menn gætu að minnsta kosti athugað stöðuna.

Það sem er kannski mest dapurt í þessu máli að bæjarráðið hefur í dag misst mikið af því trausti sem til þess er borið og óhætt að segja að það sé orðið að einhverskonar afgreiðslustofnun fyrir utanaðkomandi aðila sem koma sínum málum þar í gegn athugasemdalaust.  Hvað veldur væri gaman að vita?

Nei, nú verða bæjarstjórnarmenn meirihlutans að hrista af revíuhlutverkið sem þeir hafa verið fastir í undanfarin ár og byrja að hafa skoðanir og vinna með hag bæjarbúa að leiðarljósi, því annars kann illa að fara.  Ég skora á þá bæjaráðsmenn meirihlutans að koma með vel rökstudda greinargerð fyrir þessum gjörningi þar sem fram kemur í tölum hvernig þetta þjónar hagsmunum bæjarbúa.  Takist þeim að sannfæra mig mun ég fúslega draga allt það til baka sem sagt er í þessari grein.  Því ég hef ekkert á móti Fasteign, en tel þó að við verðum að gæta hagsmuna bæjarbúa í því sambandi. Því það eru þeir sem borga brúsann.

 

Hljómar vel og skynsamlega

Auðvitað eigum við að hlusta á þá sem nyta þjónustuna, það er ekki nóg með að ferðatíminn styttist heldur líka hitt að Eyjar yrðu sennilega einn aðalviðkomustaður skemmtiferðaskipanna með alla sýna náttúru og sögu. Flott hugmynd

Höfn í Bakkafjöru vanhugsuð